MENVIH KESHO 2 - DAÜLANGPÜ LAIHING (BSI)

Kahvangi Jepü Ong

¹ Mehekei jatthüi phaüshah shownya? hatü nanglakthüi angsha kon lingnya?

² Kahdoknyü ongthü jom nyingi, hatü vanglem lempüthüi chemi thaitü Shembüpa, hatü büpai thiteiphupü Hük khüei,

³ “Jeni jomei nyiamvü phentükshah, hatü jen toueipü jomei vü yaktükshah” shei enyüke.

⁴ Vangsholei ong uoshing kü uopü Hüki nyinyüke, Shembüpai jom kü yaünyüke.

⁵ Hahepak kü büpai jom kü mongshih-ei lohnyüke, hatü lohpai jom nyemhüei,

⁶ “Ngei Zion kü hatü ngelei daülangpü shangtao kü Ong hük uohütepih” shei enyüke.

⁷ Ngei Shembüpalei shahkung baonghen: Büpai ngei kü, “Nüngü ngelei ha; shinnyih ngei nüngei Pa leitepih” shei eteke.

⁸ Ngei kü yütuh, hatü ngei nüng kü jatli peü mükjüp vaishi shuohhen; kahdoknyü dohpü thahshi nüng lompü vaihen.

⁹ Nüngi nyiamlüng hük notü jom mangtükhen, nüngi jom haümdük nihpükei khih mü nihtükhen.

¹⁰ Hanangkü ongthü, kon kohtuh; shahvüng bangtuh, amphong vanglem lempüthü.

¹¹ Nyempai Shembüpa chongphotuh, hatü mongongpai kheütuh.

¹² Büpa mongshihpai nüng dailemei mahtükmang kü Chehalei la kü jüptuh; mehenangkü büpa mongshih lomi vamkahen. Büpa kü loipüthü peü moihiman.