MIKA 6 - DAÜLANGPÜ LAIHING (BSI)

Shembüpa i Israel am Khüpü Shahjang

¹ Shembüpai mehe enya, ha bangtuh: Yaongtuh, nüngei nang kahshangthü kü ejatuh, hatü nüngi epü kü shangchingthüi nyembangpha.

² Shembüpai thaüvaüpü kü bangtuh, Oh kahshangthü; hatü bangtuh am nedohnetenpü kahdoknyü chongnyiamthü. Mehenangkü Shembüpai laophülei nanglak khüei shahphenhen nyüke; Büpai Israel am khüei thaüvaü hük yah-ei peikünyüke.

³ “Ngelei nanglakthü, ngei am kü mehe dükpa? Ngei meshük am kü hanggovih kei chongküpa? Ha ngei kü eshih.

⁴ Ngei amphong Ijip leipü müei leipeih, hatü ngei am aa laphen kübü angei leipeih. Ngei am mülanghen Mosa, Aaron hatü Mariam shompeih.

⁵ Ngelei nanglakthü, Moab am Balak ongpai am kü mehedükhen küpjan tempa? hatü Beorlei cheha Balaami mehe jangshuohpa, deih-ei dangtuh. Ammi Shembüpai shahhing dükpü nyinghen shingvaishi Shittim kübü Gilgal thahshi yendai shingkü mehe heüpa, ha nyingtuh.

Shembüpa i Yüpü: Israel ami Jangpü

⁶ Shembüpa touei ngei mehe yah-ei peijahenang? hatü mekei vangsho Kahvang kü aümei khümhenang? Ngei büpa touei jakpü moila, bong hük lompü mohoh cheha müei peihen hiang?

⁷ Mi cheha haja longi müei peijajü, nevaijü olive mainga yungyen haja an mü mongmeihen je? Ngei pungpü nangkü ngelei hashong, ngelei mang nangjei ngelei büm kübü betjük shuohhen hiang?

⁸ Oh shennyak, mehe mei büpai ha am kü eteke. Shembüpai jen leipü yüpeyü ha khih: Mehe shahhing ha dükhen, düngei bampü huhen, hatü jenei Kahvang mü munenei kamhen.

⁹ Bangtuh, Shembüpai chingnyü kü nyüknyüke, hatü Shembüpalei men kü nyemhenü kon kohpü nyüke. Bangtuh, Oh jat hatü chingnyü kü thaiyei nyupüthü!

¹⁰ Mangthülei shem kü shahhing ne-epü mopthü thaiyei shüngpü, hatü jiühitshi dok güh-ei dok dokpü ngei be-aokhen je?

¹¹ Güh-ei lüng shetpü hatü dok gühpü shennyakthü kü ngei mekei etü mang tükaokhen?

¹² Ammei shemmeithüi üpteinyüke; ammei shennyakthüi shahshem enyüke, hatü jomei jubenyeijaangi lueilemei enyüke.

¹³ Hanangkü ammei mang nangkü ngei am mahtükhen, hatü mahtükhen chongpangtepih.

¹⁴ Ammi hahhen shejao shümoh nemeihen; ammei shünyü aeipai kongmü nyuhen. Ammi thaiyei yoei tuhhen shejao ne-angaokhen, mehe ammi yoei tuhhen, ha ngei vehok kü mahtükhen.

¹⁵ Ammi sheili sheihen shejao ha ammi nevetpih; ammi olive kübü mainga bhithen, shejao ha ammi nenoteiaokpih; ammi nyalingngupai ngümhen, shejao ha kübü yiü neyinghen.

¹⁶ Mehenangkü amphongi Omri ongpa, hatü büpalei cheha Ahab ongpa nyi-i dükbenüng douten dükpü nangkü ha vamkahen, hatü ammi jomei vanglem kü kamteke. Hanangkü ngei am mahtükhen, hatü peüi am yaktükhen. Jatli nanglak peüi am kü ne-ienelemi noteihen.”