MÜLANGPÜ 13 - DAÜLANGPÜ LAIHING (BSI)

Shongei Angpüthü Daühüpü

¹ Shembüpai Mosa kü,

² “Ngelei men kü hashongpathü peü daühütuh; mehenangkü shennyak vaijao yemhimak vaijao shongei angpü peü ngelei” shei eteke.

Daw Neshihpü Aan Mo

³ Mosai nanglakthü kü, “Am Ijip leipü aa vaipü kahdok leipü vamei daipü nyih, shinnyih deih-ei dangtuh; mehenangkü Shembüpai büpalei wonghingani am müei ngailangteke. Daw shihpü aan tehah.

⁴ Shinnyih, hapa shongpü Abib len kü am vamei dainyüke.

⁵ Mechem Shembüpai am Kanan, Hit, Amor, Hiv, hatü Jebus amei kahdok, amma hatü nyahjiü yenpü kahdok, mepa ammei bühipa kü shuohhen shei büpai lahpa, hapa kahdokei leishingkü ammi hapa shongpü len kü ha mo motuh.

⁶ Nyih nyet thahshi ammi daw neshihpü aan hahtuh, hatü nyih nyetpabü kü ammi Shembüpa kü dhüm shuoh-ei motuh.

⁷ Nyih nyet mongkü daw neshihpü aan hahtuh, ammi daw shihpü aan lanshei tenotei nevaijü ammei kahdokei daw tetuh.

⁸ ‘Mechem ngei Ijip leipü vamei daipa, Shembüpai ngei shing ha dükpü nangkü ngei ha düknyüpeih’ shei ammei hapeüthü kü etuh.

⁹ Hapa mo homei am shingvaishi lak kü nyangeihepü hatü ammei shangba kü deihhenlehen nyangeihepü shapükei nyukahen; hapai Shembüpalei shahkungnyü ammei jubenyeijaang kü nyuhen; mehenangkü Shembüpalei wonghingani am Ijip leipü mülangpeih.

¹⁰ Ammi vangbong ieyei hepak jiüshi hapa mo moteituh.”

Shongpü Hapeü hatü Yemhimak

¹¹ Mechem Shembüpai am hatü ammei bühipa kü lahpükei Kanan kahdokei müei leiyei am kü ha yahphahenshang,

¹² Ammi shongei angpü lemphüli Shembüpa shing yaongei tuhtuh. Shongei shaanpü yemhimak baongha kemei Shembüpalei.

¹³ Shejao shongei shaanpü gadu jeiyei mi yah-ei moila shuohtü angei leituh; ammi ha angei neleijema, hapalei ngaümchong mangtüktuh. Ammei shongpü hashongpathü kemei angei leituh.

¹⁴ Mechem ngoikahen hepak kü ammei hapeüthüi, “Hapa mehe lappüang? shei phephahenshang, ammi, ‘Shembüpai büpalei wonghingani aa vaiyei nyupü Ijip kahdok leipü jen müei leilangpeih’ shei etuh.

¹⁵ Mechem Pharaoh mong vaanei neleishihpih shei epa, Shembüpai Ijip kahdok kübü hashongpathü hatü shongei shaanpü yemthü peü jütükpeih. Hanangkü shongei shaanpü yem baongha kemei jeni Shembüpa kü jakpü moila shuohnyüpeih, shejao hashongpa kemei angei leinyüpeih.

¹⁶ Shembüpai büpalei wonghingani ham Ijip leipü mülangpeih shei ammei lak kü nyangeihepü hatü ammei shangba kü deihhenlehen nyangeihepü shapü chongkahen.”

Phum hatü Aw Shemnyü

¹⁷ Mechem Pharaoh-i nanglakthü leishihpa, shohlohpü lem vaijao Kahvangi Philistia kahmük hompü lem kü nemü. “Jomi vepa mü hokhen mü vamjü, jomei mong yeiyaei Ijiplei nyokei leidaiphahen khih” shei Kahvangi deihteke.

¹⁸ Hanangkü Kahvangi nanglakthü Hakla Yungching philei jahpan lemei shonei müteke. Israel ami Ijip kahdok leipü hokhen shingvaishi lahhilaong temei daiteke.

¹⁹ Mosai Josephei vangtaothüao yah-ei lei; mehenangkü Joseph-i Israel hapeüthü kü hapakei dükhen vanghü. Büpai, “Kahvangi hingmei am kü sheühphahen, mechem am hapa shing kübü layaongei leihenshang, ngelei vangao ammi koei leituh” shei eteke.

²⁰ Sukkoth kübü layaongei daiyei jomi Etham jahpanei baümtap ve.

²¹ Jom nyakhingai thüngei kamhen shingvaishi Shembüpai nyihnüngü jom mühen phum shemnyü, hatü yanüng jom kü vangngai shuohhen shingvaishi aw shemnyü jom shekü daiteke.

²² Nyihnüng phum shemnyü nevaijü yanüng nanglakthü nyupü shing kübü aw shemnyü neyandai.