MIKA 1 - DAÜLANGPÜ LAIHING (BSI)

¹ Judah amei ongthü Jotham, Ahaz, Hezekiah, hathüi vanglem lempü denshem kü Samaria hatü Jerusalem nangkü Moresheth am Mikah touei shakei vampü Shembüpalei shah büpai eepü manghkhang.

Samaria hatü Jerusalem Shahphenhen Nang

² Bangtuh, Oh jatli nanglakthü peü, Bangtuh, Oh am kahdok shak kü nyupüthü peü, Jeiyong Shembüpai am khüei denpü shuohhen, Shembüpai büpalei daülangpü moila shem kübü enyüke.

³ Veituh, Shembüpai daülangpü büpa nyushing kübü vamei peikünyüke, hatü büpa yiüei kahdoknyü kübü kahshangthü kü shouphen.

⁴ Aw touei püjiü nyaüdaipü keiha, kahshang kübü kahjilei yung laongpü kei kahshangthü nyaüdaihen, hatü kahjithü kaei handaihen.

⁵ Hathü kemei Jakobi mang thahpü nangkü, hatü Israel ami mang dükpü nangkü ha vamkahen. Jakobi mang thahpü kü üpa nyonghühen? Hapayü Samaria am nevaipü je? Judah am lajei kü khümpü kü üpa nyonghühen? Hapayü Jerusalem nevaipü je?

⁶ Hanangkü ngei Samariayü nyüp yakshing hük, nyalingngupai sheihen shing hük leihühen. Ngei haleipü yaongthü paangei kahjilei shantükhen, hatü pinnyülei chongnyiam shing kong leitükhen.

⁷ Pinnyülei pü lajeithü khih mü nihtükhen; hatü phopshemei büm yupüthü kü shuohpü lakleithü peü awi shamtükhen, hatü halei nyupü pü lajeithü peü ngei mahtükhen. Mehenangkü Samaria ami büm yuei hathü dangpü vütei-i büm yupü am kü-üng shuoh-ei kemtükhen.

⁸ Hanangkü ngei thephen hatü younghen; ngei labha-i hatü bümkong kamhen. Ngei mahu-i kei mahng thephen, hatü Ostrikh ou kei youngei nanghen.

⁹ Mehenangkü pinnyülei ma nemeiaokhen mü nyüke, hatü hapa aihük mü Judah amao hanghihen nyüke. Hapa hanghi ngelei nanglakthü nyupü Jerusalem penyü shaden ngoiteke.

Vepathü Jerusalem Ngoipü

¹⁰ Gath kü nyupü vepathü kü jen lomohpü jung te-eshuoh; Jen theppü youngpü jomi te-eehü. Beth-Ophrah kü amphong kübhih lüpshi lüteituh.

¹¹ Amphong Saphir kü nyupüthü, bümkong hatü veüpong kü khoklatei daituh. Zaanan kü nyupüthü chingnyü kübü vamei tedai. Mechem Beth-Ezel am mahng theppü ammi danhen, halei am loishing neshiü shei ammi nyinghen.

¹² Üam Marothlei nyu, meihen shingvaishi ongyangei dannyüke, mehenangkü SHEMBÜPAleipü hanghi Jerusalem penyüsha thahshi peiteke.

¹³ Üam Lakhishlei nyu, vehok koyeithü kü ve-ow temtü deishihtuh. Zion yiükhathü kü mang panghüpeyü amphong nyuhampeih; mehenangkü Israel amei mangthüyü am kübü vampeih.

¹⁴ Hanangkü am Judah nanglakthü, Moresheth, hatü Gath kü nyupü shennyakthü kü nyue shei etuh; Israel ongthü shingvaishi Akhzib jila kü nyupüthüiyü lawlüppü am shei nyinghen.

¹⁵ Mareshah kü nyupü nanglakthü, ngei amphong neütükhen wong kohpü vepa hükei lak kü shuohtükhen, Israel mübüthü Adullamei heih-ei yaongshalei johen.

¹⁶ Ammi mong hahpü hapeüthü nangkü mongkü tüngei theppai sho chaei kuptüktuh. Am nyingi langdalei shangjing kei shangpaangtüktuh; mehenangkü ammei lak kübü yanei jom wüpküpei daihen.