MÜLANGPÜ 30 - DAÜLANGPÜ LAIHING (BSI)

Ayingshü Jakpü Moidü

¹ Ayingshü jakei moilahen shingvaishi akacia pü yah-ei moidü hük lingtuh.

² Hapayü yang kü centimeter 45, ba kü centimeter 45 hatü shaopü kü centimeter 90 hatü hapalei vaung ha kü kohshi lingtuh.

³ Daülangpü hon yah-ei shophilei hapa shing ali peü kü shinei, hapakei vaung kü shihtuh, hatü hapalei kaong kü honi shinei shihtuh.

⁴ Ha kü hon bakshang nyi honi shaoktü kaong dangpong phangei hapa paihen pü shühen shingvaishi lingtuh.

⁵ Paihen shingvaishi akacia pü yah-ei honi jümtü lingtuh.

⁶ Vangpüshuwpü Pela touei haenpü ashak haolei hapa moidü haütuh; halei ngei am mü pongteihen.

⁷ Nepjeih, mechem Aaroni awdük haphen peihenshang, büpai hapa moidü shangkü vong meipü ayingshü jakhen.

⁸ Om kü mechem Aaroni awdük jakhenshang, büpai düngei Shembüpa tou kü hüdenhalenshi nyuhen shingvaishi ayingshü jakhen.

⁹ Ammi hapa moidü kü nedaüpü shie büpü nevaijü jakpü moila nevaijü hahying moila meheyao teshuoh, hatü hapa kü ammi yiü moila techei.

¹⁰ Vangbong kü chem Aaroni hapa moidü mang moila shuohpü yemhalei iy langei daühühen. Ammei hühiha den kemei hapa moila shuohpü iy yah-ei vangbong kü chem büpai hapa dükhen. Hapayü Shembüpa tou kü longi daülangpü nyuhen.

Angei Leipü Lop

¹¹ Hahepak kü Shembüpai Mosa kü,

¹² “Mechem nüngi Israel nanglakthülei men shühen shingvaishi shangkuk iehenshang, shangkuk ieshingkü jom kü meheyao shanghah nepeihen shingvaishi peüi laophülei yangnyu lat ngei kü moilatuh” shei eteke.

¹³ Men shüpü peüi phopshemei dokteipü dok kü dokei Shembüpa kü shuohtuh.

¹⁴ Üami shangkuk iepü kü men shüei nyu, vangbong kukha hatü ha dok kübü peüi Shembüpa kü ha moila shuohtuh.

¹⁵ Laophülei yangnyu shingvaishi hapa moila shuohshingkü shemmeithüi nyeishi hatü taopathüi komshi neshuohhen.

¹⁶ Hapa lop Israel am leipü thaituh, hatü ashakshem dousho shingvaishi noteituh. Shembüpa tou kü hapayü Israel ami jomei yangnyu shingvaishi shuohpü lat shei deih-ei danghen.

Lakhila Phuhen Chilimji

¹⁷ Shembüpai Mosa kü,

¹⁸ “Lakhila phuhen shingvaishi melangnyiami la shihtü melangnyiam chilimji hük nüngi shüktuh. Ashakshem hatü moidü nyi aa kü haütuh, hatü ha kü yung shihtuh.

¹⁹ Hapa leipü yung kü Aaron hatü chehathüi jomei lakhila phuhen.

²⁰ Mechem Aaron hatü chehathüi ashakshemei nevaijü moidü touei aw kü jakei moila shuohhen shingvaishi peihenshang, jom nedihen shingvaishi jomi lakhila phuhen vongbong.

²¹ Jom nedihen shingvaishi jomi jomei lakhila phutükhen vongbong. Ngoikahen hühiha den kemei kü hapayü Aaron hatü chehathü shingvaishi noteihen shahkungnyü nyüke” shei eteke.

Phuhen Mainga

²² Hahepak kü Shembüpai Mosa kü,

²³ “Vong meipü hathü douthü yahtuh: Vong büpü myrrh meli dok vok, vong büpü cinnamon meli dok jem, vong büpü cane meli dok jem,

²⁴ vong büpü cassia meli dok vok phopshemei dokteipü dok aimü, hatü olive mainga dok hük yahtuh.

²⁵ Hathü yah-ei nüngi vong meipü meli phuhen shingvaishi meli lingpü ami lingpülei daülangi lingtuh; hapayü phuhen daülangpü mainga vaihen.

²⁶ Hapayü ashakshem kü Vangpüshuwpü Pela,

²⁷ haüdü hatü haleipü douthü, ayingshü jakpü moidü,

²⁸ moila jakpü moidü hatü hapa leipü dükhi-üm hatü chilimji daühen shingvaishi noteituh.

²⁹ Hathü daülangi leihen shingvaishi nüngi hathü daütüktuh, hatü lemhüki-üng ha kü hongjema daülangi leidaihen.

³⁰ Ngelei dousho kü ngongdou dükei chongphohen shingvaishi nüngi Aaron hatü chehathü thiteiphuei daütüktuh.

³¹ Nüngi Israel am kü, ‘Ngoikahen hühiha den kemei kü hapayü ngelei phuhen mainga vaihen shei eyeishuoh.’

³² Hapa jiüjiü shennyakei büm kü tephu, hatü hapa keipü aihük meli teling. Hapayü daülangpü, hatü hapa daülangshemsheyei ammi noteituh.

³³ Üpai hapa keipü vong büpü meli linghen, hatü ngongpa nevaipü kü lebü mih kü nyiohenshang, hapa shennyakü laophülei nanglak khong kübü katitükhen” shei eteke.

Vong Büpü Meli

³⁴ Shembüpai Mosa kü, “Vong büpü melithü: stacte, onekha, galbanum hatü ayingshü hükkeikei yahtuh,

³⁵ hatü vong büpü meli lingbüi lingpükei vong meipü meli lingtuh. Daüdaihen hatü daülangi leihen shingvaishi hüm shihtuh.

³⁶ Ha hanei yah-ei khih mü ngümtuh, hatü hapa ashakshemei yah-ei peiyei Vangpüshuwpü Pela touei haiyeishuoh, halei ngei am mü ponghen, hatü ha am shingvaishi daülangpü nyukahen.

³⁷ Ammi am shingvaishi hapa aihük mü mehe meliyao teling; hapayü Shembüpa tou kü daülangpü dou shei deihtuh.

³⁸ Üpai hapa aihük mü vong meipü meli lingei noteihenshang, büpa laophülei nanglak khong kübü katitükhen” shei eteke.