MÜLANGPÜ 7 - DAÜLANGPÜ LAIHING (BSI)

¹ Hahepak kü Shembüpai Mosa kü, “Veihümao, Pharaoh touei ngei nüngü Kahvang kei leihühen hatü anjei Aaronü nüngei thibü vaihen.

² Ngei nüng kü epü lemphüli anjei Aaron kü eyeishuoh hatü büpai Pharaoh kü büpalei kahdok kübü Israel am leishihtuh shei eshuohkahen.

³ Shejao ngei Pharaohlei mong vaanhühen; Ijip kahdok kü ngei nyeinya yashanyale dou dükshuohjao,

⁴ büpai nüngi epü nebangkahen. Hahepak kü Ijip kü lak nohen hatü mangshi shahphenhen hatü ngei ngelei nanglak Israel am khongmü khongmü mülanghen.

⁵ Hatü mechem ngei Ijip am khüei ngelei lak noei Israel am mülanghen, hahepak kü Ijip ami ngeiyü Shembüpa shei nyinghen” shei eteke.

⁶ Mosa hi Aaron nyi-i jiji kü Shembüpai kangshuohpükei dük.

⁷ Jijinyi-i Pharaoh mü eteipü hepak kü Mosayü vangbong büali hatü Aaronü büalipüjem nyuteke.

Aaronei Lenshuoh-i Biü Leipü

⁸ Shembüpai Mosa hatü Aaron nyi kü eteke,

⁹ “Mechem Pharaoh-i anji kü, ‘Yashanpü dou düktuh’ shei ephahenshang, Aaron kü büpalei lenshuoh yah-ei Pharaoh tou kü shükeishuoh shei eyeishuoh hatü ha biü leikahen.”

¹⁰ Hanangkü Mosa hi Aaron nyi-i Shembüpai epükei Pharaoh touei peiyei dük. Aaroni Pharaoh hatü büpalei lakchongbüthü touei peiyei dükteke. Aaroni Pharaoh hatü büpalei lakchongbüthü touei büpalei lenshuoh shük, hatü hapa biü hük lei.

¹¹ Pharaoh-i Ijip am nganbüthü hatü phongyompüthü nyükei jomphongiyao aihük mü dük.

¹² Jom peüi laophülei lenshuoh shük, hatü biü lei, shejao Aaronei lenshuoh-i leipü biüi jomei lenshuoh-i leipü biü peü lühtük.

¹³ Shembüpai epü keiha Pharaohlei mong vaanteke, hatü jijinyi-i epü kü büpai nebang.

Yungi Iy Leidaipü

¹⁴ Hahepak kü Shembüpai Mosa kü eteke, “Pharaohlei mong neleinyu; büpai nanglakthü leishihhen nemongnyu.

¹⁵ Pharaoh nepnüng dhom mü yungei yiüküshingkü büpa touei heihtuh. Büpa mü pongteinüng Nile yungkungei danei nyutuh, hatü biü leiteipü lenshuoh-ao notuh.

¹⁶ Büpa kü hapakei eyeishuoh, ‘Shembüpa, Hebrew amei Kahvangi ngei nüng touei shompeyü, jahpanei jomi ngei kü khümhen shingvaishi ngelei nanglakthü leishihtuh’ shei ehen shompü khih. Shejao shaang thahshi nüngi nebangnyu.”

¹⁷ Veituh, ngelei lak leipü lenshuoh-i Nile yung kü bheihen, hatü hapayü iy leidaihen. Hapai “Ngeiyü, Shembüpa” shei nüngi nyinghen shei Shembüpai enyüke.

¹⁸ Nile yung kübü nyahthü didaihen, yungyen kü shie bühen, hatü Ijip ami Nile yung kübü yung nenyingaokhen.

¹⁹ Shembüpai Mosa kü eteke, “Aaron kü nüngei lak leipü lenshuoh-i Ijip amei yungyenthü, yunglemthü hatü yungkukthü shangkü ha notü lak haonghen eyeishuoh, hatü hathü kemei iy leidaihen; Ijip kahdok kemeilei iy mon nyukahen, yungchei hatü yungdük kübü yung dangkao iy leidaihen.”

²⁰ Mosa hatü Aaron nyi-i Shembüpai epükei dük. Pharaoh hatü büpalei lakchongbüthüi veishi Aaroni büpalei lenshuoh noei antü Nile yung kü bheiteke, hatü yung kemei iy leidai.

²¹ Nile yungyen kübü nyah kemei di, hatü Ijip ami neyingaoki yung kü shie büteke. Ijip kahdok peü iy mon maei nyu.

²² Shejao Ijip amei nganbüthüi aihük mü dükaokteke; hanangkü Pharaohlei mong vaanteke, hatü Shembüpai epükei büpai Mosa hi Aaron nyi-i epü kü nebang.

²³ Pharaoh nyokei shemei leidai, hatü büpai hapa mong kao deih-ei nele.

²⁴ Yungyen leipü yung neyingaokpü nangkü Ijip am peüi yungkungei yungkuk shoteke.

²⁵ Shembüpai Nile yungyen kü bheipheikü nyih nyet daiteke.