MÜLANGPÜ 8 - DAÜLANGPÜ LAIHING (BSI)

Louk Vampü

¹ Hahepak kü Shembüpai Mosa kü, “Pharaoh touei peiyei büpa kü, ‘Ngei kü khümhen shingvaishi ngelei nanglakthü leishihtuh shei Shembüpai enyüke’ shei eyeishuoh.

² Nüngi jom neleishihjema, nüngei kahmük kü louk vamei hanghihühen.

³ Nile yungyen louki mahühen, hatü hathüi nüngei ongshem, dungnuk, shinshing, nüngei lakchongbüthülei shemei hatü nanglakthü touei hatü ammei nükdük haodük peü kü shükahen.

⁴ Loukthüi nüng, nüngei nanglakthü hatü lakchongbüthü kü bakkahen” shei eteke.

⁵ Hahepak kü Shembüpai Mosa kü, “Aaron kü lenshuoh noei nüngei lak yungyenthü, hatü yungkukthü shangkü haongtuh hatü Ijip kahdok kü louk vamhühen eyeishuoh” shei eteke.

⁶ Hanangkü Aaroni Ijip amei yungthü shangkü büpalei lak haong, hatü louk vamei Ijip kahdok mateke.

⁷ Shejao nganbüthüiyao aihük mü dükaok, hatü Ijip kahdok kü louk vamteke.

⁸ Hahepak kü Pharaoh-i Mosa hatü Aaron nyi kü nyükei, “Ngei hatü ngelei nanglakthü toueipü louk yahlangshih shei Shembüpa kü phopeishuoh hatü Shembüpa kü jakpü moila shuohhen ngei nüngei nanglakthü leishihhen” shei eteke.

⁹ Mosai Pharaoh kü, “Nüng hatü nüngei lakchongbüthü hatü nanglakthü toueipü louk mahtükphahen shingvaishi ngei mechem am shing phophahhen nüngi hepak itkei. Nile yungyenei nyupü mü lenei nüng hatü nüngei shemthü kü louk nechongkahen” shei eteke.

¹⁰ Pharaoh-i “Ngenyih phopshih” shei e. Hahepak kü Mosai, “Ngei nüngi epükei phopphahen, hatü Shembüpa, hamei Kahvang kei lebü kahvang neshiü shei nüngi nyinghen.

¹¹ Nile yungyenei nyupü mü lenei nüng hatü nüngei shemthü, nüngei lakchongbüthü hatü nüngei nanglakthü toueipü loukthü lüdaiphahen” shei eteke.

¹² Hahepak kü Mosa hatü Aaron nyi Pharaoh toueipü dai, hatü Mosai Shembüpa kü Pharaoh kü shuohpü loukthü yahlangeishuoh shei phop,

¹³ hatü Shembüpai Mosai phoppükei dükteke, hatü shemong, chingshe hatü kahnga kü nyupü loukthü peü didaikem.

¹⁴ Ijip ami loukmahng thaiyei shüngteke hatü kahdok peü kü shie büteke.

¹⁵ Shejao mechem Pharaoh-i loukthü didaipü eepa, Shembüpai epü keiha büpa shao mong vaanei lei, hatü Mosa hi Aaron nyi-i epü nebang.

Tet Vampü

¹⁶ Hahepak kü Shembüpai Mosa kü, “Aaron kü nüngei lenshuoh noei antü bhihla kü bheituh, hatü Ijip kahdok kempü kü bhihla-i tet leikahen shei eyeishuoh” shei eteke.

¹⁷ Hapakei jijinyi-i dük; Aaroni lenshuoh noei büpalei lak haong, hatü bhihla kü bhei, hatü bhihla peü tet leiyei Ijip kahdok mateke, hatü shennyak hatü yemhimakthü kü bakteke.

¹⁸ Nganbüthüi jomei ngani tet vamhününg khe, shejao jomi neaok. Shennyak hatü yemhimakthü kü büm lüpei tet vam.

¹⁹ Nganbüthüi Pharaoh kü, “Hapayü Kahvangi lakhüngnyu khih” shei eteke. Shejao Shembüpai epü keiha Pharaoh mong vaanteke, hatü büpai ha nebang.

Hoithüng Maanha Vampü

²⁰ Shembüpai Mosa kü, “Dhom mü lomi paotuh hatü Pharaoh yungei yiüküjü pongteiyei büpa kü Shembüpai hapakei enyüke shei etuh: Jomphong ngei kü khümhen shingvaishi ngelei nanglakthü leishihtuh.

²¹ Nüngi ngelei nanglakthü neleishihjema, ngei nüng, nüngei lakchongbüthü, hatü nüngei nanglakthü, hatü nüngei shemthü, hatü Ijip amei shem kemei kü, hatü jom nyupü kahdok kemei kü hoithüng maanha vamei mahühen.

²² Shejao hapa nyih kü nüngi ngeiyü Shembüpa khih shei nyinghen shangmü ngei ngelei nanglakthü nyupü Goshen kahmük hoithüng maanha nevamhü-i hayaoha banei tuhhen.

²³ Hapa keiha, ngei ngelei nanglak hatü nüngei nanglak aa kü baong hanei nohen. Hapa yashanpü ngenyih vamkahen” shei e.

²⁴ Shembüpai epükei dük, hatü hoithüng maanha longi Pharaohlei ongshemei, büpalei lakchongbüthülei shemei nyuteke, hatü hoithüng maanha-i Ijip kahdok kemei lomohhüteke.

²⁵ Hahepak kü Pharaoh-i Mosa hatü Aaron nyi nyükei, “Daituh, hatü hapa kahdokei-üng ammei Kahvang kü jakpü moila shuohtuh” shei eteke.

²⁶ Shejao Mosai, “Hammü hapakei dükhenü jiüpü nevaikahen; mehenangkü Shembüpa, hamei Kahvang kü shuohpü jakpü moilayü Ijip am shingvaishi huluh shuohbenüng nyüke. Hami Ijip am touei jomi huluh shuohbenüng jakpü moila shuohjema, jomi ham kü yaongi neshükphahen je?

²⁷ Hami jahpanei nyih jem lem kü daiyei mon Shembüpa, hamei Kahvang kü büpai epükei jakpü moila shuohhen vongbong” shei e.

²⁸ Hanangkü Pharaoh-i, “Jahpanei Shembüpa, ammei Kahvang kü jakpü moila shuohhen ngei am leishihhen, shejao am longi taishi nedaihen vongbong. Shaang ngei shingvaishi phopshih” shei e.

²⁹ Hahepak kü Mosai, “Ngei leihinüng Shembüpa kü phopshuohhen hatü ngenyih nüng, nüngei lakchongbüthü hatü nanglakthü toueipü hoithüng maanha lüdaikemphahen; shejao Shembüpa kü jakpü moila shuohhen neleishih-i shao ham kü lueilemei tedükma” shei eteke.

³⁰ Hanangkü Pharaoh toueipü Mosa daiyei Shembüpa kü phopteke,

³¹ hatü Mosai phoppükei Shembüpai dük. Hoithüng maanha hükao ne-ao-i Pharaoh hatü büpalei lakchongbüthü hatü nanglakthü toueipü lüdaikem.

³² Shejao hahepak kao Pharaoh mong vaanei lei, hatü nanglakthü neleishih.