MENVIH KESHO 10 - DAÜLANGPÜ LAIHING (BSI)

Shahhing Nangkü Phoppü

¹ Oh Shembüpa, mehekei nüng ngei toueipü taishi lüdainya? Shanghahpü nyih kü mehekei nüng jodainya?

² Nemeipüthü changmeiyei taopathü kü shüveinyüke; Jomi linghahpü tai kü-üng jom manhütuh.

³ Nemeipüthüi laophülei mongi lümpü kü changmeinyeih, hahnempü shennyaki Shembüpa kü thaüvaütü yakphongnyeih.

⁴ Changmeipai nemeipüthüi büpa neyemnyih; büpalei mongdeih kempü kü Kahvang kü shing neshuohnyih.

⁵ Nemeipüthüang lemphü kü meilem dangei aokpü dangnyeih, büpa changmeipü nangkü nüngei shahkungnyü büpa toueipü taishi lüdaiteke; büpai laophülei vepathü kü yaüeilungnyeih.

⁶ Büpai laophü nyingi, “Mepaiyao ngei nejenlenhühen; Ngei düngei mongongshi shanghah mechemao nepongi nyuhen” shei enyeih.

⁷ Büpalei ju-ü thaüvaü, shahshem hatü shüveidoideipai maei nyüke; büpalei yeijaang kü shanghah, hatü ten mon nyüke.

⁸ Büpai chingthülei tapei dannyeih; joshi büpai mang neshiüpüthü jünyeih. Neaoknethangpüthü lomohhühen shoukei veishi nyunyeih.

⁹ Büpayü phenha mongei mailangi kei peekshi dannyüke; Büpai neaoknethangpü am yephen dannyeih. büpai taopathü tai kü manei shüei leilangnyeih.

¹⁰ Neaoknethangpüthü ngümtüktü lomoh-ei lemshi nyunyeih; nemeipülei wong neneüi lomohnyeih.

¹¹ Büpai laophü nyingi, “Kahvangi ha betüktih; büpai laophülei dhe jümlangtü sheyü ne-eenyih” shei enyüke.

¹² Paotuh, Oh Shembüpa, Oh Kahvang, nüngei lak haongtuh; nüngi ponghahpüthü tebetük.

¹³ Mehekei nemeipü shennyaki Kahvang yaktüknya? hatü büpalei mongei, “Büpai ngei kü ha nangkü nenyükphapih” shei enya?

¹⁴ Shejao Oh Kahvang, nüngi shanghah hatü mongshang nyingnyüke, hatü nüngi ha kü sheühhen temei nyüke; Neaoknethangpüthüi nüng kü lanei shuohnyüke; nüngü hashihhathü kü sheühnyeih.

¹⁵ Nemeipü hatü mang dükpüthülei lak bhagtüktuh; Yemei mangdangkem thahshi nüngi jomei mang yemtuh.

¹⁶ Shembüpayü den dok kü den ongpa; büpalei kahdok leipü jatthü mahdaihen.

¹⁷ Oh Shembüpa, nüngi maanpü leipüthüi phoppü dannyeih; nüngi jomei mong wong kohhühen, nüngi jomi lenpü kü bangtuh,

¹⁸ hangkui hajük kü nyem neshaohen shingvaishi nüngi hashihha, hatü ponghahpüthü khüambakei shahhing shahphenhen.