MIKA 7 - DAÜLANGPÜ LAIHING (BSI)

Israel amei Mang

¹ Onyükei! ngeiyü aeipü shennyak hük pülei betjük nedangpükei, hatü nyalingngupai vü kü betjük nedangpükei khih. Nyalingngupai hatü adhajük ngei lümbenüng meheyao neshiü.

² Kahmük kübü Kahvang shennyak mahdaikem, hatü daülangpü shennyak hükao hangku khongkü aoei neshiü. Shennyak peüi iy-aongmashateihen mon danei nyüke. Peüi banghhikang kü laophülei jeihinaü vüshihnyüke.

³ Jomei laki mehe ten, ha longi manshi düknyüke; Ongthü hatü shahphenbüthüi yawhdou yünyüke, hatü longhiongthüi jomi ehüpükei ten enyüke, hatü jom peü chemi phaüshah shownyüke.

⁴ Jom meiden dohpeyü daümnyak hüh kei nyüke, peü mü daülangshemshepeyü hühying kei nyüke. Kahvangi mi yombüthü hatü thibüthü homei epü keiha nanglakthü hanghihühen nyih ngoiteke. Shaang jomü üathamapü kü nyüke.

⁵ Ammi chingnyü kü hingtelem, ammei küphü hük kü mongtelem. Nüngei nyüha touei dangkao mehe enya nüngi lituh, hatü nüngei ju yomtuh.

⁶ Hapeüi laophülei pa kü ne-ienelemi nonyüke, yiükhai laophülei hümlungnyü khüei, peipü yiüki laophülei nyei khüei yaongnyüke, shennyak hükei vepayü laophülei shem am-üng nyüke.

⁷ Shejao ngei payü, Shembüpa kü monglemei nyuhen, Ngei yemleipü ngelei Kahvang omdanei nyuhen. Ngelei Kahvangi ngei phoppü kü jangphahen.

Shembüpa i Yemleipü Koei Peinyeih

⁸ Oh ngelei vepa, nüngi ngei kü naamnyi tenyima; Ngei dolangmao shao ngei paokahen; Shaang ngei vangnyak kü nyulangmao, Shembüpayü ngelei vangngai vaihen.

⁹ Shembüpai mongshih anpü ngei kohen; mehenangkü ngei büpa khüei mang thahteke, büpai ngei shing chingmeilemlingei dah shakei mangling thahshi ngei munenhen. Büpai ngei vangngai touei mühen, hatü büpa yemleipü ngei eehen.

¹⁰ Hahepak kü ngelei vepai ha eehen, hatü ngei kü, “Shembüpa, nüngei Kahvang melei nyüpa shei epüthü veüpai dhe kü jümlanghen. Ngelei müki lekei pinnyü lomohpü eehen, hatü shaangao pinnyü-ü lemnyüvang kübü nyaühut kü nyeüpükei nyeütükhen.

¹¹ Ammei chingnyü pe linghen nyih ngoikünyüke; hapa nyih ammei kahmük viong daei daihen.

¹² Assyria kübü Ijip thahshi, Ijip kübü Euphrates thahshi, yungching kübü yungching thahshi, kahshang kübü kahshang thahshi, hapa nyih kü ammei nanglakthü lem peü kübü am touei thaikemkahen.

¹³ Shejao kahmük payü halei nyupü shennyakthüi dükpü mang homei lavüngtoiyei yakphonghen.

Shembüpa i Israel am kü Shinshangnyüke

¹⁴ Nüngei lenshuoh-i nüngei nanglak mithü, nüngei mükjüp mi khong haümtuh. Jom yingnyü yingmongei paüeiyonei lüdaijao, jom shonei phenha vunglak nyüke. Peihdaipü aivang nyih kü keiha, jomphong Bashan hatü Gilead phenni üh-ei haümtuh.

¹⁵ Am Ijip kahdok kübü vamei daipü nyih kü kei ngei jom kü yashanpü douthü huhen.

¹⁶ Jatthüi ha eehen, hatü jomei wong laaiyei jom veühen, jomi jomei ju kü laki shümlanghen, hatü jomei dhaong kü dhühlanghen.

¹⁷ Biü keiha jomi bhihla laiyei hahhen, jomi biü keiha lüei kamteihen. Jomi Shembüpa, jenei Kahvang kü nyemei leidaihen, hatü amphong kü nyemhen.

¹⁸ Nüng keiha lebü Kahvang neshiü, Oh Shembüpa, Nüngi aoei nyupü laophülei nanglakthülei mang tüknyüke; Nüng denden mongshih-ei nenyunyu, shejao düngei ham kü bampü huhen mongongnyüke.

¹⁹ Nüngi shao chem ham kü phahji huphahen; nüngi hamei mang nüngei labha-i shouptükhen, hatü yungching ilangmongei hingtükhen.

²⁰ Nüngi aivang den mü hamei bühipathü kü lahpü keiha, nüngi Jakob kü shahhing dükhen, hatü Abraham kü phahji yahyang huhen.”