MÜLANGPÜ 5 - DAÜLANGPÜ LAIHING (BSI)

Mosa hi Aaron Nyi Ijip Ongpa Touei

¹ Hapheikü Mosa hi Aaron nyi Pharaoh ongpa touei peiyei, “Jahpanei jomi ngei kü mohitap linghen shingvaishi ngelei nanglakthü leishihtuh shei Shembüpa, Israel amei Kahvangi hapakei enyüke” shei e.

² “Ngei büpalei ven bangei Israel am leishihhenü üpa Shembüpa ang? Shembüpa, üpa shangkü ngei nenying hatü ngei Israel am neleishihpih” shei Pharaoh-i e.

³ “Hebrew amei Kahvang ham touei shakei vamküteke. Shaang ham nyih jem lem kü jahpanei daiyei Shembüpa, hamei Kahvang kü jakpü moila shuohhen deishihtuh, hei nevaijema büpai ham dinlemi nevaijü vehok homei jütükhen khih” shei jijinyi-i eteke.

⁴ Shejao Ijip ongpai jijinyi kü, “Mosa hi Aaron nyi, mehekei anjinyi-i nanglakthü dou dükpü kübü leilanghen enya? Anji nyiyao dou düktuh!” shei e.

⁵ “Veituh, Ijip am meyü jom-üng nyeinya nanglak dadaiteke, hatü shaang anjinyi-i jom dou dükpü kübü dohtükhüpü je?” shei Pharaoh-i eteke.

⁶ Ha nyih-üng Pharaoh-i dou kü hienbüthü kü,

⁷ “Amphongi nanglakthü kü itayaong oukhen sheleipükei hahtang teshuoh; jom nyingi daiyei yemei leiyei nyemouk.

⁸ Shejao hükao nekomi sheleipü shük-üng oukhen etuh; mehenangkü jomphongü nehetpü nangkü, ‘Hamei Kahvang kü jakpü moila shuohhen ham leishihtuh’ shei leneiwongnyeih.

⁹ Jom kü shao nyeinya douwong yaheishuoh, shejüang jomi shahshem kü mong neshuohhen” shei ngeükhüam shuoh.

¹⁰ Hahepak kü dou kü hienbüthü heih-ei nanglakthü kü, “Hapakei Pharaoh-i enyüke: ‘Ngei am kü hahtang neshuohpih.

¹¹ Am nyingi daiyei melei melei danghen shangkü yemei leiyei lingtuh; shejao shelei oukpüshük-üng ajükao nekomi ouktuh’ shei enyüke” shei eteke.

¹² Hanangkü Ijip kahdok peü kü nanglakthüi itayaong oukhen hahtang yemei yanteke.

¹³ Dou kü hienbüthüi, “Amphong kü hahtang shuohpü hepak kü dükpükei nyihjeih am kü hanpü dou temtuh” shei hienteke.

¹⁴ Pharaohlei dou kü hienbüthüi Israel am dou kü veihen jepüthü kü, “Amphongi shelei dükpükei mehekei menyih hatü shinnyih dou netempa?” shei üpteke.

¹⁵ Hahepak kü Israel am dou kü veibüthüi Pharaoh touei peiyei, “Nüngi nüng chongphobüthü kü hapakei mehekei nonya?

¹⁶ Ham kü hahtang neyahphünyu, shejao itayaong lingtuh shei enyüke, hatü hamphong kü üpnyüke. Nejiüpeyü nüngei nanglakthü khih” shei eteke.

¹⁷ Pharaoh-i, “Am aung neleipü, nehetpüthü; hanangkü ‘Shembüpa kü jakpü moila shuohhen ham leishihtuh’ shei ammi eteinyu khihma.

¹⁸ Daiyei dou düktuh; am kü hahtang neshuohhen, shejao am kü hanpü nekomi itayaong ouktuh” shei eteke.

¹⁹ Israel am dou kü veibüthüi mechem jom kü, “Shelei oukpükei itayaong lakshing nekomi ouktuh” shei eshuohpa, jom hanghi kü nyüke shei nyingteke.

²⁰ Mechem jom Pharaoh toueipü daipa, jomi Mosa hi Aaron nyi jom mü pongteihen danei nyupü heüteke,

²¹ hatü jomphongi jiji kü, “Anji-i dükpü dou Shembüpai nyem-ee, hatü anji kü shah nyemphen! Anjinyi-i Pharaoh hatü büpalei lakchongbüthü tou kü ten vamhüteke, hatü ham jühen jomei lak kü yanlu shuohteke” shei eteke.

Mosai Phoppü

²² Hahepak kü Mosai Shembüpa philei lepei leiyei, “Oh Shembüpa, mehekei nüngi nanglakthü kü hanghi shuohnya? Mehekei nüngi ngei shompa?

²³ Nüngei men kü Pharaoh touei ngei peiyei eteipü mü pangei büpai nanglakthü kü nemei-i nonyüke, hatü nüngei nanglakthü yanglem nüngi meheyao nedükang” shei eteke.