MIKA 5 - DAÜLANGPÜ LAIHING (BSI)

¹ Ammei veshanthü temtuh, Oh Jerusalem chingnyü veshanthü; mehenangkü jomphongü shümlangteke. Jomi Israel amei vanglem lembüthülei nameen kü nyiamlüngi bheihen.

Kahvangi Vanglem Lembü Hük Peihen Lahpü

² Shejao nüng, Oh Bethlehem Ephrathah, nüng Judah phang khongkü maanpü vailangmao, nüng kübü Israel shak kü ngei shing vanglem lemhen hük vamhühen. Büpa vamshing bülemü aivang hepak kübü chongkahen.

³ Hanangkü nyüha üpa büm nekongi nyüpa, pinnyülei yeshang mangbüh thahshi, hatü büpalei aopü jeihinaüthü nyokei Israel am mü mangshep thahshi büpai Israel am yaktükhen.

⁴ Mechem büpa peihenshang, Shembüpalei wong kü, hatü Shembüpa, büpalei Kahvang müknyinshekhang men kü büpai laophülei mithü haümhen, hatü jom yangei nyuhen; mehenangkü büpa kahdoknyü dohpü ngoishi longpü vaihen,

⁵ hatü büpayü jomei chingmei vaihen. Mechem Assyria am jenei kahdokei peiyei jenei penyüsha benei shükahenshang, jeni jom khüei hokhen wong kohpü jenei mübüthü shomhen.

Yangpü hatü Hanghi

⁶ Jomi Assyria kahdok yanlui, hatü Nimrodei kahdok kü yanlu haongtü vanglem lemhen. Mechem jom jenei viong thahshi peihenshang, büpai jen Assyria am lak kübü yanghen.

⁷ Jakob nanglak aopüthüyü shennyak longi khongkü Shembüpai shompü nyien kei nyuhen, hatü shennyak hangku danei nenyupü phenha shang kübü vanglah kei nyuhen.

⁸ Jakob nanglak aopüthüyü jatthü chi kü, nanglak longi chi kü, phaüyem chi kü mailang hük keiha; mithü khong kü mailang cheha kei jom kü laongei shükhen, hatü bhin mü bhin mü shaaktükhen, hatü üpaiyao jom neyanghen.

⁹ Ammei vepathü shak kü aokpü dangei ammei lak haonghen, hatü ammei vepathü peü jütükhen.

¹⁰ Shembüpai enyüke, “Hapa nyihhihe kü ngei ammei koyeithü, hatü ammei veyom shing peü bentükhen.

¹¹ Ngei ammei kahdok kübü chingnyüthü mangtükhen, hatü ammei veyom shing peü bentükhen.

¹² Ngei ammei thihivamthü mahtükhen, hatü am phongyom hingletpü hajük kü nenyuhen.

¹³ Ngei ammei lajeithü mangtükhen, hatü ammei daülangpü yaong shemnyüthü nihtükhen, hajük kü ammei laki lingpü lakdou kü aümei nekhümhen.

¹⁴ Ngei ammei kahdok kübü Asherah kahvang lajeithü bhiyei yaktükhen, hatü chingnyüthü mangtükhen.

¹⁵ Ngei mongshih anpai ngei epü venlepü jatlithü kü bhüh yemhen.”