MENVIH KESHO 102 - DAÜLANGPÜ LAIHING (BSI)

Shanghahpü Nethe Hüki Phoppü

¹ Ngei phoppü bangtuh, Oh Shembüpa; ngei lenpü nüng touei peihütuh.

² Ngei shanghahpü nyih nüngei dhe ngei toueipü tejodai. Nüngei dhaong shaangshih, ngei nyükpü nyih shülangi ngei kü jangshih.

³ Mehenangkü ngelei nyih-ü awshit kei peihdainyüke, hatü ngelei vangü awbhaong kei bahnyüke.

⁴ Ngei mong yimei thüng keiha kaudainyüke; nük dangkao nehah-aoki juwdaiteke.

⁵ Ngei wongmü youngpü nangkü ngeiyü vang kü shuwi jümdaiteke.

⁶ Ngeiyü phaüou keiha, hatü chingkong kübü ashühlaongkaong kei leidaiteke.

⁷ Ngeiyü yemmü lemshi nyunyeih, ngeiyü shem adok leipü oulom kei leidaiteke.

⁸ Helushoei vepathüi ngei kü yaünyüke; ngei kü naamei epüthüi ngelei men noei thaüvaünyüke.

⁹ Mehenangkü aan keihangei depla hahnyüpeih; hatü yingpü yung mü mükphi vuktü yingnyüpeih.

¹⁰ Hayü nüng mongshihpü, hatü mongpuk vampü nangkü khih. Nüngi ngei noei antü yaktükpeih.

¹¹ Ngelei nyihthüyü om kübü vangdhüm laang keiha; ngeiyü thüng kei kaudaiteke.

¹² Shejao Oh Shembüpa, nüngü den kü ong uoshingei nyüke; nüngei men hüdenhalenshi nyunyüke.

¹³ Nüng yaonghen hatü Zion kü phahji huhen, mehenangkü hapayü ha kü bamhen hepak hük; ittükpü hepak ngoiteke.

¹⁴ Mehenangkü nüngei chongphobüi yaongsho püchong kübhih yaongphaang peü kü bamnyüke.

¹⁵ Jatthüi Shembüpalei men kü, hatü kahdoknyü ongthüpeüi büpalei müknyinshekhang kü nyemhen.

¹⁶ Mehenangkü Shembüpai Zion linghen; büpa müknyinshekhangpü kü vamkahen.

¹⁷ Nehahneyingpüthüi phoppü kü büpai banghen, hatü jomi phoppü neyaktükhen.

¹⁸ Ngoikahen denshem peü shingvaishi ha nyangei tuhtuh, shejao mangbüh mangpaümpüthüi Shembüpalei men longhen.

¹⁹ Büpai daülangpü shangeipü veinyüpeih, vangsho leipü Shembüpai kahdoknyü kü veinyüpeih.

²⁰ Khoklatei nyupüthüi theppüyoungpü dannyeih; dihen nyupüthü bümei leihünyeih.

²¹ Hanangkü Shembüpalei men Zionlei, hatü büpa vihpü Jerusalemei baongnyüpeih.

²² Nanglak hatü ongchingthü chemi Shembüpa khümnüng thainyüke.

²³ Büpai tavanshem kü ngelei yangnyu bhagtük; büpai ngelei yangnyu nyih shotükhü.

²⁴ “Oh ngelei Kahvang, ngelei yangnyu tavanshem kü neyahlang, nüngü hüdenhalenshi nyunyeih” shei ngei eteke.

²⁵ Hepak longi daiteke, nüngi kahdoknyü chongnyiam lingteke, hatü vangshothüyü nüngei lakdou.

²⁶ Hathü mahdaihen, shejao nüng den kü nyuhen; hathü peü ashak chang kei leidaihen. Nüngi hathüyü owhiai kei jeiteihünyeih, hatü hathü peihdainyeih.

²⁷ Shejao nüngü den kü aihük, nüngei bongthü dohpü neshiü.

²⁸ Nüngei chongphobülei hapeüthü yangei nyuhen; jomei hühihathü nüng nyushingei chonglingei nyuhen.