MÜLANGPÜ 20 - DAÜLANGPÜ LAIHING (BSI)

Shahkungnyü An

¹ Kahvangi ha shahthü eteke:

² Ngeiyü am Ijip kahdok aa laphen kübü müei leipü Shembüpa, ammei Kahvang;

³ ngei mü lenei ammi lebü kahvangthü tekhüm.

⁴ Ammi am shingvaishi vangsho leipü nevaijü kahdoknyü leipü nevaijü yungmong leipü, kahdok mong leipü lemphüli mepakeiyao lajei teling.

⁵ Ammi hathü kü aümei tesha nevaijü ha kü tekhüm; mehenangkü ngeiyü Shembüpa, ammei Kahvangü mükhühpü Kahvang. Ngei yaktükpü nyühipathülei hühihathü kü denshem jem, ali thahshi ngei hanghi shuohnyüpeih,

⁶ shejao ngei kü bampü hatü ngelei shahkungnyü ven bangpüthü kü denshem haja haja ngei bampü hunyüpeih.

⁷ Ammi ngei, Shembüpa, ammei Kahvangei men angkü tenotei; mehenangkü ngei, Shembüpai büpalei men jiüjiükei noteipü kü hanghi shuohhen.

⁸ Sabbath nyih deih-ei dangtuh, hatü hapa daülangi tuhtuh.

⁹ Nyih vok thahshi ammi ammei dou peü düktuh.

¹⁰ Shejao nyih nyetpabü-ü Shembüpa, ammei Kahvang kü Sabbath thempü nyih nyüke; am, ammei hapeüthü, ammei nyüha hatü baha, aathü, ammei yemhimak, nevaijü am mü lakeiloiyei nyupü benhathüi mehe dou-ao tedükhü.

¹¹ Mehenangkü nyih vok kü Shembüpai vangsho hatü kahdok, yungching hatü halei nyupü peü lingpeih, shejao nyih nyetpabü kü nyiumeiyei thempeih; hanangkü Shembüpai Sabbath moihimanhüpeih hatü ha daütükpeih.

¹² Shembüpa, ammei Kahvangi shuohpü kahdok kü yangnyu shoshoei nyuhen shingvaishi ammei anyü hatü ampa kü dhüm shuohtuh.

¹³ Nüngi tejü.

¹⁴ Nüngi mükbongjuyung tedük.

¹⁵ Nüngi tegüh.

¹⁶ Nüngei chingyow khüei shahshem denpü teshuoh.

¹⁷ Nüngi nüngei chingyowlei shem kü vaüei tedeih; nüngi nüngei chingyowpalei nyüha kü vaüei tevei, nevaijü jomei mohoh nevaijü gadu nevaijü nüngei chingyowpalei lemphüli kü vaüei tedeih.

¹⁸ Mechem nanglakthü peüi klang vangteng, amit ngeü danpa, hatü kahshangei awshit vampü eepa, jom nyemei kheüteke, hatü tailuei yaongdaikem,

¹⁹ hatü Mosa kü, “Nüngi-üng hamphong keyü eshih, hatü hami bangshah, shejao ham kü Kahvangi nyemte-epha, hei nevaijema, ham dihen khih” shei eteke.

²⁰ Mosai nanglakthü kü, “Am tenyem, Kahvangi am dokhen shingvaishi mon yüpü khih, hajü mon ammi büpalei ven bangei nyuhen hatü mang nethahhen” shei eteke.

²¹ Mechem Mosai Kahvang nyushing phumthih yopailei heihpa, nanglakthüyü tailuei yaongshi nyudai.

Moidü Nangkü Shahkungnyü

²² Nüngi Israel am kü hapakei eyeishuoh shei Shembüpai Mosa kü eteke: “Ngei vangsho leipü am mü shah epü am nyingi eeteke.

²³ Ammi ngei mü lenei hon nevaijü ngin yah-ei kahvang teling.

²⁴ Ammi ngei shingvaishi kahdok yah-ei moidü hük mon lingtuh hatü hapa shangkü ammei jakpü moila hatü mongjempü moila, ammei mi, yum hatü mohoh yah-ei ngei kü khümhen shingvaishi am kü shuohpü shing peü kü moilatuh; ngei am touei peikahen hatü moihimanhen.

²⁵ Shejao ammi ngei shing yaong moidü hük lingjema, shükei lingpü yaong yah-ei teling; mehenangkü mechem ammi peikha noshi yaong shükhenshang, ha nedaünelangi leitükhen.

²⁶ Ammi ngelei moidü touei lateen kü khamei aongshingkü ammei büm apei hutükmangkü lateen kü khamei te-aong.”