MÜLANGPÜ 36 - DAÜLANGPÜ LAIHING (BSI)

¹ Hanangkü Bezalel, Oholiab hatü lahhinpü shennyakthü peü üam kü Shembüpai lahhinlangnyai hatü daülangpü ashakshem vehen kihikon shuoh, hathüi Shembüpai epükei vehen.

² Hahepak kü Mosai Bezalel, Oholiab hatü lahhinpü shennyakthü peü üam kü Shembüpai dükaokhen kon shuoh, hatü üami peiyei dou kü sheühhen deih, hathü kü nyükteke.

³ Israel ami ashakshem vehen shingvaishi moila shuohpü douthü kemei jomi Mosa leipü yahteke. Nanglakthüi nedoh-i nepjeih moila koei peiyei shuoh.

⁴ Hanangkü shem vepü mistrithüi dou tuhphongtü,

⁵ Mosa touei peiyei, “Nanglakthüi Shembüpai epükei dou dükhen mao nyeinya changei aoshi moila koei peikünyüke” shei e.

⁶ Hahepak kü Mosai ngeükhüam hük shuoh, hatü baümtap peülei hapa shah shomei, “Nyüha nevaijü baha üpaiyao ashakshem vehen shingvaishi hajük kü mehe moila-ao teshuoh” shei e. Hanangkü hajük kü nanglakthüi moila koei nepei;

⁷ Mehenangkü jomi mehe koei pei, hapai changei aohen mü nyuteke.

Ashakshem Vepü

⁸ Mistrithü khongkü lahhinpü shennyakthü peüi ashakshem kü haenpü ashak pha an ling; hathüyü nyemin ashak thüngla, manghshempü, hatü iyshüm kei hakpü ashaki nyiükei hathü kü meishi hoiyei cherubim shih-ei lingteke.

⁹ Heanpü ashak ieyei yangkü meter 12, ba kü meter 2 nyuteke; haenpü ashak kemei bahiyang aihük mü yahteke.

¹⁰ Jomi haenpü ashak pha nga hük vaishi hapteiteke, hatü lebü ashak pha nga hük vaishi hapteiteke.

¹¹ Shongpü ashak pha nga hapteipü kü hao leipü ashakjung kü thüngla ashaki vülok lingteke; hapa keiha nyipabü ashak pha nga hapteipü kao hao leipü ashakjung kü vülok shihteke;

¹² Jomi haenpü ashak kü vülok pinyipüan shihteke, hatü nyipabü ashak hapteipü kao ashakjung kü vülok pinyipüan shihteke; vülokthüyü hüki hük dangteishi shihteke.

¹³ Jomi hon shuktang pinyipüan ling, hatü haenpü ashak hüki hük mü khaaiteiteke; hapakei ashakshem hük kei dhaomü ling.

¹⁴ Jomi ashakshem kü jümhen shingvaishi yum mumi ashak pha anpühük ling.

¹⁵ Heanpü ashak ieyei yangkü meter anpüjem, hatü ba kü meter nyi nyuteke; haenpü ashak pha anpühükphen bahiyang hükkei lingteke.

¹⁶ Jomi ashak pha nga yah-ei hük vaishi ling, hatü pha vok yah-ei hük vaishi ling.

¹⁷ Shongpü hapteipü ashak pha hük kü jung leipü ashakjung kü vülok pinyipüan ling, hatü hapakei hükpa hapteipü ashak kü hao leipü ashakjung kü vülok pinyipüan lingteke.

¹⁸ Jomi hapa hapteiyei thüngpü ashak pha nyi khaaiteiyei dhaomü leihen shingvaishi melangnyiami shuktang pinyipüan ling.

¹⁹ Jomi ha kü jümhen nyi, hük kü mishuw hakpüh-i lingtükpü hatü hük kü meipü phaishuw shakdokei jümhen shingvaishi lingteke.

²⁰ Jomi ashakshem akacia pü yah-ei haongei yeüteke.

²¹ Pü yangkü hük kü meter ali, hatü ba kü centimeter pejempüvok shei shihteke.

²² Pü ieyei kü khamteihen shingvaishi jung nyiphen kü kahteke; hapa keiha jomi ashakshem kübü pü peü kü lingteke.

²³ Pehephi shingvaishi jomi pü kukha ling,

²⁴ hatü ngini lingpü hathü phangkü lehen püle pinyi ling; pü ieyei kü nyi baong hatü hapteipü shing ieyei kü hük baong shei lingteke.

²⁵ Lebü philep ashakshem apshaphilep shingvaishi jomi pü kukha,

²⁶ hatü ngini lingpü hathü phangkü lehen püle pinyi pü ieyei kü nyi baong shei lingteke.

²⁷ Jomi ashakshem ngaümphei heshüphi kü pü vok,

²⁸ hatü shuokbaong kü pinyi shei ling.

²⁹ Hapa shuokbaongei haongpü pü nyi-ü la philei laolao, shang philei khaaiteiyei ling, shuokbaong nyi kü shihpü pü nyi-ü hapakei lingteke.

³⁰ Hanangkü pü shet kü ngini lingpü lehen püle anpüvok, pü ieyei kü lehen püle nyi baong lingteke.

³¹ Jomi akacia pü yah-ei ashakshem hük lemei pü nga,

³² hükpa lemei pü nga, hatü pü nga heshüphilep ngaümphei lemei shihhen ling.

³³ Jomi jiam kübü pü jung hük dohpü kübü hük dohpü ngoishi lebü püthü mü hükkeishing bhaoei shangei antü ling.

³⁴ Jomi püthü kü honi jüm, hatü püjung hüki hük yepteihen shingvaishi honi lakdük ling, hatü püthü kü honi jümteke.

³⁵ Jomi thüngla, manghshempü, hatü iyshüm kei hakpü ashaki hatü nyemin ashak nyiükei, ha kü cherubim meishi hoiyei shihtü haenhen ashak ling.

³⁶ Ha haenhen ashak sheühen shingvaishi akacia pü yah-ei shemha ali ling; ha kü honi jüm, hatü hon lakdük shihteke. Hapa püthü kü sheemhen shingvaishi ngini lingpü lehen püle ali lingteke.

³⁷ Jomi ashakshem shaden kü haenhen, thüngla, manghshempü hatü iyshüm kei hakpü ashak, hatü nyiükei lingpü nyemin ashak, nyiameti hoiyei ling,

³⁸ hatü hathü ashak sheühen shemha nga lakdük shihtü lingteke. Jomi shemha shang philei hatü sheemhen phikü honi jüm, hatü ha shemhathü sheemhen melangnyiami lehen püle nga lingteke.