MÜLANGPÜ 29 - DAÜLANGPÜ LAIHING (BSI)

Aaron hi Chehathü Ngong Vaihen Jehen Vanglem

¹ Jomi ngei kü ngongdou dükhen shingvaishi jom daühen shaang nüngi ha düktuh. Kawhikang neshiüpü mohoh chebaongha hük hatü mi cheha nyi,

² hatü daw neshihpü hahying, daw neshihpü aan olive mainga mü baünyangpü aan yahtuh. Nüngi hathüyü meipü wheat aung yah-ei lingtuh.

³ Nüngi hathüyü mühdow kü shihtü yah-ei peikei, hatü mohoh chebaongha hatü mi cheha nyi yah-ei peikei.

⁴ Aaron hatü chehathü ashakshem shadenei deituh hatü hangha lakhütuh,

⁵ hatü nüngi ha ngong-ow yah-ei Aaron kü hoipü bhagthuh hatü doknyü bhagthuh, jaküpnyiam hatü shüngshep yah-ei owhütuh.

⁶ Nüngi büpalei shangjing kü shangshak shakeishuoh, hatü shangshak kü daülangpü hon ow, “Shembüpa kü Daühünyeih” shei nyangpü khameishuoh.

⁷ Nüngi nyiohen mainga yahtuh, hatü ha büpalei shangjing kü langei thiteiphutuh.

⁸ Nüngi büpalei chehathü müei deiyei bhagthuh thuh-eishuoh;

⁹ hatü jom kü shüngshep shepeishuoh, hatü jomei shangjing kü athen theneishuoh. Hapa keiha nüngi Aaron hatü chehathü thiteiphuhen. Jom hatü jomei hühihathü thahshi denden kü jomi ngei kü ngongdou dükei chongphohen.

¹⁰ Nüngi mohohbaong ashakshem shemshelei deikei. Aaron hatü chehathüi mohoh shangjing kü laki dükhütuh,

¹¹ hatü nüngi hapa mohoh ashakshem shadenei Shembüpa touei jütuh,

¹² hatü hapa mohoh iy hanei yah-ei nüngei lakjaangi hingtü moidü leipü vaung kü nyioeishuoh, hatü aopü iy peü moidü tüngei langeishuoh.

¹³ Nüngi thenleimongphang kü jümpü cheü, hatü then kü khapü, hatü she nyi mü haleipü cheü peü yahtuh, hatü ngei kü jakpü moila shuohtuh.

¹⁴ Shejao nüngi mohoh phai, leihilang, shuw yah-ei baümtap haoei daiyei jaktuh; hapayü mang moila nyüke.

¹⁵ Nüngi mi nyi khongkü hük yahtuh, hatü Aaron hatü chehathüi mi shangjing kü laki dükhütuh,

¹⁶ hatü nüngi mi jütuh, hatü hapalei iy yah-ei moidü shinei shing peülei haiyeishuoh.

¹⁷ Hatü nüngi miyü khih mü nih-ei dehtuh, hatü thenleimongphang hatü la peü paütüktuh, hatü hathü shangjing mü lebü heanlemao haütuh.

¹⁸ Mi büm kemei moidü shangei jakei moila shuohtuh; hapayü Shembüpa kü jakpü moila nyüke; hapayü Shembüpa kü vong meipü aw kü jakpü moila shuohpü nyüke.

¹⁹ Nüngi hükpa mi yahtuh; Aaron hatü chehathüi mi shangjing kü jomei laki dükhütuh,

²⁰ hatü nüngi mi jütuh, hatü hapalei iy hanei yah-ei Aaron hatü chehathülei lakdahphi dhongshü kü, hatü jomei lakdahphi lakphiennyü kü, hatü jomei ladahphi laphiennyü kü nyioeishuoh. Aopü iy kemei moidülei haiyeishuoh.

²¹ Hapheikü nüngi moidü leipü iy maani, hatü nyiohen mainga maani yah-ei Aaron hatü chehathülei owhiai kü haiyeishuoh; shejüang büpa hatü chehathülei owhiai daülangi leidaihen.

²² Nüngi hapa mi cheü, mei kübü cheü, thenleimongphang kü khapü cheü, then kü khapü cheü, she nyi mü haleipü cheü hatü shüngdahphi yahtuh.

²³ Shembüpa touei haüpü daw neshihpü aan mühdow leipü aan hük, mainga kü hingpü aan hük, hatü baünyangpü aan yahtuh;

²⁴ hatü nüngi hathü kemei yah-ei Aaron hatü chehathülei lakbha kü haüeishuoh, hatü jomi Shembüpa touei hayaoha moila kei shuohhütuh.

²⁵ Hatü nüngi jomei lak leipü hapa yah-ei Shembüpa touei vong meipü vamhühen shingvaishi jakpü moila mü moidü shangei haütü jaktuh; hapayü Shembüpa kü vong meipü aw kü jakpü moila nyüke.

²⁶ Hapa milei amma yahtuh hatü Shembüpa kü hayaoha moila kei daühütuh, hatü hapa phaihanü nüngei vaihen.

²⁷ Aaron hatü chehathü daühen shingvaishi jüpü milei amma hatü shüng nüngi daühütuh hatü ha Aaron hatü chehathü shing tuhtuh.

²⁸ Hapayü Aaron hatü chehathü shingvaishi düngei Israel ammei phaihan nyukahen. Hapayü Israel ammi Shembüpa kü jomei mongjempü moila kübü shuohpü nyukahen.

²⁹ Aaronei ngong-owthü kemei büpa pheikü chehathü kü shuohhen; jom ngong vaihen jeshingkü hapa owhen vongbong.

³⁰ Aaron kü jeipü büpalei cheha üpai ashakshemei Daülangpü Shingei ngei kü chongphohen shünya, büpai hapa ngong-ow nyih nyet owhütuh.

³¹ Aaron hatü chehathüi daüpü mi yah-ei Daülangpü Shingei hapa phai cheütuh.

³² Ashakshem shadenei Aaron hatü chehathü hapa mi phai hatü mühdow leipü hapa aan hahhen shuohtuh.

³³ Jomei mang tükhen hatü jom daühüpü hahying jom moni hahhen, shejao lebü üpaiyao ha nehahhen; mehenangkü hapayü daülangpü nyüke.

³⁴ Phai nevaijü aan nepnüng dhom thahshi nehahkemi aojema, ha aopeyü aw kü jaktüktuh; ha nehahhen vongbong; mehenangkü hayü daülangpü nyüke.

³⁵ Ngei nüng kü epükei nyih nyet kü Aaron hatü chehathü daüei temtuh.

³⁶ Nyihjeih mang tükhen shingvaishi mang moila mohohbaong hük hük moilatuh. Shao mang moila shuoh-ei moidüao daühütuh, hatü hapa daühen olive mainga-i thiteiphutuh.

³⁷ Nyih nyet moidülei mang moila shuohtuh, hatü ha daühütuh, hatü moidü nyeinya daülangi leihen; moidü kü hongpü lemphüli daülangi leidaihen.

Nyihjeih Moila

³⁸ Hapa keiha nyihjeih ammi moidülei moilahen vongbong: Vangbong hük lompü mi nyi nyihjeih moilatuh.

³⁹ Mi hük dhom mü moilahen, hatü mi hük om kü moilahen.

⁴⁰ Shongpü mi mü wheat aung dok hük mü olive mainga dok hük mü nyettü moilatuh. Yiü moila dok hük ha kü shihtuh.

⁴¹ Hükpa mi om mü moilatuh, hatü dhom mü shuohpükei wheat aung, olive mainga, hatü yiü moila shuohtuh. Hapayü Shembüpa kü vong meipü aw kü jakei shuohpü moila nyüke.

⁴² Hapayü hüdenhalenshi hepak peü kü ashakshem shadenei hapa jakpü moila shuohtuh.

⁴³ Halei ngei am mü pongteihen, hatü ngelei müknyinshekhangi hapa shing daülangi leihühen.

⁴⁴ Ngei ashakshem hatü moidü daütükhen, Aaron hatü chehathüiyao ngei kü ngongpathü vaishi chongphohen shingvaishi ngei jom daütükhen.

⁴⁵ Ngei Israel am khong mü nyuhen hatü ngei jomei Kahvang vaihen.

⁴⁶ Ngeiyü jom mü nyuhen shingvaishi Ijip kahdok leipü jom müei leipü Shembüpa, jomei Kahvang shei jomi nyinghen; ngeiyü Shembüpa, jomei Kahvang nyüke.