MÜLANGPÜ 25 - DAÜLANGPÜ LAIHING (BSI)

Ashakshem Shing Moila

¹ Shembüpai Mosa kü eteke,

² Ngei kü moila koei peikei shei Israel am kü eyeishuoh. Shennyak üami mongkü shuohhen monghumnya, nüngi ngei shing ha thaituh.

³ Nüngi jom leipü ha moilathü yahtuh: hon, ngin, hatü melangnyiam,

⁴ thüngshingpü, manghshempü hatü iyshüm kei hakpü ashak hatü nyemin ashak, yumha mum,

⁵ hakpüh-i lingtükpü mishuw, meipü phaishuw, akacia pü;

⁶ aw jakhen awyung, nyiohen shingvaishi mainga hatü vong meipü ayingshü;

⁷ ngongchongei ow kü hatü jaküpnyiam kü shihhen onyx yaong,

⁸ hathü yah-ei ngei jom mü nyuhen shingvaishi daülangpü shing hük lingshih.

⁹ Ngei mekei am kü ashakshem hatü haleipü douhinang nangkü hupa, hapakei vehen vongbong.

¹⁰ Jomi akacia pü yah-ei pela hük yangkü meter 110 ba kü meter 66 hatü shaopü kü meter 66 shei linghütuh.

¹¹ Ha kü shakhimong kü honi shaokhütuh hatü hapa kaong shonei honi ngeihhütuh.

¹² Hon yah-ei bakshang ali lingtuh hatü hapalei la ali kü nyeanei hük lemei bakshang nyi, phihük lemei bakshang nyi shei lingtuh.

¹³ Akacia pü yah-ei hapa paihen kenh nyi lingtuh hatü ha honi jümtüktuh,

¹⁴ hatü hapa pela dangpong kübü hon bakshang kü shütuh.

¹⁵ Hapa kenh pela leipü bakshang kü hüshi tuhtuh shejao laüh-ei teyah.

¹⁶ Ammi hapa pela kü ngei am kü yahphahen shahkungnyü yaongshung hütuh.

¹⁷ Daülangpü honi mon shaküp hük yangkü meter 110 hatü ba kü meter 66 shei lingtuh.

¹⁸ Hapa shaküp jungpongei kaoklaki dhüngei meishi shükei honi cherubim nyi lingtuh.

¹⁹ Dangpong dohpü philei cherub hükbaong shaküp mü phaakei lingtuh.

²⁰ Hapa cherubim nyi yang paanei shanglemei anpai shaküp kü bhüshi lingtuh. Ha cherubim nyi dhe dhe khangteiyei shaküp kü thaungei veishi lingtuh.

²¹ Ammi hapa shaküp pela shangkü küptuh; hatü hapa pela mongei ngei am kü shuohhen vangpüshuwpü yaongshung hütuh.

²² Halei ngei am mü pongteihen, hatü shaküp shangkü cherubim nyi aa kü Israel nanglakthü shingvaishi ngei ngelei shahkungnyü yahphahen.

Moila Aan Haühen Haüdü

²³ Akacia pü yah-ei yangkü meter 88, ba kü meter 44 hatü shaopü kü meter 66 shei haüdü hük lingtuh.

²⁴ Hapayü honi shaoktuh hatü kaong kü honi shinei shihtuh.

²⁵ Ammi ba kü millimeter 75 hapa shonei kharila hük lingtuh, hatü hapa shinei honi shaokei lingtuh.

²⁶ Ammi hapa kü bakshang ali lingtuh, hatü vaungjung ali kübü la kü shentuh.

²⁷ Haüdü paihen kenh shüpü bakshangü kharila yopailei shihtuh.

²⁸ Ammi kenh-ü akacia pü yah-ei lingtuh, hatü hapa honi shaokei lingtuh hatü haüdü-ü hathü mü koei daihen.

²⁹ Daülangpü hon yah-ei ayingshü jakhen shingvaishi nükshungthü hatü yiü moila shihhen pati, yiüdük, hatü chilimji lingtuh.

³⁰ Hapa haüdü-ü Vangpüshuwpü Pela touei haütuh, hatü hapa haüdü kü düngei ngei kü moilapü aan shih-ei tuhtuh.

Awshong

³¹ Hon monhai awshong hük lingtuh. Hapa awshongei shaong hatü awshong bümnyü-ü kaoklaki dhüngei shükei lingtuh; hapalei patithü, chüjümlak, hatü chübong hatü chüyei peü hapa mü büm hük mon vaishi lingtuh.

³² Hapayü awdük shemshing bümnyü kü kao vok dangpongei jem baong; hük lemei jem, phihük lemei jem shei phaakei lingtuh.

³³ Kao vokphen kü almond chübong kei, hapa mü chüjümlak, hatü chübong shih-ei lingtuh.

³⁴ Awdük shemshing bümnyü kü almond chübong kei ali chüjümlak, hatü chübonglak kohshi lingtuh.

³⁵ Kao jem jem ieyei kü hapa phangei chübonglak hükbaong shihtuh.

³⁶ Chüthü, awdük shemshing kao phaakpüthü hatü awdük shemshingthüyü laolao nevai, shejao hon yah-ei büm hük vaishi shükei lingtuh.

³⁷ Awdük shemshing kü awjük nyet lingtuh hatü hapa shinpü kü vangngai shuohhen shingvaishi aw bahtü shemtuh.

³⁸ Hapalei awdük phita, nükshungü honi mon lingtuh.

³⁹ Awdük shemshing hatü hapalei douhinang linghen shingvaishi hon dok hapüanpünga yah-ei lingtuh.

⁴⁰ Ngei am kü kahshangei hapa mekei linghen hupa, hapakei linghen kentuh.