MÜLANGPÜ 18 - DAÜLANGPÜ LAIHING (BSI)

Jethro-i Mosa Thümpü

¹ Shaang, Mosalei chenyühalei chepa, Jethro, Midian amei ngongpai Mosa hatü büpalei Israel nanglakthü kü Kahvangi mehe dükpa, Shembüpai mekei Israel am Ijip leipü müei daipa, ha jung peü danteke.

² Hanangkü Mosai tuhphongpü chenyüha, Zipporah müei Mosa touei büpa pei,

³ hatü pinnyülei hapeü nyi Gershom hatü Eliezer nyiao müteke. Hapeü hükei menü Gershom shei men; mehenangkü Mosai eteke, “Ngeiyü kung kahdokei benha kei nyupeih.”

⁴ hatü hükpalei menü, Eliezer shei menteke; mehenangkü büpai, “Opalei Kahvangü ngelei sheühbü nyuteke, hatü Pharaohlei lak kübü ngei yangpeih” shei eteke.

⁵ Mosalei chenyühalei chepa, Jethro-i Mosalei cheha nyi hatü chenyüha müei Mosai Kahvang kahshangei baümtap vepü touei pei.

⁶ Büpai Mosa kü, “Nüngei angko ngei, Jethro, anyüha hatü hapeü nyi müei peikahen” shei shah shomshuohteke.

⁷ Mosai büpa mü pongteinüng dai; büpa aümei sha hatü om kü jüp.

⁸ Hahepak kü Mosai Jethro kü Shembüpai Pharaoh kü mehe dükpa, lemyangkü jomi mehe ponghahpa hatü Shembüpai jom mekei yangpa ha jung lemphüli jaüjateke.

⁹ Jom Ijip leipü yanghen nangkü Shembüpai Israel am kü meipü dükpü nangkü Jethro mongong.

¹⁰ Jethro-i, “Ijip am hatü Pharaohlei lak kübü am yangpü Shembüpa kü men longtuh. Aa laphen kübü laophülei nanglak yemleipü Shembüpa kü men longtuh.

¹¹ Shaang, Shembüpayü lebü kahvangthü peü khongkü longpüpa shei ngei nyingteke; mehenangkü mechem Ijip ami Israel am kü naamei dükpa, büpai nanglakthü Ijip am lak kübü yangpeih” shei e,

¹² hatü Jethro-i Kahvang kü jakpü moila koei pei; hatü Aaroni Israel am behethü peü müei peiyei Kahvang khümei hapa aan hahteke.

Shahphenbüthü Jepü

¹³ Nyihphei Mosai nanglakthü khongkü nedanteipü shah phenei nyu, hatü büpa dhom kübü nyak thahshi nang nekongi nyu.

¹⁴ Mechem cheko-i nanglakthü shingvaishi Mosai dükpü eepa, büpai nanglakthü kü nüngi dükpü hayü meheang? Dhom kübü om dhüshi nanglakthü nüng shinei yaongtü mehekei nüng monha uotü hapakei düknya?

¹⁵ Mosai Jethro kü, “Nanglakthüi Kahvangi mongpü nyinghüei ha phehahnüng peiküpü nangkü ngei ha düknyüpeih” shei e.

¹⁶ “Mechem jom jom nedanteipü vamhenshang ngei touei peikünyüke, hatü üpa jiü, üpa nejiü ngei shahphen shuohnyeih, hatü ngei jom kü Kahvangei shahkungnyü eshuohnyeih” shei eteke.

¹⁷ Hahepak kü Jethro-i, “Nüngi mehe düknya hayü nemeiang.

¹⁸ Hingmei, nüng hatü nüng mü nyupü nanglakthü shaang-üng nyiudaikemhen; mehenangkü nüng monhai dükhenü dou longi; hanggo vihshi nyüke.

¹⁹ Shaang ngei epü bangtuh. Ngei nüng kü deihpü chudeih hanküshah, hatü Kahvang nüng mü nyemnyukei! Nanglakthü nangkü Kahvang philei nüng nyutuh hatü jom nedanteipü büpa touei koei deituh.

²⁰ Nüngi jom kü Kahvangei shahkungnyüthü nyuh-eishuoh, hatü jom mekei nyuhen, mehe dükhen nih-ei veneishuoh.

²¹ Shejao nanglakthü khong kübü dou aokhen shennyak hanei Kahvang nyempü, monglemaokpü, shahshem nanglei kü jiühitpü shennyak jetuh, hatü hapa shennyakthüi haja shak kü, kho shak kü, pinyipüan shak kü, hatü an shak kü lakchongbü vaiyei tuhtuh.

²² Düngei jomi nephenaokpü shahhidou wongpeyü nüng touei nyemdeikei, shejao ashüanyong nedanteipü kemei jomi nyemphentük. Jomi hapakei nüngei hanggovih hanlangjü mon nüngei hanggo shanghen.

²³ Kahvangi epükei nüngi hapa dükjema, nüng nenyiunenanghen, hatü nanglakthüao nedanteipü peü meidaitü chingmei lingei shemei nyokei leihen” shei eteke.

²⁴ Hanangkü Mosai cheko Jethro-i epükei bangei peü dükteke.

²⁵ Mosai Israel am khong kübü dou aokhen shennyakthü jeyei nanglak haja shak kü, kho shak kü, pinyipüan shak kü, hatü an shak kü mübü vaiyei tuh.

²⁶ Düngei jomi nanglakthü shingvaishi shahphenbü vaiteke; wongpü shahhidou jomi Mosa touei deiteke, shejao ashüanyong nedanteipü kemei jomi phentükteke.

²⁷ Hapheikü Mosai cheko Jethro kü nyu-e shei etü büpa laophülei kahmük yemei leitük.