MÜLANGPÜ 4 - DAÜLANGPÜ LAIHING (BSI)

Kahvangi Mosa kü Yashanpü Ngan Shuohnyüke

¹ Hahepak kü Mosai Shembüpa kü, “Shejao nyingshah-i jomi ngei epü kü hingnelem nevaijü nebangi ‘Shembüpai nüng touei shakei vamei ne-eangpih’ shei ephüjema, ngei mehe eshuohhen?” shei eteke.

² Shembüpai büpa kü, “Nüngei lakei noshi nyupü meheang?” shei phe. Büpai, “Lenshuoh hük” shei e.

³ Shembüpai, “Hapa kahdokei shükeishuoh” shei e. Hanangkü Mosai ha kahdokei shükshuohteke hatü hapa biü hük lei, hatü büpa hatoueipü mokdai.

⁴ Hahepak kü Shembüpai Mosa kü, “Nüngei laki hapalei mei kü yumtü noei antuh” shei e. Hanangkü Mosai büpalei laki ha kü yumtü noei an, hatü büpalei lakei hapayü shao lenshuoh leidai.

⁵ “Shembüpa, jomei bühipa Kahvang, Abraham Kahvang, Isak Kahvang hatü Jakob Kahvangi nüng touei shakei vamei hupü khih shei Israel ami nyinghen shingvaishi nüngi hapa düktuh” shei Shembüpai eteke.

⁶ Shao Shembüpai Mosa kü, “Nüngei lak ashak mongei thutuh” shei e. Büpai ashak mongei lak thuteke hatü lak aokei veishingkü shüdao kei shoshi ameinyiuei ngomma kohshi nyuteke.

⁷ Hahepak kü Shembüpai, “Shao nüngei lak ashak mongei thutuh” shei e. Hanangkü büpai büpalei lak ashak mongei thuteke, hatü mechem büpai lak aokei ngaipa, büpalei lebü hangshuw kei meidaitü chongjateke.

⁸ Hahepak kü Shembüpai, “Jomi nüng kü nevaijü shongpü yashanyale dou kü hingnelemjema, jomi nyipabü yashanpü dou kü hinglemhen.

⁹ Jomi hapa yashanpü dou lemnyi kao hingnelemjema nevaijü nüngi epü kü nebangjema, nüngi Nile yungyen leipü yung maani yah-ei kahdok van kü haiyeishuoh; hatü nüngi yahpü yungi kahvan shangkü iy leikahen” shei e.

¹⁰ Shejao Mosai Shembüpa kü, “Peihdaipü nyih kü nevaijü shaang nüngi nüng chongphobü kü shah elangmao ngei shah mechemao meishi ne-eaok; mehenangkü ngeiyü shah üngpü hatü youngmü epü shennyak hih” shei e.

¹¹ Hahepak kü Shembüpai büpa kü, “Hangku kü üpai shah ne-e-i nevaijü dhong aangei leitüknya? Üpai mük eehünya hatü mükphüngtüknya? Hapayü ngei, Shembüpa nevaipü je?

¹² Shaang, layaongtuh, nüngi epü kü ngei sheühphahen, hatü nüngi mehe eshuohhen ngei nüng kü nyuhphahen” shei e.

¹³ Shejao Mosai, “Oh Shembüpa, chingmeilemlingei hanei am jeiyei shomtuh” shei e.

¹⁴ Hanangkü Shembüpai Mosa kü mongshih, hatü, “Levi am phang kübü anjei Aaron mekeiang? Büpai shah meishi eaokkahen shei ngei nyingei nyüpeih. Hingmei, shaang büpa nüng mü pongteinüng peikünyüke hatü büpai nüng eejü mongongkahen.

¹⁵ Mehe mehe ehen nüngi büpa kü eyeishuoh; ngei anjiphen kü mehe ehen sheühphahen, hatü anjiphen kü mehe dükhen ngei ephahen.

¹⁶ Büpayü nüng nangjei shah ebü vaihen hatü nüng leimao büpai nanglakthü kü ehen, hatü nüngü Kahvang kei büpai mehe ehen nüngi eshuohhen.

¹⁷ Hapa lenshuoh nüngei lakei notuh; mehenangkü hapa yah-ei nüngi yashanpü douthü dükhen” shei eteke.

Mosa Ijiplei Nyokei Leipü

¹⁸ Hahepak kü Mosai cheko Jethro touei leiyei büpa kü, “Ngei Ijiplei nyupü ngelei nanglakthü shaang thahshi meishi nyülashangkü nyokei leiyei veishah” shei e. Jethro-i Mosa kü, “Meishi leite” shei e.

¹⁹ Mosa Midianei nyushi Shembüpai büpa kü, “Nüng Ijiplei nyokei leituh; mehenangkü nüng jühen yempü shennyakthü peü didaikemteke” shei e.

²⁰ Hanangkü Mosai nyühihathü gadu dok shangkü uohütü Ijip kahdokei lei, hatü Mosai Kahvangei lenshuohao yah-ei leiteke.

²¹ Shao Shembüpai Mosa kü, “Nüng mechem Ijiplei nyokei leihenshang, ngei nüng kü Pharaoh touei dükhen shuohpü yashanpü dou peü düktuh; shejao büpai nanglakthü neleishihhen shingvaishi ngei büpalei mong vaanhühen” shei e.

²² Hahepak kü nüngi Pharaoh kü, “Israel amü ngelei hashongpa shei Shembüpai enyüke” shei etuh.

²³ “Ngei kü khümhen shingvaishi ngelei hashongpa leishihtuh shei ngei nüng kü etepih. Shejao nüngi büpa neleishihpeih; shaang ngei nüngei hashongpa jütükhen shei Pharaoh kü eyeishuoh.”

²⁴ Jom leilemei yanüng paümpü shingei Shembüpai Mosa pong, hatü büpa jütükhen kheteke.

²⁵ Shejao Zipporah-i yaongnah hük yah-ei chehalei shuw japtük hatü ha yah-ei Mosalei la kü honghütü eteke, “Hingmei nüngü iy homei shenteipü ngelei Shembüpa nyüke.”

²⁶ Hanangkü Shembüpai büpa yangteke. “Pinnyüi iy homei shenteipü Shembüpa shei epeyü shuw japtükpü nang eteke.”

²⁷ Shembüpai Aaron kü, “Mosa mü pongteinüng jahpanei daituh” shei e. Hanangkü büpai layaongei daiyei Kahvang kahshangei pongteiyei büpa kü om kü jüpteke.

²⁸ Hahepak kü Mosai Aaron kü Shembüpai mehe ehen nangkü büpa shompa, hatü yashanyalepü douthü büpa kü dükhen Shembüpai kangshuohpü lemphüli ejateke.

²⁹ Hahepak kü Mosa hatü Aaron nyi-i Israel behethü peü nyükei thaihü.

³⁰ Shembüpai Mosa kü eshuohpü shahthü peü Aaroni ejateke hatü nanglakthü tou kü yashanpü douthü dükteke.

³¹ Nanglakthüi hinglem; hatü mechem jomi Shembüpai jom ponghahpü eeyei junghen peipeih shei danpa, jom aümei shaei khümteke.