MÜLANGPÜ 6 - DAÜLANGPÜ LAIHING (BSI)

¹ Hahepak kü Shembüpai Mosa kü, “Shaang ngei Pharaoh kü mehe dükshuohhen ha nüngi eehen. Ngei ngelei laklu wong longpai jom leishihtükhen; hingmei-üng ngei ngelei laklu wong longpai jom büpalei kahmük kübü deishihtükhen” shei e.

Kahvangi Mosa Nyükpü

² Kahvangi Mosa kü nyüktü, “Ngeiyü Shembüpa” shei e.

³ Ngei Abraham touei, Isak touei hatü Jakob touei Jeiyong Kahvang shei shakei vamei hupeih, shejao ngelei daülangpü men, “Shembüpa” shei jomphong üpa kao nenyinghüangpih.

⁴ Ngei jom mü Kanan kahdok melei jom benha kei nyupa, hapa kahdok shuohhen shingvaishi vangpüshuwpü lingpeih.

⁵ Ijip ami aa leihüpü Israel am theppü ngaüpü ngei dantepih, hatü ngei vangpüshuwpü deih-ei dangpeih.

⁶ Hanangkü Israel am kü, “Ngeiyü Shembüpa, hatü ngei am yanghen hatü Ijip amei aa vaipü laphen kübü bümei leihühen. Ngei jom kü shahphenpü yah-ei peihen nangkü ngelei nyempühanpü lak nohen hatü ngei am angei leihen.

⁷ Ngei amü ngelei nanglak leihühen, hatü ngeiyü ammei Kahvang vaihen. Mechem ngei am Ijip amei aa vaipü laphen kübü bümei leihühen, ammi ngeiyü Shembüpa, ammei Kahvang shei nyinghen.

⁸ Ngei Abraham, Isak, hatü Jakob kü shuohhen shei lahpü kahdokei am müei leihen, hatü denden shing am lompü vaihen ngei am kü shuohhen. Ngeiyü Shembüpa” shei etuh.

⁹ Mosai Israel am kü hapa ejateke, shejao jomi Mosai epü kü nebang; mehenangkü jom aanyak leipü nangkü mongshedaitü nyuteke.

¹⁰ Hahepak kü Shembüpai Mosa kü,

¹¹ “Layaongei daituh, hatü Ijip ongpa Pharaoh kü Israel am hapa kahdok kübü leishihtuh shei eyeishuoh” shei eteke.

¹² Shejao Mosai Shembüpa kü, “Israel ami dangkao ngei epü kü nebangjü, ngei keipü shah üngpü shennyaki epü kü Pharaoh-i mekei bangkahen ang?” shei e.

¹³ Shembüpai Mosa hatü Aaron nyi kü Ijip ongpa Pharaoh hatü Israel am nangkü e, Ijip kahdok leipü Israel am müei daituh shei ngeükhüam shuoh.

Mosa hatü Aaron Nyilei Mükhiphang Lem

¹⁴ Hathüyü jomei shemong nyi mükhiphang lem nyüke: Jakobei hashongpa Reubenei hapeüthü: Hanokh, Pallu, Hezron, hatü Karmi; hathüyü Reuben am phang nyüke.

¹⁵ Simeonei hapeüthü: Jemuel, Jamin, Ohad, Jakhin, Zohar hatü Shaul, Kanan la-i bühpü; hathüyü Simeon am phang nyüke.

¹⁶ Hathüyü Levilei hapeüthülei men nyüke: Gershon, Kohath, hatü Merari. Levi vangbong 137 nyuteke.

¹⁷ Gershonei hapeüthü: Libni hatü Shimei hatü jijilei hühihathü longi nyuteke.

¹⁸ Kohathlei hapeüthü: Amram, Izhar, Hebron, hatü Uzziel. Kohath vangbong 133 nyuteke.

¹⁹ Merarilei hapeüthü: Mahli hatü Mushi. Hathüyü jomei bülem aimü Levi phang nyuteke.

²⁰ Amrami chenyei Jokhebed mü shem yem, hatü Aaron hi Mosa nyi angteke. Amram vangbong 137 nyuteke.

²¹ Izharlei hapeüthü: Korah, Nepheg hatü Zikhri.

²² Uzzielei hapeüthü: Mishael, Elzaphan, hatü Sithri.

²³ Aaroni Amminadabei yiükha hatü Nahshonei chenaü Elisheba mü shem yem, hatü Nadab, Abihu, Eleazar, hatü Ithamar angteke.

²⁴ Korahlei hapeüthü: Assir, Elkanah, hatü Abiashaph. Hathüyü Korah am phang nyuteke.

²⁵ Aaronei cheha Eleazari Putielei yiükha hük mü shem yem, hatü pinnyüi Phinehas angteke. Hathüyü Levi mükhiphang kübü phangdep pathü nyüke.

²⁶ Hapayü Shembüpai, “Ijip kahdok leipü Israel am khongmü khongmü müei daituh” shei eshuohpü Aaron hi Mosa nyi nyüke.

²⁷ Ijip ongpa Pharaoh kü Ijip leipü Israel am müei daihen eshuohpü Mosa hatü Aaron nyi nyüke.

Mosa hi Aaron Nyi kü Shembüpa i Kangpü

²⁸ Mechem Shembüpai Ijip kahdokei Mosa mü shah eteipa,

²⁹ büpai, “Ngeiyü Shembüpa, Ijip ongpa Pharaoh kü ngei nüng kü epü lemphü eyeishuoh” shei e.

³⁰ Shejao Mosai Shembüpa kü, “Ngeiyü shah üngpü shennyak Pharaoh-i mekei ngei epü kü bangkahen ang?” shei eteke.