MÜLANGPÜ 9 - DAÜLANGPÜ LAIHING (BSI)

Haümyem Champü

¹ Hahepak kü Shembüpai Mosa kü, “Pharaoh touei peiyei büpa kü eyeishuoh, ‘Shembüpa, Hebrew amei Kahvangi hapakei enyüke: Ngei kü khümhen shingvaishi ngelei nanglakthü leishihtuh.’

² Mehenangkü nüngi jom neleishih-i shümei tuhjema,

³ Shembüpai ammei haümyem, koyei, gadu, ut, mohoh, hatü mi hi yumthü kü cham peihüei ditükkemhen.

⁴ Shejao Shembüpai Israel amei haümyemthü hatü Ijip amei haümyemthü nyi aa kü baong hanhen, hatü Israel amei haümyemthü nedihühen” shei eteke.

⁵ Shembüpai hepak hük tetei, “Ngenyih ngei, Shembüpai hapa dou dükhen” shei eteke.

⁶ Nyihphei Shembüpai büpai epükei dük, hatü Ijip amei haümyemthü peü di, shejao Israel amei haümyem hükao nedi.

⁷ Pharaoh-i ha nang pheshuoh shingkü Israel amei haümyem hükao nedi shei nying. Shejao Pharaohlei mong vaanteke, hatü büpai nanglakthü neleishih.

Hihüma

⁸ Hahepak kü Shembüpai Mosa hi Aaron nyi kü, “Awdep leipü awnih lakbaoh hük mukei Pharaoh-i eeshi Mosai shangei haiyeishuoh.

⁹ Hapai Ijip kahdok kemeilei shennyak hatü yemhimak peü kü hihüma vamhühen” shei e.

¹⁰ Hanangkü jijinyi-i awdep leipü awnih baoh-ei Pharaoh touei yaongtü Mosai shangei hai, hatü shennyak hatü yemhimak peü kü hihüma vamteke.

¹¹ Nganbüthü Mosa touei nepeiaok; mehenangkü nganbüthü hatü Ijip am peü kü hihüma vamteke.

¹² Shejao Shembüpai Pharaohlei mong vaanhü, hatü Shembüpai epü keiha büpai jiji-i epü kü nebang.

Shüyaong Vüpü

¹³ Hahepak kü Shembüpai Mosa kü, “Nepnüng dhom mü lomi paoei Pharaoh touei peiyei büpa kü eyeishuoh, ‘Shembüpa, Hebrew amei Kahvangi hapakei enyüke: Ngei kü khümhen shingvaishi ngelei nanglakthü leishihtuh.’

¹⁴ Hei nevaijema hapa kahdoknyü kü ngei kei üpayao neshiü shei nüngi nyinghen shangmü ngei hapa shan keyü nüng hatü lakchongbüthü hatü nüngei nanglakthü kü ngelei hanghi chetshi shomhen.

¹⁵ Ngei ngelei lak noei nüng hatü nüngei nanglakthü kü lakhünglangmeyü shaang keiyü am peü kahdoknyü kübü mahdaikemtü nyuhah shepeih.

¹⁶ Shejao nüng kü ngelei nganhilong huhen, hatü kahdoknyü peü touei ngelei men baonghühen nangkü mon ngei am nemahtüki tuhpeih.

¹⁷ Shejao shaang ngoishi nüngi ngelei nanglakthü shak kü changmeinyüke, hatü jom neleishihnyu.

¹⁸ Ngenyih hapa hepak kü ngei am vamhinüng shaang thahshi chemao mangvüpü shüyaong vihpü vüphahen.

¹⁹ Hanangkü shaang ammei haümyemthü hatü ammi angpü lemphüli koshoya leipü dhümei leilangkemhen ngeükhüam shuohtuh; shennyak vaituh nevaijü haümyem vaituh dhümei nelei-i nyupü kemei jom kü shüyaongi shükei jühen” shei eteke.

²⁰ Pharaohlei lakchongbüthü üam Shembüpalei shah kü nyem, jomi jomei aathü hatü haümyemthü dhümei leilang.

²¹ Üami Shembüpalei shah kü mongneshuoh, jomei aathü hatü haümyemthü koshoyalei tuhphong.

²² Hahepak kü Shembüpai Mosa kü, “Nüngi vangsho philei nüngei lak haongtuh hatü Ijip kahdok peülei shennyakthü, haümyemthü hatü Ijip kahdok kübü sheili peü kü shüyaong vühen” shei eteke.

²³ Hahepak kü Mosai vangsho philei büpalei lenshuoh noei anteke, hatü Shembüpai vangmuk khungei shüyaong vüshih, hatü kahdok kü klang nyep, hatü Shembüpai Ijip kahdok kü shüyaong vüshihteke,

²⁴ hatü shingmü shingmü klang nyepteke. Ijip kahdok jat hük shei leipheikü hapayü peü mü nemeipü yinglükleisho nyuteke.

²⁵ Ijip kahdok kempülei koshoyalei nyupü lemphüli, shennyak nevaijü haümyem peü kü shüyaongi shükteke; kah kübü sheili hatü pühivung peü shüyaongi shükei mangtük.

²⁶ Israel am nyupü Goshenei mon shüyaong nevü.

²⁷ Hahepak kü Pharaoh-i Mosa hi Aaron nyi nyükei, “Shinnyih-ü ngei mang thahteke; Shembüpayü jiüshangpü nyüke, shejao ngei hatü ngelei nanglakthü nejiüpü khih.

²⁸ Shembüpa kü phopeishuoh! Mehenangkü vangmuk khungpü ngeü hatü shüyaongi madaiteke; am hajük kü halei nyuhen nadang neshiü; ngei am deishihhen hih” shei eteke.

²⁹ Mosai büpa kü, “Ngei hapa chingnyü kübü leidaihinüng, Shembüpa kü ngelei lak haongei phophen, hatü vangmuk khungpü dohdaiphahen, hatü shüyaong hajük kü nevükahen shei e.

³⁰ Shejao nüng hatü nüngei lakchongbüthüi shaang thahshi Shembüpa kü nenyemnyu shei ngei nyingnyüke” shei eteke.

³¹ Phümphah hatü barley hah mangtük; mehenangkü barley hah menei nyu, hatü phümphah-ü bong pungei nyuteke.

³² Shejao wheat hatü spelt hah nyi nemang; mehenangkü henyiyü shao-üng mangkoh-i nyuteke.

³³ Mosai Pharaoh tuhtü chingnyü kübü yanei daiyei, Shembüpa kü büpalei lak haongei phop; hahepak kü vangmuk hatü shüyaong dohdai, hatü hajük kü vang nekei.

³⁴ Shejao mechem Pharaoh hatü büpalei lakchongbüthüi vangmuk, shüyaong hatü vang dohdaiteke shei nyingpa, büpai shao mang thah, hatü mong vaanei leiteke.

³⁵ Hanangkü Shembüpai epükei Pharaohlei mong vaanei lei, hatü büpai Israel am neleishih.