MÜLANGPÜ 21 - DAÜLANGPÜ LAIHING (BSI)

Aa kü Nohen Shahkungnyü

¹ Hapayü nüngi Israel am kü eshuohhen shahkungnyüthü nyüke:

² Nüngi Hebrew am aa hük shakjema, büpai nüng vangbong vok chongphohütuh, shejao vangbong nyetpabü kü büpayü meheyao hanghivong neshiüi bümei nanglak hük kei vetüktuh.

³ Büpa shem neyempü vaijema, büpa shem neyemi daihen; büpa shem yemphei vaijema, nyühihayao büpa mü daihen.

⁴ Büpalei shembüi chenyüha shuohpü vaijema hatü pinnyüi hapeüthü bühei nyujema, nyüha hatü hapeüthü kemei büpalei shembü amei vaihen, hatü büpa monha daihen.

⁵ Shejao hapa aapai büpalei shembü, chenyüha, hapeüthü kü bamnyüpeih, hatü bümei nanglak hük kei nedaihüang shei ejema,

⁶ büpalei shembüi büpa Kahvang khümshingei müei deihen. Büpa shadenei nevaijü shaden shemnyü kü nyangei yaonghütü büpalei shembüi nyiammüh yah-ei büpalei dhaong shionghen, hatü büpai yangnyu yangkemei büpa chongphohen.

⁷ Mechem shennyak hüki laophülei yiükha aa hük vaishi yutükhenshang, pinnyü baha aa kei bümei nanglak leiyei nedeishihhen.

⁸ Ngelei nyüha vaihen shei deihpü hanei am kü pinnyü yushuohjema, shejao büpai pinnyü nelümjema, pinnyü-ü chepa kü nyokei yushuohhen vongbong; büpai lebü kung shennyak kü pinnyü yuhen jiüpü neshiü; mehenangkü büpai pinnyü kü nejiüi dükteke.

⁹ Shennyak hanei-i laophülei hapeü shing nyüha vaiyei pinnyü shakjema, büpai pinnyü kü laophülei hapeü kei nohen vongbong.

¹⁰ Shennyak hanei-i nyüha nyipabü yahjema, büpai büpalei shongpü nyüha kü aihük hahying, ashakviha hatü aihük shem yempü jiüpü dou sheleipükei nedoh-i dükshuohhen vongbong,

¹¹ hatü büpai pinnyü kü hathü dou lem jem nedükshuohjema, büpai pinnyü meheyao hanghivong neshiüi deishihtükhen vongbong.

Jüteishangteipü Nangkü Shahkungnyü

¹² Üpai shennyak hanei üpei jühenshang, büpayao jütükhen vongbong.

¹³ Shejao büpai hapa nyingshangi dükpü nevai, shejao Kahvangi ponghüpü vaijema, ngei am kü joshing hük huphahen; halei büpa laongei daiyei loiyei nyuhütuh,

¹⁴ shejao hanei-i nyingshangi küpjan temtü lebü shennyak jütükjema, ammi büpa ngelei moidü toueipü yah-ei daiyei jütüktuh.

¹⁵ Üpai laophülei nyü hatü pa kü üphenshang jütüktuh.

¹⁶ Üpai shennyak hanei yutüknüng vaijao, nevaijü büpa mü aa kei tuhhen shingvaishi vaijao gühhenshang, hapa gühpa jütüktuh.

¹⁷ Üpai laophülei nyü hatü pa kü thaüvaühenshang jütüktuh.

¹⁸ Hanei-i deyei shennyak hüki hük kü yaongi nevaijü laktaümi shühjema, üphahpü shennyakpa nedi, shejao lüngei tüngei yangshi nyujema,

¹⁹ shejao meiyei chingyangshong kü lenshuoh noshi kamteiaokjema, üpshuopü shennyak kü hanghi neshuohhen, shejao üphahtü tüngei nyudaipü hepak shing lop shuohhen hatü meishi mangmei thahshi junghen vongbong.

²⁰ Mechem aa shembüi laophülei baha nevaijü nyüha aa kü üphen, hatü üppü shingei-üng shükshi didaijema, büpa hanghihühen vongbong.

²¹ Shejao hapa aa nyih hük, nyih nyi mong kü nedi-i yangjema, aa shembü kü hanghi neshiü; mehenangkü aayü büpalei douhinang keipü nyüke.

²² Mechem shennyak hanei-i deyei büm nekongpü nyüha hük kü üptü naü jütükhenshang, shejao hapa naü dipü mü lenei chenyüi hayaoha ma yahpü neshiüjema, hapa nyühalei chepahai mehe yühen, shahphenbüthüi itpüshük hang ühhen vongbong.

²³ Shejao ha mü lenei nyüha kü ma yahhüpü vaijema, hapa keyü büm kü büm,

²⁴ mük kü mük, bha kü bha, lak kü lak, la kü la,

²⁵ shamtükpü kü shamtükpü, makaw kü makaw, bheipü kü bheipü jeiyei shuohhen.

²⁶ Aa shembüi nyüha nevaijü baha aa kü mük bhaoshi bheijema, büpai hapa aalei mük mangtükpü lat veyei deishihtuh.

²⁷ Aa shembüi aalei bha tettükjema, hapa tettükpü lat büpai veyei deishihtuh.

²⁸ Mohoh-i shennyak hanei kü dishi hokjema, hapayü yaongi shükei jütüktuh, hatü hapalei phai nehahhen; shejao mohoh shembü kü hanghi neshuohhen.

²⁹ Shejao hapa mohoh-i sheleiyao hapakei mih kü hokei nyuhampü, hatü mohoh shembü kü shahvüng shuohpheikü jomi ha nejungnelangi shao hapai shennyak hanei kü hokei jütükjema, hapa mohoh yaongi shükei jütüktuh, hatü shembü amao jütüktuh.

³⁰ Shejoongpa, mohoh shembü kü hang yüjema, büpalei yangnyu yanghen shingvaishi hang meshük yühenshang shuohhen vongbong.

³¹ Mohoh-i hokei yeshang nevaijü yiükha hanei jütükjema, hapa mohoh shembü kü aihük shahkungi nohen.

³² Mohoh-i baha nevaijü nyüha aa hanei kü hokei jütükjema, mohoh shembüi aa shembü kü ngin pha hapüan shuohhen hatü mohoh-ü yaongi shükei jütüktuh.

³³ Shennyak hanei kahsha shotü apshi nevaijü neküptüki tuhpü kü mohoh nevaijü gadu vüei dijema,

³⁴ büpai yem shembü kü mahdaipü shing hang shemhen, büpai hapa shing lop shuohhen, shejao yemha mahngü büpai tuhlanghen.

³⁵ Hanei amei mohoh-i hanei amei mohoh kü hokei jütükjema jomi hapa yemmü nyupü yem yuhen hatü hapa lop hanteihen; hatü yemha mahngei phaiyao hükkei hanteihen vongbong.

³⁶ Shejao hapa mohoh-i sheleiyao hapakei hokteihampeih shei nyingpheikü shembüi neshenlangpü vaijema, mohoh kü mohoh jeiyei shemhen vongbong, shejao yemha mahngü büpai tuhlanghen.