MÜLANGPÜ 16 - DAÜLANGPÜ LAIHING (BSI)

Manna hatü Adhit

¹ Israel am khong peü Elim kübü layaongei dai; jom Ijip tuhtü daipheikü len nyipabü nyih anpüngapabü kü Elim hatü Sinai nyi aa kübü Sin yingnyü ngoiteke.

² Israel am khong kemei Mosa hi Aaron nyi kü jahpanei langmaan.

³ Israel ami jijinyi kü, “Ijip kahdokei nyuyaki-üng Shembüpalei laki ham jütüklangmeyü shei deihpeih. Halei vailangmeyü phaidük touei uotü hami lümpü lümpü peü moh-ei hahhen vaipeih; shejao anjinyi-i khong kemei shüaeiyunglepai dihühen müei daipü khih” shei eteke.

⁴ Hahepak kü Shembüpai Mosa kü, “Ngei am shingvaishi vangsho leipü hahying vang keipükei shomphahen, nyihjeih nanglakthüi daiyei laophü shingvaishi changshi homei leituh. Ngei epü kü jomi mü-ülashangkü hapakei ngei jom kü dokhen.

⁵ Nyih vokpabü kü, mechem jomi mehe hahying shemei leiyei nemnohenshang, hapayü jomi lebü nyihthü kü hanpü mü shingnyi nyeinya chongkahen” shei eteke.

⁶ Hanangkü Mosa hi Aaron nyi-i Israel am thaipü khongkü, “Amphong Ijip kahdok leipü müei leipeyü Shembüpa khih shei om mü ammi nyinghen,

⁷ hatü dhom mü ammi Shembüpalei müknyinshekhang eehen; mehenangkü ammi Shembüpa khüei langmaanpü büpai danteke. Ammi henji khüei langmaanhen henji üpaang?” shei e.

⁸ Mosai, “Mechem Shembüpai om mü am kü phai hahhen yahphahen hatü dhom mü ammi hahhüpüshük hahhen hahying yahphahen; hapayü Shembüpa khih shei ammi nyinghen; mehenangkü büpa khüei ammi langmaanpü büpai danteke. Henjiyü üpaang? Ammi henji khüei nevai, shejao Shembüpa khüei langmaannyüke” shei eteke.

⁹ Hahepak kü Mosai Aaron kü, “Israel am khong kempü kü, ‘Shembüpa touei peiyei yaonghen eyeishuoh; mehenangkü jomi langmaanpü danteke’ ” shei e.

¹⁰ Aaroni Israel am khong kü shah eshingkü, jomi yingnyü lemei vei, hatü Shembüpa müknyinshekhang phum kü vam.

¹¹ Shembüpai Mosa mü etei hatü,

¹² “Ngei Israel am langmaanpü danteke. Om kü jomi phai hahhen, hatü dhom mü jom hahhüpüshük hahhen hahying danghen shei e; shejüang jomi ngeiyü Shembüpa, jomei Kahvang shei nyinghen” shei eteke.

¹³ Om kü adhit khong longpü pei hatü baümtap kü jüm; hatü nepnüng dhom mü baümtap shonei nyien vüei nyuteke.

¹⁴ Mechem nyien sham aongei ngü lüdaipa, baünyangi ba mü toilangi jükmü jükmü phaü maei kahdokei chongjateke.

¹⁵ Mechem Israel ami ha eepa, jom hüki hük mü, “Hapayü meheang yo?” shei etei. Mehenangkü ha meheshang jomi nenying. Mosai jom kü, “Hapayü Shembüpai am kü hahhen shuohpü hahying khih” shei e.

¹⁶ Shembüpai hapakei ngeükhüam shuohteke: “Am peüi laophüi napüshük hapa homhahtuh, shem am shennyak pabüm kü dok nyi baong homtuh.”

¹⁷ Epükei Israel ami dük; hanei-i nyeishi, hanei-i komshi hom.

¹⁸ Shejao mechem jomi hapa dokei veipa, üami nyeishi hom, nyeishi nechongja, üami komshi hom komshi nechongja; jom peüi laophüi napüshük homteke.

¹⁹ Mosai jomphong kü, “Ngenep thahshi üpaiyao ha aoei tetuh” shei e.

²⁰ Shejao Mosai epü kü jomi nebang; hanei-i nepnüng thahshi hapa aoei tuh, hatü hapa kü laong hetei nepnüng ngü büteke. Mosai jom kü mongshihteke.

²¹ Nepjeih peüi laophüi napüshük homteke, shejao mechem vanghe nyah-ei vampa, kahdokei aophongpü peü nyaüei yendai.

²² Nyih vokpabü kü jomi nyingnyoipü mü shingnyi nyeishi shennyak pabüm kü dok ali baong homteke. Mechem khong mübüthü peiyei Mosa kü ha nang eshuohpa,

²³ büpai jom kü e, “Hapayü Shembüpai kangpü nyüke. Ngenyih-ü nyiumeiyei themhen nyih hük, Shembüpalei daülangpü Sabbath nyih nyüke. Hanangkü ammi mehe nemnohahhünya nemnohahtuh. Aopüthü kemei ngenep thahshi Mosai epükei aoei tuh.”

²⁴ Hanangkü jomi Mosai epükei nepphei thahshi aoei tuh, hatü hapa kü shie nebü, hatü ha kü laong nehet.

²⁵ “Shinnyih hapa hahtuh; mehenangkü shinnyih-ü Shembüpalei Sabbath nyih nyüke; mehenangkü shinnyih hapa kahdokei vüei nechongkahen.

²⁶ Nyih vok thahshi ammi ha homhen shejao nyih nyetpabü Sabbath nyih kü ha meleiyao nechongkahen” shei Mosai eteke.

²⁷ Nyih nyetpabü kao shennyakthüi hapa homnüng dai, shejao hükao nedang.

²⁸ Shembüpai Mosa kü, “Meshükpa am nanglakthüi ngelei shah kü leteihenang?

²⁹ Veituh! Shembüpai am kü nyiumeihen nyih nyi shing hahying changshi shuohteke; peüi laophü nyushingei nyutuh; Sabbath nyih kü laophü nyushing kübü tedai” shei e.

³⁰ Hanangkü nanglakthüi nyih nyetpabü kü dou nedüki nyiumeiyei them.

³¹ Israel ami hapa kü manna shei nyükteke. Hapayü shotohpü maanpü livang kei, hatü hapa hahjü nyahjiüi lingpü aan kei shiüteke.

³² Mosai, “Mechem büpai jen Ijip kahdok leipü müei leipa, jen kü jahpanei büpai hahhen hahying mehe shuohpa, ha jeni hühiha kü huhen shingvaishi manna maani aoei tuhtuh shei Shembüpai enyüke” shei ejateke.

³³ Mosai Aaron kü, “Haümdük hük yahtuh, hatü halei manna dok nyi shihtuh, hatü hüdenhalenshi hühiha shing tuhhen Shembüpa touei deiyei tuhtuh” shei eteke.

³⁴ Shembüpai Mosa kü kangpükei meishi nyuhen shingvaishi Aaroni Vangpüshuwpü Pela touei tuhteke.

³⁵ Israel ami vangbong pinyi thahshi jom nyuhen kahdok, Kanan viong mangngoi thahshi manna hahteke.

³⁶ Omer hükü ephah hük kü phaihan an kü hük nyüke.