MATHI 9 - DAÜLANGPÜ LAIHING (BSI)

Büm Bhaoei Didaipü Shennyak Meihüpü

¹ Büpa ai mongei shüpheikü yung homei büpai laophülei jila yemei leidai.

² Hahepak kü hanei ami büm bhaoei diyei tüngpü shennyak hük lüngei lemtü paiyei büpa touei pei. Mechem jom hinglempü Jisui eepa, büpai hapa tüngpü shennyak kü, “Monglongtuh, hapeü! Nüngei mangthü tüknyeih” shei e.

³ Hahepak kü shahkung nyuhbüthü hanei-i, “Hapa shennyakü Kahvang eelaei enyüke” shei langmaanei e.

⁴ Shejao jomi deihpü Jisui nyingei, “Ammei mongkü mehekei ten deihnya?

⁵ ‘Nüngei mangthü tüknyeih’ shei ehen yopü hi, ‘Yaongtuh hatü kamtuh’ shei ehen yopüang?

⁶ Shejao hapayü kahdoknyü kü Shennyak Ha kü mang tükhen wong nyüke shei ammi nyinghen nangkü hih”. Hapheikü büpai tüngpü shennyak kü, “Yaongtuh, nüngei lüng paitü shemei leidaituh” shei e.

⁷ Hanangkü büpa yaongei shemei leidai.

⁸ Mechem khongi ha eepa, jomphong nyempai ma, hatü hangku kü hapa keipü wong shuohpü Kahvang kü müknyinshekhang.

Mathi kü Nyükpü

⁹ Jisu hatoueipü daishingkü büpai shennyak hük Mathi shei mentü lat thaipü officelei uoshi eeyei büpai büpa kü, “Ngei phei mükei” shei e. Büpa haleipü yaongei büpa phei mü.

¹⁰ Mechem Jisui Mathi am shemei hahyingei nyupa, lat thaibüthü hatü mangthü longi peiyei büpa hatü büpalei nanglomthü mü hahying.

¹¹ Mechem Pharisee ami ha eepa, jomphongi büpalei nanglomthü kü, “Mehekei ammei nyuhbüi lat thaipü hatü mangthü mü hahyingnya?” shei phe.

¹² Ha danei Jisui, “Meishi nyupüthü shingvaishi meli nobü napü neshiü, shejao tüngpüthü shingvaishi nadang.

¹³ Shejao daituh hatü, ‘Ngeiyü jakpü moila nevai, phahji napeih’ shei epü mehe lappa, ha nyinghahtuh. Mehenangkü ngeiyü daülangpüthü nevai, mangthü nyükhen peipeih” shei e.

Shüaeiyunglehen Nang Phepü

¹⁴ Hapheikü Johan baptükbülei nanglomthü büpa touei peiyei, “Ham hatü Pharisee am düngei shüaeiyunglejü mehekei nüngei nanglomthü shüaeiyungleyei nenyunya?” shei e.

¹⁵ Jisui jomphong kü, “Yiükyahpa yiükjing yenthü mü nyupü thahshi jom thepnüng neaok, vaila? Yiükyahpa jom toueipü yahlanghen hepak hük peikahen, shejüang jomao shüaeiyunglehen.

¹⁶ Üpaiyao ashak chang kü ashak ja namei nethüngnyih, namei thüngpai nyeinya nemei-i shaakdainyeih.

¹⁷ Nevaijü üpaiyao phaishuw khoung chang kü yiüja neshihnyih; hapakei shihjema phaishuw khoung bhaodainyeih, hatü haleipü yiü yendainyeih, hatü khoung mangdainyeih; shejao yiü ja khoung ja kü shihnyeih; hapa keiha nyiphen meishi nyunyeih” shei e.

Yiükha Hük Didaipü Yangpü hatü Nyüha Hük Meihüpü

¹⁸ Mechem büpai jomphong kü hathü shah eyei nyupa, ngangahük kü Sinagog leipü mübü hük peiyei büpa touei aümei shatü, “Ngelei yiükha shaang-üng didaiteke; nüng peiyei laki mon hongshuohjü pinnyü yangkahen hih” shei khümei e.

¹⁹ Hanangkü Jisu layaong hatü büpalei nanglomthüao büpa phei mü.

²⁰ Hahepak kü nyüha hük bong anpünyi thahshi iy yenei tüngei nyupü büpa phei müei heih-ei büpalei ashakjung kü hong;

²¹ mehenangkü pinnyü nyingi, “Ngei büpalei ashakjung kü dangkao hongjema ngei meidaihen” shei ehahteke.

²² Jisui yaakei veishingkü pinnyü eeyei büpai, “Monglongtuh, lamei; nüng hinglempai nüng meiteke” shei e. Hahepak kü-üng hapa nyüha meidai.

²³ Mechem Jisui hapa mübülei shemei shüpa, büpai mahng kü lokpühaipü hatü owpühupü eeyei,

²⁴ büpai, “Amphong vamdaituh; mehenangkü naü-ü dipü nevai, shipü khih” shei e. Hanangkü khongi büpa kü nyishuoh.

²⁵ Shejao mechem khong chingshelei vamdaipa, büpa mongei shüei laki pinnyü kü shoung, hatü ha naü yaong.

²⁶ Hapa shahjang ha kahmük peülei yaüei dai.

Jisui Mükphüngpa Nyi Meihüpü

²⁷ Jisu haleipü daishingkü mükphüngpa nyi büpa phei kü, “David Ha, henji kü phahjishih!” shei wong mü lenei mü.

²⁸ Mechem büpa shemei shüpa, mükphüngpa nyi büpa touei pei, hatü Jisui jiji kü, “Ngei hapa dou dükaokhen shei anjinyi-i hinglemnyu je?” shei phe. Jijinyi-i büpa kü, “Hih, Shembüpa” shei e.

²⁹ Hahepak kü büpai jijilei mük kü laki hongtü, “Anjinyi-i hinglempükei ha nyemdük” shei e,

³⁰ hatü jijilei mük eeteke. Hahepak kü Jisui jiji kü, “Ha jung üpa kao tenyinghü” shei e.

³¹ Shejao jiji daiyei hapa kahmük kempülei hapa shahjang baongteke.

Jisui Shah Ne-epü Hük Meihüpü

³² Jomphong daipheikü mang laangi yepei shah ne-epü shennyak hük büpa touei müei pei.

³³ Mechem mang laangha changtükpa, shah ne-eaoki nyupü shennyaki shah e, hatü khongi yashanei, “Henüng keipü Israel kü chemao ne-eeangpih” shei e.

³⁴ Shejao Pharisee ami, “Mang laanghathülei ongpai ngan shuoh-ei büpai mang laanghathü changtükpeih” shei e.

Hah Meandai, Nanglak Neshiü

³⁵ Hapheikü Jisui chingnyü chingha peülei daiyei jomei Sinagoglei nyuh, hatü ongching jung shahjangmei baongei, din lemphü hatü tüngpüthü meihüei dai.

³⁶ Mechem büpai khongnyü eepa, büpai jomphong kü shinshangei deih; mehenangkü jomphongü ponghahpü hatü sheühbü neshiüi mi yombü neshiüpü mithü kei nyuteke.

³⁷ Hahepak kü büpai nanglomthü kü, “Hah meandaiteke, shejao nanglak maani mon nyüke;

³⁸ hanangkü hah vethen shingvaishi hah vetbü Shembüpa kü nanglak shomhen phoptuh” shei e.