MÜLANGPÜ 1 - DAÜLANGPÜ LAIHING (BSI)

Ijiplei Israel am Dapüshepü

¹ Ijiplei Jakob mü laophü laophülei shemong müei daipü Israel hapeüthülei men hathü nyüke:

² Reuben, Simeon, Levi, Judah,

³ Issakhar, Zebulun, Benjamin,

⁴ Dan, Naphtali, Gad, hatü Asher.

⁵ Jakob kübü phaakpü hapeü hüpeüthü peüshep pejempüan nyuteke. Joseph payü sheleiüng Ijiplei nyuhamteke.

⁶ Nyuei daiyangkü Joseph hatü büpalei chejeihijei am hatü yienhihien peü didaikem.

⁷ Shejao Israel hapeüthü nanglak longi da, hatü wong koh-ei lei, hatü Ijip kahdokü jomi mateke.

Israel am kü Shüveidoideipü

⁸ Hahepak kü Joseph jung meheyao nenyingpü ongpa ja hüki Ijip kahdok kü ong vaiteke.

⁹ Büpai büpalei nanglakthü kü, “Veituh, ha Israel hapeüthüyü longi danyüke hatü jen mao wong kohpüpa nyüke.

¹⁰ Kei, jeni jom kü nemei-i dükshuohshah, hei nevaijema jom longi dahen hatü vehokpaoh vamjü jenei vepathü mü jom omtü jen khüei hokhen hatü jenei kahdok kübü nyaidaiphahen” shei eteke.

¹¹ Hanangkü Ijip ami jomphong douwong dükhühen nangkü jom shak kü dou kü hienbü jeyei tuh. Israel hapeüthüi ongpa shing hahying tuhshing chingnyü nyi, Pithom hatü Rameses ling.

¹² Shejao meshükpa jom bhih-eimaanei leitükhen shüvei, hajükpa jom nyeinya dateke; hanangkü Ijip ami Israel am kü nyemteke,

¹³ hatü Ijip ami Israel am douwong dükhüei shüveiteke,

¹⁴ hatü bhih hi yaongphaang nyetei, itayaong oukei hatü kah linghüei yangnyu-ü shahyaki hatü nyuhen neaoki leihü. Jomphongi jom kü shuohpü dou kempai wongbenüng nyu hatü phahji neshiüi noteke.

¹⁵ Ijip ongpai Hebrew am naü bühshingkü sheühteipü nyüthü meni, Shiphrah hatü Puah nyi kü,

¹⁶ “Mechem anjinyi-i Hebrew nyü hüki naü bühpü kü sheühhenshang, bahanaü vaijema jütüktuh; shejao nyühanaü vaijema yemmü tuhtuh” shei e.

¹⁷ Shejao naü bühjü sheühteipü nyüha nyi-i Kahvang kü nyem, hatü Ijip ongpai jiji kü eshuohpükei nedük, shejao bahanaüthü-ao yangei tuh.

¹⁸ Hanangkü Ijip ongpai jiji nyükei, “Anjinyi-i mehekei hapakei dükpa? Mehekei anjinyi-i bahanaüthü nejütüki yangei tuhpa?” shei pheteke.

¹⁹ Naü bühjü sheühteipü nyüha nyi-i Pharaoh kü, “Hebrew nyüthüyü Ijip am nyüthü kei nevai; mehenangkü jomphongü wong kohshi nyüke hatü henji shekü jomi hapeü angei landaitü nyunyüke” shei e.

²⁰ Hanangkü Kahvangi naü bühjü sheühteipü nyüha nyi kü bam, hatü nanglak longi da, hatü longi wong koh-ei leiteke.

²¹ Naü bühjü sheühteipü nyüha nyi kü Kahvangi bampü nangkü jijinyi kao laophü laophülei awdep yemhen shuohteke.

²² Hahepak kü Pharaoh-i büpalei nanglak peü kü, “Hebrew shemongsha kü bühpü bahanaü kemei Nile yung kü shüktüktuh, shejao ammi nyühanaü peü yangei tuhtuh” shei ngeükhüam shuoh.