MENVIH KESHO 148 - DAÜLANGPÜ LAIHING (BSI)

Kahvangei Müknyinshekhang kü Vihpü

¹ Shembüpa vihtuh! Vangsho leipüthüi Shembüpa vihtuh; shaopüpa kü büpa vihtuh!

² Vangsho phongshanthü peüi büpa vihtuh; vangsho veshanthü peüi büpa vihtuh.

³ Vanghe hatü lennyüi büpa vihtuh; nyapü lithathüi büpa vihtuh!

⁴ Shaopü vangshothüi büpa vihtuh; hatü vangshothü dok kübü yungthüi büpa vihtuh.

⁵ Hathüi Shembüpalei men longhütuh; mehenangkü büpai ngeükhüam shuohtü hathü lingteke.

⁶ Büpai hathü den shing lingei tuh; jom lenei nedaihen mü büpai shahkung chanei tuh.

⁷ Kahdoknyü leipüthüi büpa vihtuh; yungching yemthü hatü ilangmongi büpa vihtuh;

⁸ klang hatü shüyaong, shü hatü phumthüi, hatü yinglükpalei-i büpalei shah bangnyüke.

⁹ Kahshang hatü shangtaothü peüi; betjük pü hatü cedar püthü peüi;

¹⁰ phaüyem hatü haümyem peüi; laonghiyak hatü ouhiyüh peüi büpa vihtuh.

¹¹ Kahdoknyü hatü nanglak peüi; ong hatü vanglem lempüthü peüi;

¹² nethe hatü nelathü peüi, behe hatü hashih peüi büpa vihtuh.

¹³ Jomi Shembüpalei men longhütuh; mehenangkü büpalei men monha longei anshihhen; büpalei müknyinshekhang kahdok hatü vangsho shak kü nyüke.

¹⁴ Büpai laophülei nanglakthü shing vaung; büpa kü hinglempüthü, hatü büpa yopailei nyupü Israel nanglakthü shing vihpülüpü vamhüteke. Shembüpa men longtuh!