MENVIH KESHO 7 - DAÜLANGPÜ LAIHING (BSI)

Shahhing Nangkü Phoppü

¹ Oh Shembüpa ngelei Kahvang, ngei nüng kü loinyüpeih; Ngei kü changpüthü kübü ngei yangtuh,

² hei nevaijema mailangi keiha jomi ngei shaaktükhen; hatü ngei yanghen üpayao neshiüi khih mü shaaktükhen khih.

³ Oh Shembüpa, ngelei Kahvang, ngei ha düktüktü nyujema, hatü ngelei laki shaitükpü nyujema,

⁴ ngelei küphü kü ten dükshuoh-ei nyujema, nevaijü meheyao nevaipükü ngelei vepalei dou yahlangei nyujema,

⁵ ngelei vepathü ngei kü changei nyemyep, jomi ngei kahdokei nyeanei nyemshouptük, hatü kübhih kü nyemdungtük.

⁶ Nüng mongshihpai yaongtuh, Oh Shembüpa; ngelei vepathü mongshihpü khüei yaongtuh; Paotuh, ngelei Kahvang, shahhing shahkung lingtuh.

⁷ Nanglak khong nüng shonei thaihütuh, hathü shak kü uotü nüngi vanglem lemtuh.

⁸ Shembüpai nanglakthü kü shahphennyeih; ngei daülangshemshepü aimü; Oh Shembüpa; ngei kü nyupü shahhing aimü nüngi shahphentuh, Oh Jaipüba.

⁹ Oh nemeipüthülei douten dohhütuh, shejao daülangpüthü chonglinghütuh, nüngi mongdang hatü sholi doknyeih, Oh daülangpü Kahvang.

¹⁰ Kahvangü ngelei inyüshung, büpai mongdang daülangpüthü yangnyeih.

¹¹ Kahvangü shahhing shahphenbü; hatü nyihjeih mongshihpü Kahvang.

¹² Jom mong nelepjema, büpai yan yühen; büpai laophülei pülah künyüpeih,

¹³ büpai laophülei dihen leü kohpü lahhilaong temteke; büpai laophülei lahhan temnyüke.

¹⁴ Mekei jomi mangi büm nekongi leinya, hatü shanghah koshi nyutü shahshem bühnya, ha kü veituh.

¹⁵ Jomi kahsha shonyüke, hatü jomi shohahpü kahsha kü vünyüke.

¹⁶ Jomi lingpü shanghah-i jom kü-üng hetnyüke, jomi iy-aongmashapai jom kü-üng hetnyüke.

¹⁷ Shembüpa daülangshemshepü nangkü ngei büpa kü menvih shuohhen, Jaipüba Shembüpalei menkü ngei menvih kesho lokhen.