MATHI 3 - DAÜLANGPÜ LAIHING (BSI)Baptükbü Johani Chongvenpü ( Mk. 1:1–8 ; Lk. 3:1–18 ; Jn. 1:19–28 ) 1 Hathü nyih kü Johan baptükbüi Judea jahpanei chongvenei, 2 “Mong leptuh; mehenangkü vangsho ongching yopailei nyüke” shei e. 3 Hapayü Isaiah thibüi eshingkü büpa nang ha eteke: “Jahpanei hüki lenpü ngeü: ‘Amphongi Shembüpalei lem temtuh; büpalei lemthü kangshangi lingtuh.’ ” 4 Johanei owhiaiyü ut mumi lingpü ow owteke, phaishuw shüngshep shep, hatü büpalei hahyingü shouk hatü nyahjiü nyuteke. 5 Jerusalem, Judea hatü Jordan moidoi kübü nanglakthü büpa touei peihamteke, 6 hatü jomei mangthü lah-ei Jordan yungyenei büpai jom kü yung kü hünghüteke. 7 Shejao mechem büpai Pharisee hatü Sadduke am longi yung kü hünghen peijapü eepa, büpai jomphong kü, “Amphong biüei hapeüthü! Ngoikahen mongshih kübü nyaidaihen mü amphong kü üpai lihen shahvüng yahphopa? 8 Mong lepei leipü shangshi betjük jüktuh. 9 Ammi laophü nyingi, ‘Abrahamü hamei bü’ shei te-ehah; mehenangkü Kahvangi hathü yaong kübü yah-ei Abraham shing hapeüthü vamhüaokhen hih. 10 Shaangao pü chongei ay haüshi nyüke; betjük meipü nejükpü pü agtükhen hatü awbhaong kü shüktükhen” shei e. 11 Mong leppü nangkü ngei amphong yungi baptüknyeih, shejao ngei mao nyeishi wong kohpü hük üpa ngei pheikü peikünya, ngei büpalei lathuh nohen dangkao nechang, büpai amphong Laangha Daülangpü hatü awi baptükphahen. 12 Büpalei lakei om noshi nyüke, hatü büpai laophülei hah yüptükhen, hatü büpai laophülei hah puongmongei thailanghen, shejao hahbhang peü mechemao nemetpü aw kü jaktükhen. Jisu Baptükpü ( Mk. 1:9–11 ; Lk. 3:21–22 ) 13 Hahepak kü Jisu-ü Galil leipü Jordanei Johan touei büpai bapnyemtükshuoh shei pei. 14 Johani büpa kü ha bangtükhen nangkü, “Nüngiang ngei kü baptükphahen vaipü kü ngei touei nüngang peikünyu je?” shei e. 15 Jisui, “Shaangü hapakei nyemshü; mehenangkü hapa keiha jen peüi daülangshemshepü douthü peü dükhen jiüpeih” shei e. Hanangkü Johani mongteke. 16 Jisu baptükhinüng yungeipü vam. Hahepak kü vangsho shaden aptü athuba keiha Kahvang Laangha vangsho leipü yiüei büpa kü bakteke, 17 hatü vangsho leipü ngeü hük vamei, “Hapayü ngei mong hahpü ngei bampü Hapeü” shei e. |
Phom Naga Bible - DAÜLANGPÜ LAIHING
Copyright © 2005 by The Bible Society of India
Used by permission. All rights reserved worldwide.
Bible Society of India