MATHI 7 - DAÜLANGPÜ LAIHING (BSI)

Mih kü Shahphenpü

¹ Nüngi mih kü shah tephen, shejüang nüngei shah-ao nephenhen.

² Nüngi mih-ei shahphenpü ha yah-ei nüng kao shahphenhen, nüngi mih kü dakpü shongdak lakshingi nüng kao dakhen, nevaijü nüngi mih kü shetpü lüng aihüki nüng kao shethen.

³ Mehekei nüngi küphülei mük kübü kümak eetü nüngei mük kübü püshem ne-eenya?

⁴ Nevaijü mekei etü nüngi nüngei küphü kü nüngei mük kü püshem tuhtü, “Ngei nüngei mük kübü kümak tükphüshah” shei enya?

⁵ Akhümmongümpa, shongei nüngei mük kübü püshem yaktüktuh; haphei küang nüngei küphülei mük kübü kümak tükhen mü eeaokhen.

Daülangpü Teyakphong

⁶ Mehe daülangpü nyüpa, ha shi touei teyakphong, hatü ook tou kü yüknyü teshükphong, hei nevaijema jomi la-i shouptükhen, hatü am khih mü nihtükhen yaakkahen.

Yütuh, Yemtuh, Khungtuh

⁷ Yütuh, hatü ha amphong kü yahphahen; yemtuh, hatü ha amphongi danghen; khungtuh, hatü ha amphong kü apphahen.

⁸ Mehenangkü yüpü peüi dangnyeih, yempü peüi dangnyeih, hatü khungpü peü kü apnyeih.

⁹ Amphong khongkü hanei-i laophülei hapeüi aan yüjü yaong shuohhen üpa nyüpa?

¹⁰ Nevaijü hapeüi nyah yüjü biü shuohhen je?

¹¹ Shejema, am nemeipüthüi dangkao laophülei hapeüthü kü thintho meipü shuohhen nyingjema, vangsholei nyupü ammei Pa-i büpa kü yüpüthü kü meshük meipü doumei shuohhenang!

Hon Shahkungnyü

¹² Lemphüli kü mih-i nüng kü nyemdükpha shei deihpü keiha nüngi mih kü dükeishuoh; mehenangkü hapayü shahkungnyü hatü thihivam shahthü nyüke.

Shawshippü Lem

¹³ Peshaden shawshippü lemei shütuh; mehenangkü mahpü lemei müpü lemü bhashahshi hatü yoshi; hatü halei daipüthü longi.

¹⁴ Mehenangkü yangnyuyem touei müpü lemü shawshipshi, hatü lemü ahshi wongshi, hatü halei daipüthü maani mon.

Pü hatü Hapalei Betjük

¹⁵ Shahshem thibüthü kü lituh; jomi am touei mi-ow owtü peinyüke shejao mongü shuw kei mangshi nyüke.

¹⁶ Ammi jomei betjük homei jom nyingdaihen. Hühthang kübü nyalingngupai vaümnyu je, nevaijü hüh pü kübü adhajük vaümnyu je?

¹⁷ Hapa keiha pü meipü peü kü betjük meipü jüknyeih, shejao pü nemeipai nemeipü betjük jüknyeih.

¹⁸ Meipü pü hüki nemeipü betjük nejükaok, nevaijü nemeipü pü hüki meipü betjük nejükaok.

¹⁹ Betjük meipü nejükpü pü peü agei aw kü jaktüknyeih.

²⁰ Hapa keiha jomei betjük homei ammi jom mehe ha nyingdaihen.

Ngei Mechemao Amphong Nenying

²¹ Ngei kü, “Shembüpa, Shembüpa” shei nyükpü peüi vangsho chingei neshüaokpih, shejao vangsholei nyupü Opai mongpü dükpü shennyak mon shüaokhen.

²² Hapa nyih kü longshi shingi ngei kü, “Shembüpa, Shembüpa, hami nüngei men kü teteivanei ne-eangpü je, hatü nüngei men kü kahshihthü changei hatü nganhilong dou longi nedükangpü je?” shei ehen.

²³ Hahepak kü ngei hathü kü, “Ngei amphong nenying, ngei toueipü lüdaituh, amphong ten dükpüthü” shei ehen.

Shem Vebü Nyi

²⁴ Hanangkü üami ngelei hathü shah bangei düknya, hathüyü kon kohpü shennyak hük yaong shangkü laophülei shem vepü hük leshi nyüke.

²⁵ Vang keiyei yung long, hatü vanglük lük, hatü ha shem kü hung, shejao ha shem nelaam; mehenangkü hapa shemü yaong shangkü veteke.

²⁶ Shejao üami ngelei hathü shah dantü nedüknya, hathüyü ngapa hük bhih shangkü laophülei shem vepü leshi nyüke.

²⁷ Vang keiyei yung long, hatü vanglük lük hatü hapa shem kü hung, hatü ha shem laam, hatü ha laampeyü longi nyuteke.

Jisulei Wong

²⁸ Mechem Jisui hathü shah ekempa, khongi büpai nyuhpüvenpü kü yashan;

²⁹ mehenangkü büpai jomphong shahkung nyuhbüthü kei nevai, shejao ngan kohpü am kei eteke.