MÜLANGPÜ 17 - DAÜLANGPÜ LAIHING (BSI)

Yaong kübü Yung

¹ Israel am khong kemei Sin yingnyü kübü layaongei shing hük kübü hük shei Shembüpai epükei dai. Jomi Rephidimei baümtap veteke shejao halei yinghen yung nechongja.

² Hanangkü jomi Mosa mü deteke hatü, “Ham kü yinghen yung yahkei” shei e. Mosai jomphong kü, “Mehekei ammi ngei mü denya? Mehekei ammi Shembüpa kü doknya?” shei eteke.

³ Shejao nanglakthü longi yungle hatü nedoh-i Mosa khüei langmaan. Jomi, “Mehekei nüngi ham Ijip leipü yunglepai ham, hamei hapeüthü hatü yemhimakthü jühen müei daipa?” shei e.

⁴ Hanangkü Mosai Shembüpa kü, “Ngei hapa nanglakthü kü mehe dükhen? Jomi ngei kü yaongi shükphahen mü nyüke” shei phopteke.

⁵ Shembüpai Mosa kü, “Israel behethü hanei nüng mü müei nanglakthü shekü daituh; nüngi Nile yungyen kü bheipü lenshuoh-ao notuh hatü daituh.

⁶ Ngei am shekü Sinai Kahshangei yaong shangkü yaongshi chongkahen. Yaong kü bheiyeishuoh, hatü ha kübü nanglakthüi yinghen yung vamkahen” shei e. Epükei Israel am behethüi eeshi Mosai dükteke.

⁷ Büpai hapa shingkü Massah hatü Meribah shei men; mehenangkü Israel am deteke, hatü Shembüpa kü dokei, “Shembüpa ham mü nenyupü hi nyupü ang?” shei eteke.

Amalek am Mü Hokpü

⁸ Hahepak kü Amalek am peiyei Rephidimei Israel am mü hok.

⁹ Mosai Joshua kü, “Jen shing shennyak hanei jetuh, hatü Amalek am mü hokhen daituh. Ngenyih ngei ngelei lakei Kahvangei lenshuoh notü yaongkahen” shei e.

¹⁰ Hanangkü Mosai epükei Joshua-i dük, hatü mechem Mosa, Aaron hatü Hur hathü Kahvang shangtao-ei nyupa, Amalek am mü hok.

¹¹ Mechem Mosai büpalei lak haongpa, lak haongei nyupü thahshi Israel ami neüteke, shejao mechem Mosai büpalei lak shanlangpa, Amalek ami neüteke.

¹² Shejao Mosalei lak yungpü nangkü Aaron hi Hur nyi-i yaong yah-ei büpa phangkü haüteke, hatü büpa ha kü uohüteke. Jijinyi-i vanghe mangshü thahshi lak neyunghen shangmü hüki hük lemei, hüki hük lemei shei lak dangpong kü no.

¹³ Hanangkü Joshua-i Amalek am neüteke.

¹⁴ Hahepak kü Shembüpai Mosa kü, “Deih-ei danghen shingvaishi hapa vehok neüpü laitap hük kü nyangtuh hatü Joshua-i danshi ietuh. Ngei vangsho phangkü Amalek am chemjalak kü deiheilehen kübü thitei yaktükhen” shei eteke.

¹⁵ Mosai moidü hük ling, hatü hapa kü, “Shembüpa, ngelei Khüamlung” shei men.

¹⁶ Büpai, “Shembüpalei khüamlung shaoshi notuh! Shembüpai hüdenhalenshi Amalek am mü hokhen” shei eteke.