MÜLANGPÜ 2 - DAÜLANGPÜ LAIHING (BSI)

Mosa Bühpü

¹ Shaang ha nyih kü, Levi am phang kübü shennyak hüki Levi am yiükha hük mü shem yem,

² hatü pinnyü büm nekongi lei hatü yeshang hük büh, hatü mechem pinnyüi naü-ü longi bamhüshi eepa, pinnyüi naü lenyang jem thahshi joshi tuh.

³ Mechem pinnyüi büpa nejoaokhen mü longdaipa, pinnyüi mühdow longpü hük atü yung neshühen mü müh shaoktüktü ha mongei naü shihtü pingu ying kü yunghaoei bhongei shanshih.

⁴ Naü mehe leihen shei chenyai tailuei veishi nyu.

⁵ Hahepak kü Pharaohlei yiükha hangha lakhen yungyenei yiüei nyu, hatü jomei aathü yunghaoei kamteiyei nyu. Pinnyüi hapa mühdow pingu yingei eeyei pinnyülei aa hük deishih-ei ha yah.

⁶ Mechem pinnyüi ha apei veishuohpa, bahanaü hük nyuteke. Ha naü thep, hatü pinnyüi ha naü kü longi shinshangei deih. “Hapayü Hebrew amei naü vaihen khih” shei pinnyüi e.

⁷ Hahepak kü naüei chenyai Pharaohlei yiükha kü, “Ngei daiyei nüng kü ha naü jungei nyemlongphanüng Hebrew am nyü hük yemküshah nyu?” shei phe.

⁸ “Awma, daiyei yemtuh” shei pinnyüi e. Hanangkü nelanyü daiyei naüei chenyü müei lei.

⁹ Pharaohlei yiükhai, “Ha naü yah-ei leiyei jungei ngei kü longshih, hatü ha shing ngei nüng kü lat shuohhen” shei e. Hanangkü hapa nyüi naü yah-ei leiyei jungei longteke.

¹⁰ Mechem ha naü longpa, pinnyüi büpa Pharaohlei yiükha touei müei peiyei shuoh, hatü pinnyüi büpayü laophülei hapeü kei angteke. Pinnyüi büpa kü Mosa shei men; mehenangkü, “Ngei büpa yung leipü yahpeih” shei eteke.

Mosa Midian Kahdokei Paüdaipü

¹¹ Nyih hük Mosa nethe leipheikü büpa laophülei Hebrew nanglakthü touei pei, hatü jom kü kangei douwong dükhüpü büpai ee. Büpai laophülei Hebrew shennyak hük kü Ijip am hüki longi üpei ee.

¹² Büpai yaakeileyei veitü üpayao ne-eepü nangkü büpai Ijip naüha jütü bhih kü dungphong.

¹³ Nyihphei, shao büpa daijashingkü Hebrew am shennyak nyi deyei chongjateke. Büpai nejiüpü naüha kü, “Nüngi laophülei Hebrew shennyak kü mehekei üpnya?” shei e.

¹⁴ Hapa shennyaki Mosa kü, “Üpai nüngi ham shak kü vanglem lembü hatü shahphenbü vaihen jepa? Nüngi Ijip naüha jütükpükei ngeiyao jühen deihnyu je?” shei e. Hahepak kü Mosa nyem hatü ngei mehe dükpa, hayü mih-i nyinglangteke shei deih.

¹⁵ Mechem Pharaoh-i ha jung danpa, büpai Mosa jühen yem, shejao Mosa Pharaoh toueipü paüdai, hatü Midian kahdokei daiyei yungkuk hük touei uoshi nyu.

¹⁶ Midian am ngongpalei yiükhathü jom nyet nyu. Jomi chepalei mithü kü yinghen yung shonüng yungkukei heih.

¹⁷ Shejao mi yombüthü hanei peiyei jomphong hungtük. Hahepak kü Mosai jomphong kü khüambakei yaong hatü jomei mithü kü yung yingteke.

¹⁸ Mechem jomphong chepa Reuel touei nyokei leipa, büpai jomphong kü, “Shinnyih-ü mekei hajük lomshi leiküpa?” shei phe.

¹⁹ Jomphongi chepa kü, “Ijip am shennyak hüki mi yombüthü hungtüktü hamphong kü yung shoei mithü kü yung yingphopeih” shei e.

²⁰ “Büpa melei nyüke?” shei chehathü kü phe. “Amphongi mehekei büpa halei tuhphongpa? Jen mü bhaong hahhen nyükeishuoh” shei e.

²¹ Mosai hapa shennyak mü nyuhen mongteke, hatü büpai laophülei yiükha, Zipporah Mosa mü shem yemhü.

²² Zipporah-i yeshang hük ang hatü büpai naü kü Gershom shei men; mehenangkü büpai, “Ngei kung kahdokei benha leiyei nyupeih” shei eteke.

²³ Vangbong longi daipheikü hapa Ijip ongpa didai, shejao Israel hapeüthü aanyak kei ponghahpai thepeiyoungei sheühpü yüteke. Aa laphen kü ponghahpai jomi lenpüwongpü Kahvang thahshi aong.

²⁴ Kahvangi jom theppüyoungpü dan, hatü büpai Abraham, Isak hatü Jakob mü vangeishuwpü deih-ei dang.

²⁵ Kahvangi Israel hapeüthü kü vei, hatü bamei deih.