MÜLANGPÜ 23 - DAÜLANGPÜ LAIHING (BSI)

Shahhing Shahkung hatü Bampü

¹ Ammi shahshem baongeiyaüei te-e. Pungpü shennyak kü ammi shahshem denpü shuoh-ei büpa dah teshakhü.

² Nejiüpü dou dükhen nüngi khongnyü phei temü; ammi shahphen shingei mechem denpü shuohhen, shahhingi shahshem leitükpü khong phei temü.

³ Shahphen shingei ammi taopa kü baong hanei teno.

⁴ Ammi vepalei mohoh nevaijü gadu vü phenei lüdaipü eejü hapa müei leiyeishuoh.

⁵ Am kü jiühitpü shennyakei gadu hanggo-i chettü eejü ammi ha phukei yaonghütuh; veitü peih-ei tedai.

⁶ Shahphen shingei ammi taopathü kü dah-i nyong teleihü.

⁷ Ammi shahshemi mih tevüshih; ammi mang neshiüpü nevaijü daülangpü shennyak tejü; mehenangkü ngei henüng mang netükpih.

⁸ Ammi yawhdou teyah; mehenangkü yawhdoui shahhing nyongnyongi leitüktü shennyakthülei mük phüngtüknyeih.

⁹ Ammi benha kü tenaam; benha hüki mekei deihnya, ammi nying; mehenangkü amao Ijip kahdokei benha vaiyei nyuhampeih.

Sabbath Shahkungnyü

¹⁰ Vangbong vok thahshi ammi kah lingtuh hatü halei vampü peü thaituh.

¹¹ Shejao vangbong nyetpabü kü kah nelingi tuhtuh hatü halei vampü meheyao teyah. Halei vampü taopathüi hahhen hatü jomi aophongpü phaüyemi hahhen. Hapa keiha ammi ammei nyalingngupai kah hatü olive püthü kao düktuh.

¹² Nyih vok ammei dou dükhahtuh, shejao nyih nyetpabü kü ammei mohoh hatü gadu ngü leihen, hatü am shemei bühpü aa hatü benhapa nyiumeihen shingvaishi dou nedüki nyiumeihütuh.

¹³ Ngei am kü epü lemphüli kenhingei bangtuh. Ammi lebü kahvang kü tephop; ammei ju kübü ha jung epü tedanhü.

Mo Longpü Jem

¹⁴ Vangbong kü jempa ammi ngei kü dhüm shuoh-ei mo mohen.

¹⁵ Ngei am kü epükei am Ijip tuhtü daipü Abib len kü daw neshihpü aan mo motuh; mehenangkü nyih nyet mongkü ammi daw neshihpü aan mo hahtuh. Ngei touei moila neshiüi üpaiyao lakkong tepeikei.

¹⁶ Ammei kah kü sheipü shongpü betjük vetei ammi Hatvet Mo motuh. Ammi kah kü sheipü betjük thailangkempheikü vangbong dohpülei Bang Mo motuh.

¹⁷ Vangbong kü jempa am bahathü kemei ngei, Shembüpa Kahvang touei khümhen peikei.

¹⁸ Ammi ngei kü jakpü moila shuohshingkü daw shihpü meheyao omshi teshuoh; nevaijü mo hepak kü ngei kü shuohpü cheü meheyao nepphei thahshi aoei tetuh.

¹⁹ Shembüpa, ammei Kahvangei shemei ammei lak kübü vampü shongpü betjük meipü moila deikei. Ammi mi nevaijü yum cheha chenyülei amma mü techeü.

Kananei Shühen Shingvaishi Lahpü hatü Shahkung

²⁰ Ngei am shingvaishi tempü shingei müei daishingkü lemei am yomhen shingvaishi ngei am shekü vangsho phongshan hük shomphahen.

²¹ Ammi kenhingei büpai epü kü bangtuh; ammi büpa khüei teyaong; mehenangkü “Ngelei Men” büpa kü nyupü nangkü büpai henüng keipü mang netükphahen.

²² Shejao büpai epü kü ammi kenhingei bangjema, hatü ngei epü dükjema, ammei vepathü kü ngei vepa vaihen, hatü ngei ammei vepa khüei hokhen.

²³ Ngelei phongshani am sheshongkahen, hatü am Amor, Hit, Pirizz, Kanan, Hiv, hatü Jebus amei kahdokei müei leihen, hatü ngei jom mahtükhen,

²⁴ ammi jomei kahvang kü aümei shaei nekhümhen nevaijü jomei dükhiling kü nemühen, shejao ammi jomei daülangpü shemnyüthü khih mü benei mangtüktuh.

²⁵ Ammi Shembüpa, ammei Kahvang kü khümhen, hatü ngei am kü hahying yungying moihimanphahen, hatü ngei am toueipü dinlem peü yahlangphahen.

²⁶ Ammei kahdokei nyüha üpa kao hapeü iy mü nelüdaihen nevaijü nyülan nechongkahen; ngei am yangnyu shoshoshi tuhhen.

²⁷ Ngei am shekü ngelei nyemshaobü shomhen, hatü am khüei yaongpü jatli pongnepaütei-i leihühen, hatü ngei ammei vepathü am kü nyemei jomei dok lephühen.

²⁸ Am she kübü Hiv, Kanan hatü Hit am changtükhen shingvaishi ngei am shekü nyahlang shomhen.

²⁹ Kahdok lavüngtoiyei hatü am kü kethen phaüyem longi laungdaimangkü am shekü vangbong hük kü payü ngei jom nechangtükhen.

³⁰ Am nanglak daei kahdok mangkhüamlang thahshi ngei am she kübü jom maani maani shei changtükhen.

³¹ Ngei ammei viong Hakla Yungching kübü Philistia Yungching thahshi, hatü yingnyü kübü Euphrates yungyen thahshi linghen; mehenangkü ngei kahdok kü nyupüthü ammei lak kü lanei shuohhen, hatü am theetei heihyaki jom changtükhen.

³² Ammi jom hatü jomei kahvang mü vangpüshuwpü meheyao nelinghen.

³³ Jom ammei kahdokei te-ang, hei nevaijema jomi ngei khüei am mang thahhühen; mehenangkü jomei kahvang kü khümpeyü am shingvaishi neyangaokhen aethitai vaikahen.