MÜLANGPÜ 40 - DAÜLANGPÜ LAIHING (BSI)

Ashakshem Vepü hatü Leüpü

¹ Shembüpai Mosa kü,

² “Shongpü len shongpü nyih kü ashakshem yaongtuh.

³ Hapa mongei Vangpüshuwpü Pela haütuh, hatü nüngi ha kü ashaki haentüktuh.

⁴ Nüngi ha mongei haüdü shüei hapa kü douhinang haütuh, hatü nüngi awshong shüei ha kü haütuh.

⁵ Vangpüshuwpü Pela touei ayingshü jakhen hon moidü haütuh, hatü ashakshem shadenei haenhen ashak sheütuh.

⁶ Ashakshem chingshe shadenei moila jakhen moidü haütuh,

⁷ hatü ashakshem hi moidü aa kü chilimji kü yung shihtü haütuh.

⁸ Nüngi ha shinei chingshe shing bantuh, hatü chingshe peshaden kü ashak haentuh” shei eteke.

⁹ “Nüngi phuhen mainga yah-ei ashakshem hatü hapa mongei nyupü lemphüli kü nyiotuh, hatü haleipü uoshing yaongshing peü daülangi leihen shingvaishi daütüktuh.

¹⁰ Nüngi shao moila jakpü moidü hatü haleipü dükhi-ümthü peü kü daülangi leihen shingvaishi nyioei daütüktuh.

¹¹ Nüngi chilimji hatü hapalei la kao nyiotuh hatü ha daütüktuh.

¹² Hapheikü nüngi Aaron hatü chehathü ashakshem shadenei müei deiyei yungi jom kü hangha lakhütuh,

¹³ hatü Aaron kü daülangpü ow owhütuh, hatü büpai ngei kü ngongpa kei chongphoaokhen shingvaishi büpa kü mainga nyioei daühütuh.

¹⁴ Nüngi chehathüao müei deiyei jom kü bhagthuh thuh-eishuoh,

¹⁵ hatü nüngi chepa kü nyiopükei jomiyao ngei kü ngongpathü kei chongphoaokhen shingvaishi mainga nyioeishuoh. Hapa mainga nyiopai jomphongü ngoikahen hepak peü shingvaishi ngongpathü leihühen” shei eteke.

¹⁶ Shembüpai büpa kü epükei Mosai lemphüli dük.

¹⁷ Hanangkü nyipabü vangbong shongpü len, shongpü nyih kü ashakshem yaongteke.

¹⁸ Mechem Mosai ashakshem yaonghüpa, büpai pülethü shing shing kü haüteke, shemtahng yeüpü yaonghüteke, hatü shongkaong hatü shemnyü haongteke.

¹⁹ Shembüpai büpa kü epükei büpai ashakshem shangkü ashak paantü hapa shangkü jümteke.

²⁰ Büpai vangpüshuwpü lai yah-ei pela mongei hü, hatü hapa pela kü kenh shih, hatü hapa pela shangkü shaküp küp;

²¹ hatü büpai hapa pela ashakshem mongei yah-ei shü, hatü Shembüpai büpa kü epükei ashak haen; hapa keiha Vangpüshuwpü Pela kü ashaki haenteke.

²² Büpai haüdü yah-ei ashakshem mongei apshaphilep kü haenpü ashak haolei haüteke,

²³ hatü Shembüpai büpa kü epükei hapa shangkü Shembüpa kü moilapü aan shingnüngei haü.

²⁴ Büpai ashakshem mongei awshong haüdü kü khangteiyei ashakshem pehephi kü haüteke,

²⁵ hatü Shembüpai büpa kü epükei Shembüpa tou kü büpai aw jak.

²⁶ Büpai hon moidü ashakshem mongei haenpü ashak touei haü,

²⁷ hatü Shembüpai büpa kü epükei vong meipü ayingshü jakei moila shuoh.

²⁸ Büpai ashakshem shaden kü shingnüngei ashak haenteke.

²⁹ Büpai ashakshem shaden kü jakpü moila shuohhen moidü haü, hatü Shembüpai epükei hapa kü jakpü moila hatü hahying moila shuoh.

³⁰ Büpai ashakshem hatü moidü nyi aa kü chilimji haü, hatü lakhila phuhen yung shih,

³¹ hatü hapa kü Mosa, Aaron hatü büpalei chehathüi ha kü jomei lakhila phuteke.

³² Mechem jomi ashakshem mongei shühenshang, hatü moidü ngoihenshang, Shembüpai Mosa kü epükei jomei lakhila phuhamteke.

³³ Büpai ashakshem hatü moidü haühen shing banteke, hatü chingshe shaden kü ashak haenteke. Hapakei Mosai dou peü dükei tem.

Shembüpa lei Müknyinshekhang

³⁴ Hahepak kü ashakshem kü phumi jüm, hatü halei Shembüpalei müknyinshekhangi ma.

³⁵ Mosai ashakshem mongei neshüaok; mehenangkü hapa kü phumi jümlang, hatü Shembüpalei müknyinshekhangi hapa ashakshem madai.

³⁶ Mechem ashakshem leipü phum shangei aongdaihen, hahepak kü mon Israel ami jomei baümtap lebü shingei chaiyei dai;

³⁷ shejao phumi jümshi nyupü thahshi jomi jomei baümtap kübü shing chaiyei nedai;

³⁸ Mehenangkü jom longteipü yenlem yang kemei Israel am phang peüei müki eeshi ashakshemei nyihnüngü Shembüpalei phum hatü yanüngü phum kü aw kohtü nyuteke.