MENVIH KESHO 141 - DAÜLANGPÜ LAIHING (BSI)

Om mü Phoppü

¹ Ngei nüng kü nyüknyeih, Oh Shembüpa; ngei touei lomi peikei; ngei nüng kü nyükshingkü ngelei ngeü kü dhaong shaangshihma.

² Nüng touei ngei phoppü ayingshü keiha yahtuh, hatü ngelei lak om kü shuohpü moila kei haongnyeih.

³ Ngelei ju yomtuh, Oh Shembüpa; ngelei jubenyeijaang kü veishi nyutuh.

⁴ Nemeipü dükpüthü münang nekongi nyuhen mü nüngi ngelei mong ten lemei teleplang; jomei hetmeiyungma ngei tehahhü.

⁵ Daülangpüthüi ngei kü bheihütuh; hinglempüthüi ngei kü yeanhütuh. Nemeipüthülei mainga-i ngelei shangjing kü tenyiohü; mehenangkü düngei ngei phoppeyü jomei douten khüei nyüpeih.

⁶ Mechem jom nyonghühen am kü jom lanei shuohtükhen, shejüang jomi ngelei shahthüyü shahhing khih shei nyinghen.

⁷ Yaongnyü hük bhaokei kahdok shak kü yaütükpü keiha, jomei vangtaothü mahngchong shakei yaüphonghen.

⁸ Shejao ngelei mük nüng kü mon veinyeih, Oh Kahvang, ngelei Shembüpa; nüng kü ngei loinyeih; nüngi ngei dipü kü teshuohtük.

⁹ Jomi ngei kü haenpü aet kübü, ten dükpüthülei tai kübü ngei yangtuh.

¹⁰ Ngei mon yangtü nemeipüthüi jomei tai kü manhütuh.