MIKA 3 - DAÜLANGPÜ LAIHING (BSI)

Mübüthü kü Shahphenpü

¹ Hathü ngei eteke: Bangtuh, amphong Jakob mübüthü, hatü am Israel phang kü vanglem lembüthü: Shahhing nyinghenü am shing nevaipü je?

² Ammi mei jiühitnyüke, ten küang bamnyüke; Ammi ngelei nanglakthülei shuw shaaknyüke, hatü jomei vang kübü phai nyiuktüknyüke;

³ Ammi ngelei nanglakthülei phai hahnyüke, hatü jomei shuw nyiuknyüke, hatü jomei vang khih mü nihtüknyüke, hatü haodük leipü phaiphukei khih mü dehtüknyüke.

⁴ Hahepak kü jomi Shembüpa kü lenei wonghen, shejao büpai jom kü nejanghen. Hahepak kü büpalei dhe jom kübü jolanghen; mehenangkü jomi mang dükpü nangkü.

Shahshem Thibüthü kü Shahphenpü

⁵ Shembüpai thibüthü nang hapakei enyüke: “Ngelei nanglakthü lemnyong kü müpü thibüthü nangkü, hanei-i hahhen yahshuohjema, chingmei vangmei nyutuh” shei baongnyüke, Shejao üpai hapakei nedükshuohhen, büpa khüei vehokhen jomi temnyüke.

⁶ Hanangkü manghkhang neshiüi am shak kü vangnyak peikahen, tetpüvanpü neshiüi shangmang peikahen. Thibüthü shingvaishi vanghe shüdaihen, hatü jom shingvaishi nyihnüngü vangnyak leidaihen.

⁷ Eeaokpü mükngan nyupüthü veü ponghen, hatü manghkhang kohpüthü hai danghen. Kahvang leipü jangpü lanshei neshiüpü nangkü jomei ju kümei dhe kü jümlanghen.

⁸ Shejao ngei shingvaishi payü Jakob kü jom pungpü, hatü Israel am kü jomei mang eshuohhen, Ngei kü Shembüpalei laangha, hatü ngan hatü shahhingi maei nyüpeih.

Jerusalem kü Shahphenpü

⁹ Ha bangtuh, am Jakob phang mübüthü, hatü am Israel phang kü vanglem lembüthü, ammi shahhing yaktüknyüke, hatü jiüpü peü nyongnyongi lingtüknyüke.

¹⁰ Ammi Kahvangei chingnyü, Zionü jüteipai, hatü Jerusalemü shahshem mangi chongnyiam lingnyüke.

¹¹ Hapa chingnyü vanglem lembüthüi yawhdou shingvaishi shahphennyüke, haleipü ngongpathüi shünyü shingvaishi mon shahkungnyü nyuhnyüke, haleipü thibüthüi mop shing mon teteivannyüke; Shejao jom peüi Shembüpa jom mü nyüpeih shei enyüke. “Shembüpa jen mü nyüpeih, mehe shanghah vongshüh-ao nepeiküpih” shei enyüke.

¹² Mehenangkü am tata kü Zionü kah kü han hokpükei hokei yaktükhen, Jerusalemü nyüp yakshing leitükhen, phopshemü pheni luplanghen.