MÜLANGPÜ 12 - DAÜLANGPÜ LAIHING (BSI)

Hompü Mo

¹ Shembüpai Ijiplei Mosa hi Aaron nyi kü eteke:

² Hapa lenü am shingvaishi vangbong kü shongpü len vaikahen.

³ Israel am peüi laophülei shemongsha shingvaishi mi cheha hükbaong jehen eyeishuoh.

⁴ Mi büm hük nehahkemaokhen mü shemong kü nanglak maani mon vaijema, yopai leipü chingyow mü shepteiyei hük jütuh, hatü hapa hahhen nanglak ittü ha hanteituh.

⁵ Ammi mi nevaijü yum yahhen aok, shejao hapayü vangbong hük lompü kawhikang neshiüpü chebaongha jetuh.

⁶ Ammi hapa len nyih anpüali mangngoi thahshi hathü jungei tuhtuh, hatü Israel am nanglak peüi hapa omdhümbaong kü jütuh.

⁷ Nanglak peüi iy maani yah-ei jomi hahyingpü shem shaden dangpong kü hatü shasho kü nyiohütuh.

⁸ Ha ya-üng jomi phaiyü aw kü shoktü daw neshiüpü aan mü hatü shahyakpü phenlakvungpha mü hahkemtuh.

⁹ Ammi phai thüngmü nevaijü cheüei tehah, shejao shangjing, lakhila hatü thenleimongphangao aw kü shokei hahtuh.

¹⁰ Ammi vangngaipü thahshi meheyao aoei tetuh; nehah-aoki aojema aw kü jaktüktuh.

¹¹ Hapakei ammi phai hahtuh: Shünglok loktuh, lathuh thuhtuh; lenshouh notuh; shülangi hahtuh; hapayü Shembüpa, ngelei Hompü Mo nyüke.

¹² Ha ya ngei Ijip kahdok peü kü hashongpathü; shennyak vaituh, yemhimak vaituh jüei daihen; hatü Ijip amei kahvangthü peü kü ngei shahphenhen. Ngeiyü Shembüpa.

¹³ Shaden kü iy nyiopeyü am nyupü shem nyangeihepü vaihen; mechem ngei iy eehenshang, ngei am peih-ei lüdaihen, hatü ngei Ijip am kü lakshihshingkü am kü hapa chami nesheüphahen.

¹⁴ Hapa nyih-ü am shingvaishi deih-ei dangpü nyih vaihen. Ammi hapayü Shembüpalei Mo shei hüdenhalenshi moteituh.

Daw Neshihpü Aan Mo

¹⁵ Shembüpai, “Nyih nyet ammi daw neshihpü aan hahtuh; shongpü nyih kü ammi laophülei shem leipü daw peü yaktüktuh; mehenangkü üpai hapa nyih mongkü daw shihpü aan hahhenshang büpayü Israel khong kübü katitükhen.

¹⁶ Shongpü nyih hatü nyetpabü nyih ammi khümnüng thaituh; hathü nyih kü dou meheyao nedükhen, shejao mehe hahhen nyüpa, hathü mon nemnohahhen vongbong.

¹⁷ Ammi daw neshihpü aan mo düngei motuh; mehenangkü hapa nyih ngei Ijip kahdok leipü am müei leipeih. Hüdenhalenshi ammi hapa nyih kü düngei motuh.

¹⁸ Shongpü len nyih anpüalipabü om kübü nyih hapühükpabü om thahshi ammi daw neshihpü aan mon hahtuh.

¹⁹ Nyih nyet mongkü ammei shemei daw lanshei netuhhen vongbong; mehenangkü benha vaituh bühü vaituh üami daw shihpü aan hahhenshang, Israel khong kübü katitükhen.

²⁰ Daw shihpü hahying meheyao nehahhen; am nyushing peü kü daw neshihpü aan mon hahtuh” shei eteke.

Shongpü Hompü Mo

²¹ Mosai Israel am behethü peü nyükei jom kü, “Leituh, hatü am peüi laophülei shemong shingvaishi mi cheha jetuh, hatü hapa jütü Hompü Mo motuh.

²² Hyssop phenlak choung hük yah-ei iy shihpü dük kü hüngtuh, hatü shaden dangpong kü hatü shasho kü nyiotuh. Dhom hepak mangngoi thahshi am üpaiyao shem kübü laoei tedai.

²³ Mechem Shembüpai Ijip am jühen shingvaishi daihenshang, büpai shasho hatü shaden dangpong kü iy eejü büpa peih-ei lüdaihen, hatü büpai shennyak jüpü vangsho phongshan am shemei neshüshihhen hatü am nejütükhen.

²⁴ Am hatü ammei hühihathüi hapa mo düngei motuh.

²⁵ Shembüpai am kü shuohhen shei lahpü kahdokei mechem am leihenshang, ammi hapa mo vanyang kü motuh,

²⁶ hatü mechem ammei hühihathüi, ‘Hapa Mo mehe lappüang?’ shei phepüjü,

²⁷ ammi, ‘Hapayü Hompü Mo Shembüpa kü dhüm shuoh-ei monyüpeih; mehenangkü jen Ijiplei nyushi büpai Israel amei shem peü peih-ei daiyei büpai Ijip am jütükpeih, shejao büpai jen yangpeih’ shei etuh” shei eteke. Hahepak kü nanglakthüi aümei shaei khüm.

²⁸ Shembüpai Mosa hi Aaron nyi kü epükei Israel ami dük.

Hashongpathü Jütükpü

²⁹ Nyak jiam kü Shembüpai Ijip am hashongpathü peü; Pharaohlei hashongpa, üpa ong hean yahhen nyutepa ha kübü khoklatei küppüthülei hashongpathü hatü shongei shaanpü yemhimakthü peü jütük.

³⁰ Pharaoh hatü büpalei lakchongbüthü hatü Ijip am peü nyak kü paokemteke, hatü Ijip kü theppüyoungpai maei nyuteke; mehenangkü mahngsho nelempü shem hükao neshiüang.

³¹ Nyak kü Pharaoh-i Mosa hi Aaron nyi kü nyükei, “Anjiphen hatü Israel am kemei ngelei nanglakthü toueipü layaongei leidaishih! Anjinyi-i epükei leiyei Shembüpa kü khümtuh.

³² Anjinyi-i epükei ammei mi, mohoh hatü yum yahtuh hatü leidaituh, hatü ngei shingao moihiman yüei phopshih” shei e.

³³ Ijip ami nanglakthü kü kahdok kübü lomi layaongdaishih shei nyeanteke; jomi, “Am neleidaijema ham peü dishasha khih” shei e.

³⁴ Hanangkü nanglakthüi aan oukpü dük kü nyettükpü aan shihtü ashaki jümtü bhagchongei paitü leiteke.

³⁵ Israel ami Mosai epükei dük, hatü jomi Ijip am kü hon hi ngin hatü ashakviha yüteke.

³⁶ Shembüpai nanglakthü kü bamhen Ijip am kü yahyang shinshang mongdang jükhü, hatü jomi yüpü dou peü shuoh. Hapa keiha Israel ami Ijip amei mophimo yahlangteke.

Mülangpü

³⁷ Israel am Rameses kübü Sukkoth thahshi la mü dai. Nyüha hashih ne-ie-i baha mon haja kho vok hükshing nyuteke.

³⁸ Lebü shennyakthüao longi jom mü dai, hatü haümyem, mi hatü mohoh longi müei dai.

³⁹ Jomi Ijip leipü koei daipü aanthüngi daw neshihpü aan oukteke; mehenangkü jomü Ijip leipü ngangahük kü changei deitükpü nangkü bhaonghow yunglakhen nevaijü daw shihpü aan oukhen hepak nedang.

⁴⁰ Israel am Ijip kahdokei vangbong 430 thahshi nyu.

⁴¹ Vangbong 430 dohpü nyih Shembüpalei nanglakthü peü Ijip tuhphongtü dai.

⁴² Shembüpa shingvaishi hapa ya-ü jom Ijip leipü mülanghen mükpaonathapü ya nyuteke. Hapa ya-ü Israel am peüi hüdenhalenshi Shembüpa kü dhüm shuoh-ei mükpaonathaei baümhen ya nyuteke.

Hompü Mo Nangkü Shahkungnyü

⁴³ Shembüpai Mosa hi Aaron nyi kü, “Hathüyü Hompü Mo nangkü shahkungnyü: Lebü kung shennyaki hapa mo nehahhen,

⁴⁴ shejao shakei tuhpü aa hüki shongei shuw jappheikü mon büpai hahhen aok.

⁴⁵ Chem shingvaishi lakeiloiyei nevaijü lathahlatyingnüng peipüthüi ha hahnüng neaok.

⁴⁶ Hapayü nemnopü shemei-üng hahkemhen vongbong; ammi hapa phai shem leipü yahei chingdaüei tedai, hatü hapalei vang hükao temang.

⁴⁷ Israel am peüi hapa mo motuh.

⁴⁸ Am mü lakeiloiyei nyupü benhayaha hanei Shembüpa kü dhüm shuoh-ei Hompü Mo mohüjema, jom shem bahathü kemei shuw japtüktuh; shejüang büpai mo kü hean yahhen aok, hatü Israel bühü hük kei nohen aok. Shejao shuw nejappü shennyaki hapa phai hahhen neaok.

⁴⁹ Israel bühü hatü am mü loiyei nyupü benhathü kao hapa shahkung aihük mü notuh” shei eteke.

⁵⁰ Israel am peüi Mosa hi Aaron nyi kü Shembüpai epükei dük.

⁵¹ Hapa nyih-üng Shembüpai Ijip kahdok leipü Israel am khongmü khongmü müei leilang.