MÜLANGPÜ 35 - DAÜLANGPÜ LAIHING (BSI)

Sabbath Shahkungnyü

¹ Mosai Israel am khong peü thaihütü jom kü, “Hathüyü Shembüpai am kü dükhen shingvaishi kangpü douthü nyüke” shei e.

² Nyih vok ammi dou dükhen, shejao nyih nyetpabü kü am peü daülangpü Sabbath nyiumeiyei Shembüpalei men kü themhen. Üpai ha nyih dou dükhenshang jütükhen.

³ Sabbath nyih kü ammi shemei aw dangkao tejak.

Ashakshem Vehen Shemdou

⁴ Mosai Israel am khong kempü kü, “Shembüpai ha kangnyüke” shei e:

⁵ Ammi mehe ang, ha kübü Shembüpa kü moila kotuh. Üami Shembüpa kü mongongpü moila kohünya, hathüi hon, ngin, melangnyiam,

⁶ nyemin ashak, thüngla ow, manghshempü ow, mimum ashak hakla, yum mum,

⁷ mishuw hakpüh-i lingtükpü, hatü meipü phaishuw, akacia pü,

⁸ awdük shing awyung, nyiohen mainga hatü vong meipü meli,

⁹ hatü onyx yaongthü hatü bhagthuh lalu hatü jaküpnyiam kü shihhen douvang yaongthü moilatuh.

¹⁰ Am khongkü üami lahhinei dou dükaoknya, peiyei,

¹¹ ashakshem hatü hapalei ashak hatü hapa kü jümpü, hapa kü khamteipü, hapalei shemtahng, hapalei pübhang, haleipü shemnyü, hapalei pülu;

¹² pela hatü hapalei kenh, shaküp hatü haenpü ashak;

¹³ haüdü hatü hapalei kenh hatü hapalei douhinangthü peü hatü Kahvang kü moilapü aan;

¹⁴ vangngai shingvaishi awshong hatü awyung;

¹⁵ ayingshü jakhen moidü hatü hapalei kenh, nyiohen mainga hatü vong meipü ayingshü hatü ashakshem shaden kü haenpü ashak;

¹⁶ jakpü moila shuohhen moidü hatü hapa kü melangnyiami jümtü, hapalei kenh hatü haleipü douhinangthü peü, chilimji hatü ha haühen la kohtü;

¹⁷ chingshelei haenhen ashak hatü hapalei shemnyü hatü pübhang, chingshe leipü shaden kü haenhen ashak;

¹⁸ ashakshem hatü chingshe leipü hanhaung hatü shenhen vüthü;

¹⁹ Daülangpü Shingei chongpho shingkü owhen meishi dakpü owhiai, ngongpa Aaron hatü büpalei chehathüi ngongdou dükshingkü owhen owhiaithü Shembüpai epü peü lingtuh.

²⁰ Hapheikü Israel am khong peü Mosa toueipü yanei lüdai,

²¹ hatü üami mongei deih, hatü mongkü thongei peipüthü peü ashakshem vehen hatü hapa leipü douhinangthü hatü ngong-ow linghen Shembüpa kü moila koei peiteke.

²² Nyüha, baha mongpüthü peüi honchü, dhaongchü, anguti hatü honyük, hatü lemphü hondou koei peiyei Shembüpa kü moila shuoh.

²³ Üami thüngla, manghshempü, nevaijü ashak hakla nevaijü nyemin ashak, nevaijü yum mum, mishuw hakpüh-i lingpü nevaijü mohohshuw nyu koei peiteke.

²⁴ Üami ngin nevaijü melangnyiam koei peiyei moila shuohaok, jomi Shembüpa kü moila vaishi shuohteke, hatü üamei dou vaihen mü meipü akacia pü nyu, hayao koei peiteke.

²⁵ Lahhinpü nyühathü peüi jomi lingpü thüngla, manghshempü hatü hakla ashak hatü nyemin ashak koei peiteke.

²⁶ Nyühathü mongpüthü hatü lahhinpüthü peüi yum mumi vi bhawteke.

²⁷ Mübüthüi onyx yaong hatü doknyü bhagthuh hatü jaküpnyiam kü shihhen douvang yaongthü,

²⁸ hatü vangngaihen shingvaishi awyung, nyiohen mainga, hatü vong meipü ayingshü koei peiteke.

²⁹ Israel am nyüha baha peü üamei mongkü Mosai epükei Shembüpalei dou dükhen thongpü pei, Shembüpa kü mongongpü moila koei peiteke.

Bezalel hatü Oholiab

³⁰ Hahepak kü Mosai Israel am kü, “Veituh, Shembüpai Judah am phang kübü Hurlei cheha Uri, Urilei cheha Bezalel jeteke.

³¹ Kahvangi büpa kü mistri dou peü dükaokhen lahhinlangnyai, nahpülangpü kon;

³² lahhinei hon, ngin, hatü nyiamdou,

³³ yaong bhaokei shükei linghen, pü dou hatü lebü mistri dou lemphü dükhen büpalei ngani mahüteke,

³⁴ hatü Dan am phang kübü Ahisamakhei cheha Oholiab nyi kü mih kü nyuhaokhen kon shuohteke.

³⁵ Büpai jijinyi kü yaong shükei lingpüthüi hatü mistrithüi lingpükei hatü ashak thüngla, manghshempü hatü ashak hakla hatü nyemin ashak hoiyei dakpüthü kei dakhen lahhinei dükhen kon shuohteke. Jiji nyiyü lemphü mistri dou kü den ngoiyei manpü nyi nyüke” shei eteke.