MATHI 8 - DAÜLANGPÜ LAIHING (BSI)Jisui Ngombü Hük Meihüpü ( Mk. 1:40–45 ; Lk. 5:12–16 ) 1 Mechem Jisu kahshang leipü leipa, khongnyü longi büpa phei mü; 2 hatü ngombü hük büpa touei peiyei aümei shatü, “Shembüpa, nüngi mongjema, nüngi ngei meitükshih” shei khümei e. 3 Büpai lak haongei büpa kü düktü, “Ngei mongnyüpeih, nüng meidaituh” shei e. Shaang tou aa kü hapa ngomdin meidai. 4 Hahepak kü Jisui büpa kü, “Nüngi mih üpa kao ha jung te-e, shejao daiyei ngongpa kü hueishuoh, hatü Mosai epükei jom touei denpü hük vaihen thintho yah-eishuoh” shei e. Jisui Rom am Longpü Hükei Chongphobü Meihüpü ( Lk. 7:1–10 ) 5 Mechem büpa Kapernaumei peijapa, Rom am veshan kho hük shak kü mübü hük büpa touei khümei peiyei, 6 “Shembüpa, ngelei chongphobü büm bhaoei didaitü longi shangpongei shemei lemshi nyüpeih” shei e. 7 Jisui büpa kü, “Ngei peiyei meitükphahen hih” shei e. 8 Hapa veshan kho hük shak kü mübüi, “Shembüpa, nüng shenshenpü ngelei shemdhümei peikahenü ngei neshang; nüngi shah mon ejü ngelei chongphobüyü meidaihen hih. 9 Mehenangkü ngeiyao ngei phangkü veshanthü longi tuhtü ngei hanei kü, ‘Daituh’ shei ejü jom dai, hatü, ‘Heihkei’ shei ejü heihshi nyunyeih, hatü ngelei aa kü, ‘Ha düktuh’ shei ejü ha düknyeih” shei e. 10 Mechem Jisui ha danpa, büpa thama hatü büpa phei müpüthü kü, “Hingmei ngei am kü enyeih, Israel kü hapakei hinglempü ngei neheüangpih. 11 Ngei am kü enyeih, heong heshü kübü longi peikahen hatü vangsho ongching kü Abraham, Isak hatü Jakob mü chemi hahyinghen, 12 shejao vangsho ongching mükjüpthü shangmangei yakphonghen, halei theppü hatü bha vükpü nyuhen” shei e. 13 Hapheikü Jisui veshan kho hük shak kü mübü kü, “Leituh, nüngi hinglempü aimü ha nüng shing nyemdük” shei e, hatü hapa chongphobüyü hapa ghonda kü-üng meidai. Jisui Tüngpü Longi Meihüpü ( Mk. 1:29–34 ; Lk. 4:38–41 ) 14 Mechem Jisu Peter am shemei peijapa, Peterlei chenyühalei chenyü bheüi tüngei lüngei lemshi nyu; 15 büpai pinnyülei lak kü hongjü tüngpü meidai, hatü pinnyü paoei büpa chongphohen chongpang. 16 Ha ya om kü jomphongi büpa touei shepe-i yeppüthü longi müei pei, hatü büpai shah hük mon etü shepe laangthü changtük, hatü tüngpüthü peü meihü. 17 Hapayü Isaiah thibüi, “Büpai jenei shanghah hatü dinlem peü kolang” shei epü jiühühen shingvaishi ha vamteke. Jisu Phei Mühen Deihpüthü ( Lk. 9:57–62 ) 18 Mechem Jisui büpa shonei khongnyü longi eepa, büpai lebü yungdangei heihhen ngeükhüam shuoh. 19 Hahepak kü shahkung nyuhbü hük peiyei büpa kü, “Nyuhbü, nüng melei daihenshang ngeiyao nüng phei müküshah” shei e. 20 Jisui büpa kü, “Mahuthü yaongdung nyüke, hatü shangouhathü shing jep nyüke, shejao Shennyak Ha shangjing haüshing meleiyao neshiü” shei e. 21 Büpalei lebü nanglom hüki büpa kü, “Shembüpa, shongei ngei leiyei opalei mahng vütükkeih” shei e. 22 Shejao Jisui büpa kü, “Ngei phei mükei, hatü didaipüthüi jomei mahng nyemvühah” shei e. Jisui Yinglükpalei Nenhüpü ( Mk. 4:35–41 ; Lk. 8:22–25 ) 23 Mechem büpa ai mongei shüpa, büpalei nanglomthü büpa phei mü. 24 Ngangahük kü yinglükpalei longpü vamei yungmoki ai hüngdaihen mü nyuteke; shejao Jisu payü shishi nyu. 25 Hanangkü jomphong heih-ei, “Shembüpa, ham yangshih! Ham mahdainyu khih!” shei eshi büpa kü phuk. 26 Büpai jomphong kü, “Mehekei amphong nyemnya, am maani mon vaipüthü?” shei e. Hapheikü büpa paoei vanglük hatü yungching kü loh, hatü ha nendai. 27 Jomphongi thamaei, “Vanglük hatü yungchingi ven banghen mü hapayü menüng keipü shennyakang yo?” shei etei. Jisui Shepe-i Yeppü Nyi Meihüpü ( Mk. 5:1–20 ; Lk. 8:26–39 ) 28 Mechem büpa yungdang homei Gadarenes kahmükei heihjapa, shepe laangi yeppü shennyak nyi mahngchong leipü vamei büpa mü pongtei. Üpaiyao hapa lem homei nedaiaokhen mü jijiyü longi mangshi nyu. 29 Ngangahük kü jiji-i lenei, “Nüngi henji kü mehe dükphanüngang, Oh Kahvang Ha? Hepak mangngoi shekü nüngi henji kü shüveinüng peiküpü je?” shei e. 30 Shaang jiji mü maani taishi ook khong longpü hük het hah-ei nyu. 31 Shepe laangthüi büpa kü, “Nüngi hamphong changtükjema, ookthü kü shühen shomtuh” shei khümei e. 32 Büpai jomphong kü “Daituh!” shei e. Hanangkü jomphong vamei ook khong kü shü, hatü ngangahük kü ook khong kemei yungkung vakei mokei yiü, hatü yung kü langdaikem. 33 Hapa ook yombüthü chingei mokei aongei shepe-i yeppü nyi kü mehe vampa, hapa büshah kemei ejateke. 34 Hahepak kü ching am kemei Jisu mü pongnüng vamei dai, hatü mechem jomi büpa eepa, jomi büpa kü jomei kahmük kübü lüdaishih shei khümei eteke. |
Phom Naga Bible - DAÜLANGPÜ LAIHING
Copyright © 2005 by The Bible Society of India
Used by permission. All rights reserved worldwide.
Bible Society of India