MÜLANGPÜ 14 - DAÜLANGPÜ LAIHING (BSI)

Hakla Yungching Hompü

¹ Hahepak kü Shembüpai Mosa kü,

² “Israel am kü nyokei leiyei Migdol hi yungching nyi aa kü Pi-Hahiroth yopailei baümtap vehen eyeishuoh. Jomi yung touei Baal-Zephon kü dangteishi baümtap vehen etuh.

³ Pharaoh-i Israel amü ai mah-ei longteinyüke, hatü jahpanei nyüke shei deihhen.

⁴ Ngei Pharaohlei mong vaanhühen, hatü büpai jom kü changhen. Shejao Pharaoh hatü büpalei veshanthü shak kü ngei müknyinshekhang danghen, hatü Ijip ami ngeiyü Shembüpa shei nyinghen” shei eteke. Israel ami jom kü eshuohpükei dük.

⁵ Mechem Ijip ongpa kü nanglakthü nyaidaiteke shei eshuohpa, Pharaoh hatü büpalei lakchongbüthüi nanglakthü nangkü jomei mong yeiyateke hatü, “Jenei dou dükteipü jenei aa Israel am nyaidaihen mü jeni mehe dükhahpa?” shei etei.

⁶ Hanangkü büpai büpalei koyei khari tem, hatü büpai veshanthü mütü,

⁷ büpai Ijip kü nyupü koyei kharithü peü kü lakchongbüthü uohütü peü mü meipü koyei khari kho vok müei dai.

⁸ Shembüpai Ijip ongpa Pharaohlei mong vaanhü, hatü büpai mong longshi lüdaipü Israel am phei changteke.

⁹ Ijip am, Pharaohlei koyeithü, koyei kharithü, koyei khari mübüthü hatü büpalei veshanthüi jom kü changteke, hatü Yungching touei Pi-Hahiroth yopailei Baal-Zephon kü dangshi baümtap vetü nyushi jomi jom phei thahteke.

¹⁰ Israel ami Pharaoh hatü Ijip am jom phei changei shajapü ee. Longi nyemei Israel ami Shembüpa kü leneiwong.

¹¹ Jomi Mosa kü, “Ijiplei mahngchong neshiü shei nüngi hamphong jahpanei dihününg müei daipü je? Ijip leipü nüngi ham müei daiyei mehe lingphünya?

¹² Henüng ponghahmangkü shei Ijiplei nyushi-üng hami nüng kü, ‘Ham halei-üng tuhphongtuh; hami Ijip am-üng chongphoei nyudaishah’ shei neeangpü je? Jahpanei dileimeyü Ijip am chongphoei nyupü-üng ham shingvaishi meihah shepeih” shei eteke.

¹³ Mosai nanglakthü kü, “Am tenyemkei, wong kohshi yaongtuh, hatü shinnyih Shembüpai am yanghen mehe dükkahen veishi nyutuh; mehenangkü ammi shinnyih eepü Ijip am sheyü ne-eepih.

¹⁴ Shembüpai am khüambakei hokkahen, am nenmü mon nyutuh” shei eteke.

¹⁵ Hahepak kü Shembüpai Mosa kü, “Mehekei ammi ngei kü mong mah-ei thepnya? Israel am kü thepju kü shehongei daituh shei eyeishuoh.

¹⁶ Shejao nüngi nüngei lenshuoh noei antü yungching shangkü nüngei lak haongtuh. Yung handaiphahen hatü Israel am yung homei kahvan kü kamei daiaokhen.

¹⁷ Hahepak kü ngei Ijip am jom pheikü müei yung homhen monglonghühen, hatü ngei Pharaoh, büpalei veshan, büpalei koyei khari, hatü ha kü mübüthü shak kü ngei müknyinshekhang danghen.

¹⁸ Mechem ngei jom neühenshang, Ijip ami ngeiyü Shembüpa shei nyinghen” shei eteke.

¹⁹ Kahvangei vangsho phongshan üpa Israel veshanthü shekü kampa, jomei ngaümphei lemei leiteke, hatü jom shekü kamei nyupü phum shemnyü jom ngaümpheilei leiyei,

²⁰ Ijip hatü Israel am veshanthü aa kü itteke. Vangngaishi phumi Ijip am phikü vangnyak peihü, shejao Israel am phikü vangngai shuoh, hatü veshanthü hüki hük yopailei nepeiteiaok.

²¹ Hahepak kü Mosai büpalei lak yung shak kü haong, hatü vangnyak Shembüpai heong vanglük lükhüei yung ngangngangi leitük, hatü yung nyi vaishi baong hantüktü kahvan vamhüteke,

²² hatü nyonghidah kü yungi bham vaishi shaongtü Israel am kahvan kü yung homei daiteke.

²³ Ijip ami jom kü changei jom pheikü müshi Pharaohlei koyei, koyei khari hatü hapa mübüthü yung homhen heih.

²⁴ Vangngai shekü Shembüpai aw shemnyü hatü phum shangeipü Ijip veshanthü kü veiyei shanshih, hatü Ijip veshanthü hanghi ponghü.

²⁵ Büpai jomei koyei kharila longi wongshi shinhen mü nyaühut kü taangtük. “Shembüpai Israel am khüambakei jen khüei hoknyu khih. Israel amü nyemleidai” shei Ijip ami etei.

²⁶ Hahepak kü Shembüpai Mosa kü, “Ijip am, jomei koyei khari hatü koyei veshanthü kü yung leiyei jom nyemlümlangnüng nüngei lak haongtuh” shei e.

²⁷ Mosai büpalei lak yung shak kü haong, hatü nepnüng dhom mü yung hapalei shingkü nyokei lei. Ijip ami yung leipü yangdainüng nyaishingkü Shembüpai jom yungei hungei shüktükkem.

²⁸ Yung nyokei leiyei koyei khari, hatü ha mübüthü, Pharaohlei veshanthü yungei müei heihpüthü peü kemei hükao ne-ao-i lümlang.

²⁹ Shejao Israel amü jomei nyonghidah kü yungi bham vaishi shaongtü kahvan kü kamei yung homei lüdai.

³⁰ Hapa keiha Shembüpai Israel am yang, hatü Israel ami Ijip am dipü yungphaangei eeteke.

³¹ Israel ami Ijip am khüei Shembüpai dükpü dou longpü eeteke. Hanangkü nanglakthüi Shembüpa kü nyem, hatü Shembüpa hatü büpa chongphopü Mosa kü hinglem.