MATHI 27 - DAÜLANGPÜ LAIHING (BSI)

Jisu Pilat Touei Deipü

¹ Dhom mü lomi ngongpa hatü behethü peü Jisu jühen nangkü chemi küpjan ling.

² Jomi büpa shatü müei deiyei Pilat governor kü shuoh.

Judas Dipü

³ Mechem Judas luhahbüi Jisu nyongtükpü eepa, büpa mong lepei hapa ngin hapüan ngongpa hatü behethü touei yah-ei pei.

⁴ Büpai, “Ngei daülangpü shennyak jühen luhahpai mang thahteke” shei e. Shejao jomphongi, “Hami ha mehe vaihen? Hayü nüng mong khihma” shei e.

⁵ Hapa ngin phopshemei shükphongtü büpa daiyei büpa nying bakla kü bheandai.

⁶ Shejao ngongpathüi, “Hapa ngin yah-ei phopshem lop tuhshingei jaohen shahkung kü nejiü; mehenangkü hapayü iy-i shakpü ngin” shei eteke.

⁷ Thaiyei eteitü jomi ha ngin yah-ei Kung am dipü mahng vühen mahngchong vaishi dük shükbülei kah shakteke.

⁸ Hanangkü hapa kah kü shinnyih thahshi “Iy Kah” shei nyüknyüke.

⁹ Hahepak kü mepa Jeremiah thibü homei, “Israel nanglakthüi büpa kü itpü bhei jomphongi ngin hapüan yah,

¹⁰ hatü Shembüpai ngei kü epükei jomi ha ngin dük shükbülei kah shakhen kü noteke” shei epü ha jiüteke.

Pilati Jisu kü Shah Phepü

¹¹ Shaang Jisu governor touei yaong, hatü governor-i büpa kü, “Nüngü Jehoda amei Ong je?” shei phe. Jisui, “Nüngi enyüke” shei e.

¹² Shejao mechem büpa kü ngongpathü hatü behethüi nyonghüei thaüvaüpa, büpai shah neleitei.

¹³ Hanangkü Pilati büpa kü, “Nüng khüei jomi meshük nyonghüei thaüvaünya nüngi ha nedannyu je?” shei e.

¹⁴ Shejao büpai büpa kü shah phahükao neleishuoh; hanangkü governor longi thama.

Barabbas hi Jisu?

¹⁵ Shaang mo hepak kü governor-i khoklatei küpshi nyupüthü khongkü khongi mongpü pahük vehen vanglem nyuteke.

¹⁶ Hahepak kü aung neleipü pahük meni, Barabbas khoklatei küpshi nyu.

¹⁷ Hanangkü jomphong thaipheikü Pilati jomphong kü, “Barabbas nevaijü Jisu, üpa kü Messiah shei nyüknya, jijinyi khongkü ngei üpa vephahenang?” shei phe.

¹⁸ Hapayü mükhakpü homei büpa yepei shuohpü khih shei büpai nyingdai.

¹⁹ Mechem büpa shahphenpü uoshingei uoshi nyupa, chenyüha-i büpa kü, “Hapa mang neshiüpü shennyak kü meheyao tedük; mehenangkü shinnyih ngei büpa nangkü mangh hük kü ngei longi shanghahpeih” shei shah shomei e.

²⁰ Shejao ngongpathü hatü behethüi Barabbas vehen shejao Jisu jühen nangkü khong yawhlang.

²¹ Governor-i shao jomphong kü, “Jiji khongkü üpa ngei amphong kü vephahenang?” shei phe. Jomphongi, “Barabbas” shei e.

²² “Shejema Jisu üpa kü Messiah shei nyüknya, ngei büpa kü mehe dükhen?” shei Pilati jomphong kü phe. Jom peüi, “Büpa shophang kü aptuh!” shei e.

²³ Hahepak kü büpai, “Mehekei, büpai mehe ten dükpa?” shei e. Shejao jomphongi nyeinya lenei, “Büpa shophang kü aptuh” shei e.

²⁴ Hanangkü mechem Pilati meheyao nedükaokhen khih shei nyingpa, shejao mophicheü pangdainyu khih shei veiaokpa, büpai yung maani yah-ei khong touei lak hüh-ei, “Hapa shennyak dipü mang ngei nekohen; ammi mongpükei dükpü vaite” shei e.

²⁵ Hahepak kü nanglakthüi dhao mü, “Büpalei iy ham hatü hamei hapeüthü shangkü nyemnyu!” shei e.

²⁶ Hanangkü büpai Barabbas jom kü veshuoh, shejao Jisu kü bheitü büpai büpa shophang kü aphen lanei shuoh.

Veshanthüi Jisu kü Yaüeilungpü

²⁷ Hapheikü governorlei veshanthüi Jisu müei governorlei ongshemei dei, hatü khong kemei büpa shonei thai.

²⁸ Jomphongi büpalei büm-ow nyiuktüktü ashak hakla jeiyei owhü,

²⁹ hatü hühthang yüpei athen kei lingtü büpalei shangjing kü thenshuoh, hatü jomi büpalei lakdah philei lenshuoh hük nohütü jomi büpa touei aümei shatü büpa kü yaüeilungei, “Jehoda amei ongpa den lushi nyutuh!” shei e.

³⁰ Jomi büpa kü yu-opi shaoteke, hatü lenshuoh-i büpalei shangjing kü hatteke.

³¹ Büpa kü yaüeilungei epheikü, jomi büm-ow nyiuklangtü büpalei büm-ow owhü. Hapheikü jomi büpa shophang kü aphen müei dai.

Jisu Shophang kü Appü

³² Jom daishingkü jomi Cyrene am shennyak hük Simon shei menpü heüteke; jomi büpa kü ha shophang paihen nyeanteke.

³³ Mechem jomphongi Golgotha lappai, “Shangvang Shing” ngoipa,

³⁴ jomi büpa kü yiü mü shahyak yung vuktü yinghen shuoh; shejao büpai jepei veitü ha neying.

³⁵ Jomi büpa shophang kü ap, hatü jomi phongyomtü büpalei ashakviha hantei;

³⁶ hapheikü jom uotü büpa kü veishi nyu.

³⁷ Büpalei shangjing kü jomi büpa khüei, “Hapayü Jisu, Jehoda amei Ongpa” shei nyangtü büpa kü thenhü.

³⁸ Jomi büpa mü gühpa nyi, hük lakdah philei hatü hük laknyong lemei ap.

³⁹ Peihpü peüi ngaüm dhiyei büpa kü eela,

⁴⁰ hatü “Phopshem mangtü nyih jem mongkü veaokhen shei epü-ü, laophü nying yangtuh! Nüngü Kahvang Ha vaijema shophang leipü shühkei” shei e.

⁴¹ Aihük mü ngongpathü mü shahkung nyuhbüthü hatü behethüi büpa kü yaüeilungei,

⁴² “Büpai mih yangnyüke; büpai laophüang neyangaoknyu. Büpayü Israel amei Ongpa; büpa shophang leipü shaang shühküjüang hami büpa kü hinglemhen hih.

⁴³ Büpai Kahvang kü hinglemnyüke; shaang Kahvangi mongjema büpa nyemyangshuoh; mehenangkü büpai, ‘Ngeiyü Kahvang Ha’ shei epeih” shei eteke.

⁴⁴ Büpa mü chemi shophang kü appü gühpa nyiyao aihük mü büpa kü yaüei e.

Jisu Dipü

⁴⁵ Haümhahphei kü om jem baji thahshi kahdoknyü peü manghdai.

⁴⁶ Jem baji yangkü Jisui ngeüwong anei, “Eli, Eli, lama sabachthani” lappai, “Ngelei Kahvang, Ngelei Kahvang, mehekei nüngi ngei tuhphongnya?” shei eteke.

⁴⁷ Mechem yopailei yaongpüthü hanei-i ha danpa, jomphongi, “Hapa shennyaki Elijah kü nyüknyüke” shei etei.

⁴⁸ Jomphong khongkü hük mokei heih-ei mantem deiyei yiüji kü hüng, hatü lüng kü japtü anei büpa kü yinghen shuoh.

⁴⁹ Shejao lebüthüi, “Temanghü, büpa yangnüng Elijah yiükülashang veishah” shei e.

⁵⁰ Nyipabü Jisui ngeüwong anei vaütü ngüshom heyei mongdang shemmdai.

⁵¹ Hahepak kü phopshemei haenpü ashak sho kübü la laishi nyi anei shaakdai. Kahdoknyü jenteke hatü yaongnyüthü bhaodai.

⁵² Mahngchong shadenthü ap, hatü diyei nyupü daülangpü shennyakthü yangei lei.

⁵³ Jomphong mahngchong leipü vam, hatü Jisu yangei leipheikü jomphong daülangpü chingnyülei dai hatü shennyakthü longi touei vamei hu.

⁵⁴ Shaang mechem veshan kho hük shak kü mübü hatü büpa mü Jisu yomei nyupüthüi pedi vükpü hatü vampü douthü eepa, jom longi nyem hatü jomi, “Hingmei, büpayü Kahvang Ha vaipü khih” shei etei.

⁵⁵ Tailuei veishi nyühathü longi nyu; jomphongü büpalei nadang kü sheühhen Galil leipü müei heihteke.

⁵⁶ Jomphong khongkü Mary Magdalen hatü Jakob hi Joseph nyilei chenyü Mary, hatü Zebedeelei cheha nyilei chenyüao nyuteke.

Jisu Mahng Vüpü

⁵⁷ Mechem om dhüpa, Arimathea am shemmeipa hük Joseph shei mentü pei; büpayao Jisulei nanglom hük nyuteke.

⁵⁸ Büpai Pilat touei peiyei Jisulei mahng yüteke; hahepak kü Pilati büpa kü ha shuohhen ngeükhüam shuoh.

⁵⁹ Hanangkü Joseph-i mahng yah-ei hapa kü daülangpü nyemin ashaki jüm,

⁶⁰ hatü ha yah-ei büpai yaong vaüpei lingpü mahngchong ja kü vüphong. Hapheikü büpai yaongba küpphongtü leidai.

⁶¹ Mary Magdalen hatü lebü Mary hathüyü mahngchong kü dangteishi uoshi nyuteke.

Mahngchong Yompüthü

⁶² Nyihphei, lappai, Sabbath nyih ngongpathü hatü Phariseethü Pilat touei thaiyei,

⁶³ “Longpüba, hapa peileipai yemmü nyushi, ‘Ngei nyih jem angtü yangei leikahen’ shei epü deih-ei dangnyüke.

⁶⁴ Hanangkü nyih jem mangngoi thahshi mahngchong meishi yomhen shahkung shuohkütuh; hei nevaijema büpalei nanglomthü peiyei büpalei mahng güh-ei daiyei, ‘Büpa dipü leipü yangteke’ shei ekününg aokpeih, hatü shomshi peileipüang nemeipüba vaikahen” shei e.

⁶⁵ Pilati jomphong kü, “Veshanthü müei daiyei ammi aokpü thahshi bhohingei yomhahtuh” shei e.

⁶⁶ Hanangkü veshanthü mü jom daiyei mahngchong yaong kü füoshang shingei meishi yomteke.