MÜLANGPÜ 28 - DAÜLANGPÜ LAIHING (BSI)

Ngongpalei Owhiai

¹ Israel am khong kübü ngei shing ngongdou dükhen shingvaishi anjei Aaron hatü chehathü Nadab, Abihu, Eleazar, hatü Ithamar hathü nyükei nüng touei peihütuh.

² Anjei Aaron kü dhüm kohshi, nethe meishi eehen shingvaishi ngong-ow temtuh.

³ Üam kü hapa dükaokhen lahhinlangnyai hean ngei shuohtepa, hathü shennyak peü nüngi nyüktuh hatü Aaronei ashak thünghütuh; ngei kü ngongpa hük vaishi chongphohen shingvaishi ngei hathü daütükhen.

⁴ Jomi linghen owhiai hathü nyüke: Jaküpnyiam, lalu bhagthuh hük, doknyü bhagthuh hük, hiupü bhagthuh hük, shangshak hük hatü shüngshep hük shei lingtuh. Anjei Aaron hatü chehathüi ngei kü ngongdou dükhen shingvaishi jomi hathü ow linghen,

⁵ jomi hon, thüngla, manghshempü, iyshüm kei hakpü ashak, hatü nyemin ashak owhen vongbong.

⁶ Jomi hon, thüngla, manghshempü, iyshüm kei hakpü ashak hatü nyemin ashaki doknyü bhagthuh meishi hiuei ow shih-ei linghen vongbong.

⁷ Ha chemi khaai-aokhen shangmü dohpü jung nyi kü hapei bhagthuh dhaong nyi nyuhen vongbong.

⁸ Meishi hiuei lingpü shüngshepü doknyü bhagthuh mü shepei hon, thüngla, manghshempü hatü iyshüm kei hakpü ow hatü nyiükei lingpü nyemin ashak yahhen vongbong.

⁹ Onyx yaong nyi kü Jakobei chehathülei men kukei nyangtuh;

¹⁰ yaong hük kü jom vokei men, yaong hükpa kü aopü jom vokei men jom bühpü aimü nyangtuh.

¹¹ Lahhinei hapa douvang yaong kukei Jakobei chehathülei men nyangaokhen shennyak yemtuh, hatü hapayü hon vaüptü haongtuh.

¹² Israel phang anpünyi lappü huei hapa yaong nyi yah-ei doknyü bhagthuh kü shihtuh, hatü deih-ei danghen shingvaishi Shembüpa touei Aaroni jomei menthü büpalei bhagchongei shahen.

¹³ Ammi hon bhaok nyi lingtuh,

¹⁴ hatü vü kei lepei daülangpü hon monhai vü nyi lingtuh, hatü ha vü keipü honü hon bhaok nyi kü shentuh.

¹⁵ Shahphenhen shingvaishi am jaküpnyiam lahhinei lingtuh; doknyü bhagthuh kei hon, thüngla, manghshempü hatü iyshüm kei hakpü ashak hatü nyiükei lingpü nyemin ashaki lingtuh.

¹⁶ Hapayü bahiyang hükkei, hatü nyi abei yang kü lakkham hük, hatü ba kü lakkham hük lingtuh.

¹⁷ Hapa kü douvang yaong lüng ali shihtuh; shongpü lüng kü topaz, khrisolit, hatü emerald;

¹⁸ nyipabü lüng kü turquoise, sapphir hatü diamond;

¹⁹ jempabü lüng kü agate, amethist, hatü jakinth;

²⁰ hatü alipabü lüng kü beril, onyx, hatü jasper shei shihtuh.

²¹ Hapa yaong anpünyi kuk ieyei kü Israel phang anpünyi lappü huhen shangmü Jakobei chehathülei men hükbaong kü kukei nyangtuh.

²² Jaküpnyiam shing daülangpü hon yah-ei vü kei lepei honvü lingtuh.

²³ Hon yah-ei bakshang nyi lingtü jaküpnyiam dokphi vaungjung nyi kü shihtuh,

²⁴ hatü hapa hon bakshang nyi kü vü kei leppü honvü shentuh.

²⁵ Vü nyilei vüjung hon bhaok kü shentuh; hapa keiha doknyü bhagthuh dhaong kü shentuh.

²⁶ Hon bakshang nyi lingtuh hatü doknyü bhagthuh phi kübü jaküpnyiam mongphi leipü vaungjung nyi kü shentuh.

²⁷ Shao hon bakshang nyi lingtuh, hatü hapa doknyü bhagthuh mailem shesha philei ashak baong kü hatü shüngshep dok kü khaaihütuh.

²⁸ Vü thüngla yah-ei jaküpnyiam leipü bakshangi doknyü bhagthuh leipü bakshang nyi shenteituh; hapai jaküpnyiam shüngshep shangkü nyuhen hatü hapa nedhaodaihen.

²⁹ Mechem Aaroni Daülangpü Shingei shühen, ngei, Shembüpai düngei ngelei nanglakthü deihhen shingvaishi büpai hapa jaküpnyiam kü Israel am phang men nyangpü owhen.

³⁰ Jaküpnyiam kü Urim hatü Thummim shihtuh; hapa keiha mechem Aaroni ngelei Daülangpü Shingei shühenshang, büpai ha yah-ei shühen. Hapakei shejüang büpai Shembüpa tou kü Israel nanglakthü shing shahphen shuoh-aokhen.

Ngongpalei Lebü Owhiaithü

³¹ Doknyü bhagthuh phangkü thuhhen bhagthuh-ü thüngla ashaki thüngtuh.

³² Hapa kü shangjing shühen sha kohshi lingtuh, hatü ha ashak kaong shonpü kü neshakdaihen shingvaishi meishi hoiyei lingtuh.

³³ Bhagthuh jung maiphilei thüngla, manghshempü, hatü iyshüm kei hakpü ow yah-ei pomegranat betjük kei lingtuh; ashakjung maiphi kemei kü hon lüngha shinei shihtuh;

³⁴ hon lüngha hatü pomegranat betjük keipü nyi lükteiyei bhagthuh jung maiphi kü shinei shihtuh.

³⁵ Ngongdou dükshingkü Aaroni hapa owhen, hatü mechem büpa Shembüpa touei Daülangpü Shingei shühen, hatü vamhen, hapalei ngeü danhen, hatü büpa nejütükhen.

³⁶ Daülangpü hon yah-ei ow hük lingtuh, hatü hapayü füoshang kei, “Shembüpa kü Daühünyeih” shei kukei nyangtuh.

³⁷ Hatü hapa yah-ei shangshak shesha philei vü thüngla yah-ei shentuh.

³⁸ Hapayü Aaronei shangba shangkü nyuhen, shejüang nanglakthüi moila koshingkü thahpü mang hanei nyulangmao Israel ami ngei kü shuohpü moila peü ngei, Shembüpai yahhen.

³⁹ Meipü nyemin ashak yah-ei Aaronei bhagthuh hük, shangshak hük thüngtuh, hatü shüngshep hük ow meishi hoiyei shihtü lingtuh.

⁴⁰ Aaronei hapeüthü shingvaishi bhagthuh, shüngshep hatü athen lingtuh; jom dhüm kohshi nethe meishi lingtuh.

⁴¹ Hathü owhiai anjei Aaron hatü chehathü kü oweishuoh, hatü jomi ngei kü ngongpathü vaishi chongphohen shingvaishi lanei shuoh-ei mainga-i nyioei daühütuh.

⁴² Jomei bümkong nehuhen shingvaishi shüng kübü lashüh thahshi nyemin ashaki mongei thuhhen shüngthuh thüngtuh.

⁴³ Mechem Aaron hatü chehathüi ashakshemei shühenshang jomi hapa owhen, nevaijü Daülangpü Shingei chongphohen moidü yopailei peishingkü ha owtuh, shejüang jom kü mang nehethen hatü jom nedihen. Hapayü Aaron hatü büpalei hühihathü shingvaishi düngeipü shing shahkung nyukahen.