MÜLANGPÜ 39 - DAÜLANGPÜ LAIHING (BSI)

Ngongpathü Shing Owhiai

¹ Daülangpü Shingei chongpho shingkü owhen shingvaishi jomi thüngla, manghshempü hatü iyshüm kei hakpü ashak yah-ei owhiai meipü thüngteke. Shembüpai Mosa kü eshuohpükei jomi Aaron shing daülangpü owhiai thüngteke.

Doknyü Bhagthuh

² Jomi thüngla, manghshempü hatü iyshüm kei hakpü nyemin ashak hatü hon ow kohpü vi yah-ei doknyü bhagthuh thüngteke.

³ Jomi hon baünyangi pengteke, hatü hapayü lingpüthüi thüngla, manghshempü hatü iyshüm kei hakpü ashak hatü nyemin ashak kü thünghen shingvaishi yangmü yangmü japteke.

⁴ Jomi doknyü bhagthuh kü bhagthuh dhaong lingtü dohpü jung nyi khaaiteiteke.

⁵ Dakei lingpü shünglokü aihük vi yah-ei ling, hatü Shembüpai Mosa kü epükei doknyü bhagthuh kü büm hük kei khaaiyei thüngteke.

⁶ Jomi onyx yaong yah-ei hon shih-ei nyupü kü kham; jomi hathü meishi lahhinei Jakobei chehathü jom anpünyilei men kukei nyang.

⁷ Shembüpai Mosa kü epükei jomi hathü doknyü bhagthuh dhaong kü Israel phang anpünyi nyangeihepü lingei shenteke.

Jaküpnyiam

⁸ Jomi lahhinei jaküpnyiam doknyü bhagthuh kü hon ow, thüngla, manghshempü hatü iyshüm kei hakpü ashak hatü nyemin ashak lingpükei lingteke.

⁹ Hayü bahiyang hükkei shiüteke; nyi anei abshuohjü bahiyang kü centimeter 22 baong nyuteke.

¹⁰ Jomi ha kü douvang yaongthü lüng ali lingei shih. Shongpü lüng kü topaz, khrisolit, hatü emerald;

¹¹ hatü nyipabü lüng kü turquoise, sapphir hatü diamond;

¹² hatü jempabü lüng kü agate, amethist, hatü jakinth;

¹³ hatü alipabü lüng kü beril, onyx hatü jasper shihteke. Jomi hathüyü hon shangkü khamhüteke.

¹⁴ Yaong anpünyi kuk ieyei kü Jakobei chehathü hük hükei men nyangei shiüteke, hatü hapayü Israel am phang anpünyi nyangeihepü huhen shingvaishi nyang.

¹⁵ Jaküpnyiam kü jomi honvü vü kei lepei ling.

¹⁶ Jomi hon shuktang nyi hatü hon bakshang nyi lingtü jaküpnyiam vaungjung nyi kü shenteke.

¹⁷ Jomi jaküpnyiam vaungjung kübü bakshang kü hon nyi,

¹⁸ hatü hükpa nyiamvü jung nyi shuktang nyi kü shenteke, hatü hapakei doknyü bhagthuh dhaong she philei shenteke.

¹⁹ Jomi hon bakshang nyi lingtü jaküpnyiam maiphi mong lemei doknyü bhagthuh mü dhienei ling.

²⁰ Jomi hon bakshang nyi ling, hatü doknyü bhagthuh dhaong nyi kü maiphi shak lemei ashakbaong yopailei dakpü shüngshep dok kü shenteke.

²¹ Shembüpai Mosa kü epükei jomi jaküpnyiam kübü bakshangi doknyü bhagthuh kübü bakshang kü thüngla vü yah-ei shenteke; hanangkü jaküpnyiam shüngshep dok kü nejuwdai-i nyuteke.

Lebü Ngong-owthü

²² Jomi thüngla ashaki doknyü bhagthuh hük mongei thuhhen ling.

²³ Hapa bhagthuh üngkam neshaakhen shingvaishi kaong shonei shepei thüng.

²⁴ Hapa bhagthuh lajung kü thüngla, manghshempü, hatü iyshüm kei hakpü ashaki hatü nyiüktükpü nyemin ashaki pomegranat betjük kei shih-ei ling.

²⁵ Jomi hon lüngha ling, hatü hapa lüngha pomegranat betjük keipü shihpü aa kü bhagthuh jung kü sheüteke;

²⁶ lüngha hük hatü pomegranat betjük keipü hük shei leüteiyei chongpho shingkü owteipü bhagthuh jung kü sheüei Shembüpai Mosa kü epükei lingteke.

²⁷ Jomi Aaron hatü chehathü shingvaishi nyemin ashaki hiuei bhagthuh,

²⁸ hatü nyemin ashaki shangshak, athen hatü shüngthuhshoh,

²⁹ hatü nyemin ashaki bhag-ai, hatü thüngla, manghshempü hatü iyshüm kei hakpü ashak ow shih-ei hiupü Shembüpai Mosa kü epükei lingteke.

³⁰ Jomi daülangpü hon yah-ei chübong kei athen hük ling, hatü ha kü, “Shembüpa kü Daühünyeih” shei kukei nyang.

³¹ Jomi hapa kü thüngla vü hüki sha, hatü Shembüpai Mosa kü epükei shangshak dok kü shateke.

Dou Tempü

³² Hapa keiha ashakshem vepü dou peü tem; Shembüpai Mosa homei epükei Israel ami peü dük.

³³ Jomi Mosa touei ashakshem hatü haleipü dükhi-ümthü, haleipü bakshang, shemtahng yeüpü, pülu, shemnyü hatü pülethü;

³⁴ hatü mi chebaongei shuw hakpüh-i lingpü, hatü jümpü shuw meipü, haenhen ashak;

³⁵ Vangpüshuwpü Pela mü hapalei kenh hatü shaküp;

³⁶ haüdü hatü hapalei dükhi-ümthü, hatü Kahvang kü moilapü aan;

³⁷ daülangpü hon awshong mü ha shangkü awdük hatü hapalei dükhi-ümthü, hatü vangngaihen shingvaishi mainga;

³⁸ hon moidü, phuhen mainga hatü vong meipü ayingshü, hatü ashakshem shaden kü haenhen ashak;

³⁹ melangnyiam moidü hatü hapalei melangnyiam la, hapalei kenh, hatü hapalei dükhi-üm peü; chilimji mü hapalei la;

⁴⁰ chingshelei haenhen ashak, hapalei shemnyüthü, hatü hapalei püle; chingshe shaden kü haenhen ashak, hapalei vüthü, hapalei hanhaung, hatü ashakshemei chongpho shingkü noteihen dükhi-ümthü;

⁴¹ Daülangpü Shingei chongpho shingkü owteihen ow kohpü owhiai, ngongpa Aaron shingvaishi daülangpü owhiai, büpalei chehathüi ngongdou dükshingkü owhen ashakviha kemei yah-ei deijateke.

⁴² Shembüpai Mosa kü epükei Israel ami dou peü dük.

⁴³ Mechem Mosai Shembüpai epükei jomi dou peü dükpü eepa, büpai hathü kü moihimanteke.