NAHUM 1 - DAÜLANGPÜ LAIHING (BSI)

Mükhong hatü Nyangbü

¹ Hapayü Nineveh am nangkü Elkosh am Nahum thibüi eepü manghkhang jung nyangpü nyüke.

Kahvangei Deiaeiyangshen

² Shembüpayü mükhakpü, bhüh yempü Kahvang nyüke; Shembüpai bhüh yemnyüpeih, hatü mongshih maei nyüpeih. Shembüpai büpalei vepathü khüei bhüh yemnyeih, hatü büpalei vepathü khüei mongshih jaoei tuhnyeih.

³ Shembüpayü mongshihhen youngmü, hatü nganhiwong kü longpü nyüpeih; Shembüpai nemeipü am kü hanghi neshuoh-i hei-üng netuhphongnyih. Büpalei lemü alüngleple kü nyüke; yinglükleisho hatü phumthüyü büpalei la kübü bhihla nyüke.

⁴ Büpai yungching kü lohnyeih, hatü ha ütüknyeih; büpai yungnyüthü ütüknyeih. Bashan hatü Karmel leipü kahthü vantüknyeih, hatü Lebanon chüthü kautüknyeih.

⁵ Shembüpa touei kahshangthü jennyeih, hatü shangtaothü nyaüei yendainyeih. Mechem Shembüpa peihenshang, kahdoknyü hatü halei nyupü peü kheünyüpeih.

⁶ Büpa mongshihjü üpa yaongaokhenang? Büpa nemei-i mongshihpü üpai nenaokhenang? Büpa mongshihpü awlom kei vamnyüke; büpa tou kü yaongnyüthüao bhihla kei nihdainyeih.

⁷ Shembüpayü meiangpeih; büpayü shangpong yakying hepak kü jen loishing nyüke. Büpa kü hinglempüthü kü büpai jungnyüpeih.

⁸ Shejao bünghiyang kü yungnyü yungmok laongpü keiha büpai laophülei vepa Nineveh am chemjalak kü mahtükhen, hatü büpai laophülei vepathü vangnyakei changtükhen.

Kahvang Mongshih Vampü

⁹ Shembüpa khüei mehe mehe phaüshah shownya? büpai ha peü dohtükkemhen. Büpai vepathü kü ne-yei bhüh yemhen aoei netuhhen.

¹⁰ Jomphongü hühhihang kü hühhen, hatü jomei yiüi chokhen; Jomphongü hahtang kei awi hahtükhen.

¹¹ Oh Nineveh, nüng kübü pa hük, üpai Shembüpa khüei ten temnya, hatü mang nyuhnya, ha vamteke.

¹² Shembüpai Israel am kü hapakei enyüke: “Assyria am jom longi, hatü wong kohshi nyujao jom mahtükhen, hatü neshiüi leitükhen.” Oh Judah, ngei am kü hanghi shuohjao hajük küngei am hangnehihüpih.

¹³ Shaang ngei ammei bhagchong leipü Assyria amei pang mangtükhen, hatü am kü shapü nyiamvü phentükhen.

¹⁴ Shembüpai am nangkü shahkungnyü hük shuohteke, Oh Nineveh am: “Ammei men nyuhen mü ammei hühiha nenyuhen. Ngei ammei kahvangthü khümshemei nyupü lajeithü mangtükhen, hatü yaktükhen. Am nemeipü nangkü ngei am shing mahngchong temnyüpeih.”

¹⁵ Antolei kahshangthülei chingmeivangmei shahjangmei kotü peiküpü shahjang kobü kü veihümao! Oh Judah nanglakthü, ammei monyü moha motuh, hatü ammi lahtükpü düktuh. Hajük kü nemeipü ami am shak kü neaokhüpih; Jomü chemjalak kü mahdaiteke.