MATHI 28 - DAÜLANGPÜ LAIHING (BSI)

Jisu Yangei Leipü

¹ Sabbath pheikü hatyang kü shongpü nyih dhom mü lomi Mary Magdalen hatü lebü Mary nyi mahngchong kü veinüng heih.

² Ngangahük kü pedi longi vük; mehenangkü Shembüpalei vangsho phongshan hük vangsho leipü yiüei ha yaong ngowtüktü ha kü uoshi nyuteke.

³ Büpalei dhe klang kei, hatü büpalei ow shüdao kei shoshi nyu.

⁴ Büpa kü nyempai yombüthü kheüei mahng kei leidaikem.

⁵ Shejao vangsho phongshani nyüha nyi kü, “Anji tenyem; mehenangkü anjiyü shophang kü apei jütükpü Jisu yemnyu khih shei ngei nyingnyüke.

⁶ Büpa hamü nenyu; mehenangkü büpai epükei büpa yangei leidaiteke. Heihkei, büpa lempü shing kü veihümao.

⁷ Lomi daiyei, ‘Büpa yangei leidaiteke’ shei büpalei nanglomthü kü etuh, hatü büpayü am shekü Galilei daiteke; halei ammi büpa ponghen. Hapayü am shing ngelei shahjangmei” shei e.

⁸ Hanangkü jijinyi-i nyempü hatü mongong longpü mü shülangi mahngchong tuhtü lei, hatü büpalei nanglomthü kü ehen mokteke.

⁹ Ngangahük kü Jisui jiji mü pongei, “Selam!” shei e, hatü jiji büpa touei heih-ei büpalei la kü shongtü khüm.

¹⁰ Hahepak kü Jisui jiji kü, “Tenyem, daiyei ngelei jeihinaüthü kü Galilei heihhen etuh; halei jomi ngei ponghen” shei e.

Yombüthülei Shah-om

¹¹ Mechem jomphong daiyei nyupa, yombü khongkü hanei chingnyülei shüei mehe vampa, ha peü ngongpathü kü ejateke.

¹² Ngongpathüi behethü mü thaitü jomi yombüthü kü lop longi shuohhen küpjan temtei.

¹³ Jomphongi hathü kü, “Amphongi ham shidaitü büpalei nanglomthü nyak kü peiyei büpa güh-ei lüdaipeih shei etuh.

¹⁴ Governori ha danhen, hatü hami büpa kü yawhhen, shejüang amphong hanghi neponghen” shei e.

¹⁵ Hanangkü jomphongi lop yah-ei jom kü dükhen epükei shuoh, hatü hapa büshah shinnyih thahshi Jehoda am khongkü eteinyeih.

Nanglomthü kü Kangpü

¹⁶ Hapheikü nanglomthü jom anpühük Jisui jom kü daituh shei epükei Galil kahdok kahshangei dai.

¹⁷ Mechem jomphongi büpa eepa, jomi büpa kü khüm, shejao hanei am jü-ü.

¹⁸ Hahepak kü Jisui jomphong touei heih-ei e, “Vangsho hatü kahdoknyü kü ngan peü ngei kü shuohteke.

¹⁹ Hanangkü daituh, jatli peü nanglak leihütuh; Pa, Ha hatü Laangha Daülangpü men kü jomphong yung kü hüngtuh,

²⁰ hatü ngei am kü epü lemphü dükhen jom kü nyuh-eishuoh, hatü kahdoknyü dohpü ngoishi ngei amphong mü düngei nyukahen.”