MÜLANGPÜ 34 - DAÜLANGPÜ LAIHING (BSI)

Nyipabü Yaongshung Ja

¹ Shembüpai Mosa kü, “Sheleipü yaongshung nyi kei nüngi yaongba nyi lokei yahtuh, hatü nüngi bhaotükpü sheleipü yaongshung nyi kü nyupükei ngei shah nyangphahen.

² Nüngi ha nepnüng dhom mü temtuh hatü Sinai Kahshang shangtaolei ha ngei kü shuohhen aongkei.

³ Nüng mü üpayao müei ne-ankahen hatü kahshangei üpayao te-eehü, hatü hapa kahshang touei mohoh nevaijü mithüi het dangkao tehahhü” shei eteke.

⁴ Hanangkü Mosai sheleipü keiha yaongba nyi lokei Shembüpai büpa kü eshuohpükei hapa yaongba nyi kotü nepnüng dhom mü lomi Sinai Kahshangei aong.

⁵ Shembüpai phum kü yiüei büpa touei yaongtü büpalei daülangpü men, “Shembüpa” shei eteke.

⁶ Hatü Shembüpai büpa shekü, “Shembüpa, Shembüpa, phahjipü hatü shinshangpü Kahvang, mongshih youngmü anpü, hatü bampü hatü monglempü kü den ngoipü.

⁷ Denshem haja haja kü bampü lakshing nyupü; Mang hatü pungpü shaipü mang tükpü, shejao nejiüpü am kü hanghi neshuoh-i netuhpü; Büpai hapeüthü hatü jomei hüpeüthü kü chebü chepai thahpü mang shingvaishi denshem jem ali thahshi hanghihünyeih” shei lenei peiteke.

⁸ Mosai shülangi kahdokei aümei shatü khüm.

⁹ “Oh Shembüpa, nüngi ngei kü monghahjema, Shembüpa, nüng ham mü daikütuh shei khümnyüpeih. Hayü mong vaanpü nanglakthü vailangmao ham pungpü shaipü hatü hamei mang tükshih, hatü nüngei mükjüp yahhen nanglak leihüshih” shei büpai e.

Vangpüshuwpü Ja Lingei Leipü

¹⁰ Hahepak kü Shembüpai, “Ngei am mü vangpüshuwpü hük lingnyüpeih. Kahdok shak kü hatü mepa jat kao chemao mangdükpü yashanyale dou hük ngei nüngei nanglakthü tou kü dükhen, hatü am mü chemi shennyakthü peüi ngei, Shembüpalei dou eehen; mehenangkü ngei am kü nyembenüng dou dükhen.

¹¹ Shinnyih ngei am kü shuohpü shahkungnyü ven bangtuh. Ngei am toueipü Amor am, Kanan am, Hit am, Perizz am, Hiv am, hatü Jebus am changtükhen.

¹² Am daipü kahdokei nyupü shennyakthü mü meheyao vangpüshuwpü nelinghen lituh, hei nevaijema hapai am kü aethitai vaikahen.

¹³ Ammi jomei moidüthü, jomei daülangpü shemnyüthü, hatü jomei Asherah nyüha kahvang lajeithü nihtüktuh” shei e.

¹⁴ “Ammi lebü kahvang mehe kao tekhüm; mehenangkü Shembüpa ngei, üpalei men Mükhühpü nyüpa, hayü mükhühpü Kahvang nyüke.

¹⁵ Ammi hapa kahdok kü nyupü shennyakthü mü meheyao vangpüshuwpü nelinghen; mehenangkü mechem jomi jomei kahvang kü khümhen hatü ha kahvangthü kü jakpü moila shuohhen, jomi am kü nyükhen hatü ha kü moila shuohpü hahying ammi hahhen khih;

¹⁶ hatü ammei hapeüthü shingvaishi jomei yiükhathü yiük yahhen, hatü jomei yiükhathüi jomei kahvang kü khümpai ammei hapeüthüao jomei kahvangthü kü khümdaihen.”

¹⁷ Ammi nyiami kahvang lingei tekhüm.

¹⁸ Ammi daw neshihpü aan mo motuh. Ngei am kü epükei Abib len kü nyih nyet daw neshihpü aan hahhen; mehenangkü Abib len kü am Ijip leipü vamei daipeih.

¹⁹ Shongei bühpü yeshang, hatü shongei shaanpü haümyem baonghathü kemei ngelei.

²⁰ Shongei shaanpü gadu chehayü mi jüei moilatü angei leituh. Hapakei angei neleijema, hapalei üng mangtüktuh. Shongei bühpü yeshangthüao angei leituh. Üpaiyao ngei touei moila neko-i lakkong tepei.

²¹ Nyih vok thahshi ammi dou dükhen; nyih nyetpabü kü ammi han hokpü hepak vaijao, hahvet hepak vaijao dou tedük.

²² Ammi shongei menpü wheat hah vetshingkü hatü betjük thaikemei bang aongshingkü Hahvet Mo motuh.

²³ Vangbong kü jempa bahathü kemei Shembüpa Kahvang, Israel amei Kahvang touei khümnüng peikei.

²⁴ Mehenangkü ngei am shekü jatthü changtükhen, hatü ammei kahmük viong dahühen; Shembüpa, ammei Kahvang kü khümnüng vangbong kü jempa daishingkü üamiyao ammei kahmük kü mük nehühhen.

²⁵ Ammi ngei kü iy-i jakpü moila mü daw shihpü moila meheyao teshuoh, hatü Hompü Mo kü shuohpü moila meheyao nepnüng thahshi aoei tetuh.

²⁶ Ammei kah kübü shongpü betjük peü mü meipüba Shembüpa, ammei Kahvangei shemei koei peikei. “Ammi yum cheha chenyülei amma mü techeü.”

²⁷ Shembüpai Mosa kü, “Ha shahthü nyangtuh; mehenangkü ha shahthü aimü ngei nüng hatü Israel nanglakthü mü vangpüshuwpü lingpeih” shei eteke.

²⁸ Mosai nehahneyingi hatouei Shembüpa mü nyih pinyi ya pinyi nyu, hatü büpai yaongshung kü vangpüshuwpü shahthü, Shahkungnyü An nyangteke.

Mosalei Dhe Müknyinshi Nyapü

²⁹ Mechem Mosai Sinai Kahshang leipü vangpüshuwpü shahkung yaongshung nyi notü leipa, büpai Shembüpa mü shah eteipü nangkü büpalei dhe müknyinshi nyapeih shei büpai nenying.

³⁰ Mechem Aaron hatü Israel ami Mosalei dhe nyapü eepa, jomi büpa yopailei heihhen nyem.

³¹ Shejao Mosai jom kü nyük, hatü Aaron hatü Israel am mübüthü peü büpa touei pei, hatü Mosai jom kü eteke.

³² Hapheikü Israel am peü büpa yopailei pei, hatü Mosai büpa kü Sinai Kahshangei yahshuohpü shahkungnyüthü peü jom kü shuoh.

³³ Mechem Mosai jom kü shah eyei kempa, büpai dhe kü ashaki jümlang.

³⁴ Shejao mechem Mosai Shembüpa mü eteihen shingvaishi büpa touei peipa, büpai vamei mangdai thahshi dhe kü jümpü ashak nyiuktükteke, hatü mechem büpa vamei daihen, büpa kü mehe eshuohpa ha Israel am kü eteke.

³⁵ Israel ami Mosalei dhe nyapü ee, hatü Mosai shao Shembüpa mü eteinüng mangdai thahshi ashaki büpalei dhe kü jümlang.