MATHI 25 - DAÜLANGPÜ LAIHING (BSI)

Yiükjingpü Nela An

¹ Hahepak kü vangsho ongchingü nela an awdük notü yiükyahpa ombaong daipü leshi nyukahen.

² Jom ngayü nelipü hatü jom ngayü kon kohshi nyuteke.

³ Nelipü jom ngayü awdük yah shejao awyung neko;

⁴ shejao kon kohpüthüi awdük mü awyung nyeinya koteke.

⁵ Shaang yiükyahpa pheipü nangkü jom peü mükngüh dhaongei shiteke.

⁶ Shejao vangnyak jiam kü, “Veituh, yiükyahpa peiteke! Büpa mü pongteinüng peikei” shei len.

⁷ Hahepak kü nelathü peü paoei jomei awdük hapteke.

⁸ Nelipüthüi kon kohpüthü kü, “Ammei awyung hamphong kao hanei yahshih; mehenangkü hamei awdük metdainyüke” shei e.

⁹ Shejao kon kohpüthüi, “Jen peü shingvaishi awyung changshi neshiüpih; yupü shingei daiyei ammi laophü shing shakhahtuh” shei e.

¹⁰ Mechem jomphongi ha shaknüng lüdaipa, yiükyahpa pei, hatü üam temei nyu, büpa mü yiükjing molei dai, hatü sha küplang.

¹¹ Shomshi nelipü nelathüao leiyei, “Shembü, shembü, hamphong kao sha apshih” shei e.

¹² Shejao büpai, “Hingmei ngei am kü enyeih, ngei amphong nenying” shei jangei e.

¹³ Hanangkü thaeimaei nyutuh; mehenangkü amphongi nyih hatü hepak jung nenying.

Chongphobü Jemi Shahlappü

¹⁴ Shao hapayü shennyak hük yen kü dainüng kü laophülei chongphobüthü nyükei büpalei mop kü veihen hanei shuohpü leshi nyüke.

¹⁵ Hük kü büpai phaihan haja nga, hük kü haja nyi, hatü hük kü haja hük shei laophüi aokhen aimü shuohtü büpa lüdai.

¹⁶ Phaihan haja nga dangpü shennyaki ha yah-ei daiyei bhei leih-ei shao haja nga üei latteke.

¹⁷ Hapa keiha phaihan haja nyi dangpü shennyakiyao shao phaihan haja nyi üei lat.

¹⁸ Shejao üpai phaihan haja hük dang, ha yah-ei daiyei kahsha shotü hapa shembülei lop jophong.

¹⁹ Hepak longi angtü chongphobüthülei shembü lei, hatü jomphong mü hapa lop hengteke.

²⁰ Hahepak kü phaihan haja nga dangpü shennyaki shao phaihan haja nga nyeinya ütü peiyei, “Shembü, nüngi ngei kü phaihan haja nga yahphopeih; veituh, ngei shao nyeinya phaihan haja nga dapeih” shei e.

²¹ Büpalei shembüi büpa kü, “Meiteke, meipü hatü monglemaokpü chongphobü; nüngi maanpü dou kü monglemaokshi nyuteke, ngei nüngü dou longi kü shembü vaihühen; nüngei shembü mongongpü touei shütuh” shei e.

²² Hapheikü phaihan haja nyi dangpü shennyakao heih-ei, “Shembü, nüngi ngei kü phaihan haja nyi yahphopeih; veituh, ngei shao nyeinya phaihan haja nyi dapeih” shei e.

²³ Büpalei shembüi büpa kü, “Meiteke, meipü hatü monglemaokpü chongphobü; nüngi maanpü dou kü monglemaokshi nyuteke, ngei nüngü dou longi kü shembü vaihühen; nüngei shembü mongongpü touei shütuh” shei e.

²⁴ Hapheikü phaihan haja hük dangpü shennyakao peiyei, “Shembü, nüngü ahshi-üng mangpü shennyak, nüngi melei neshei haleipü vetnyeih, melei nehai, haleipü thainyeih shei ngei nying.

²⁵ Hanangkü ngei nyemei deihpü nangkü daiyei nüngei lop kahshalei joei tuhpeih. Nüngei lopü ha khih” shei e.

²⁶ Shejao büpalei shembüi, “Nüng nemeipü hatü nehetpü chongphobü! Ngei melei neshei haleipü vetnyeih, ngei melei nehai, haleipü thainyeih shei nüngi nying.

²⁷ Shejema nüngi ngelei lopü lop nopü am kü shuohhen vaipeih, hatü ngei nyokei leishingkü ngelei lop mü bhüpü danghen vaipeih.

²⁸ Hanangkü büpa leipü lop yahlangtuh hatü phaihan haja an nyupüba kü shuohtüktuh.

²⁹ Mehenangkü üami ang, hathü kü nyeishi shuohhen hatü changshi anghen, shejao üam ne-ang, jomi maani angpao yahlanghen.

³⁰ Hapa yahlak neshiüpü chongphobüyü chingshelei shangmang kü shüktüktuh; halei theppü hatü bha vükpü nyuhen” shei e.

Dohpü Shahphenpü

³¹ Mechem Shennyak Ha müknyinshekhang kü vangsho phongshanthü peü büpa mü yiühen, hahepak kü büpa müknyinshekhang ong uoshing kü uohen.

³² Jatthü peü büpa touei thaihen, hatü mi yombüi mi khong kübü yumthü khaattükpükei büpai nanglakthü hük kübü hük shei hantükhen,

³³ hatü büpai mithü lakdah philei, hatü yumthü laknyong philei tuhhen.

³⁴ Hahepak kü ongpai büpalei lakdah philei nyupüthü kü, “Peikei, amphong Opai moihimanpüthü, kahdoknyü chongnyiam lingshingkü am shing tempü ongching mükjüp yahtuh;

³⁵ mehenangkü ngei aeiyei nyushingkü ammi ngei kü hahhen shuoh, ngei yung leyei nyushingkü ammi ngei kü yinghen shuoh, ngei yenpa kei nyushingkü ammi ngei mongongshi yah;

³⁶ ngei bümkong nyushingkü ammi ngei kü ashakviha shuoh, ngei tüngei nyushingkü ammi ngei kü jung, ngei khoklatei nyushingkü ammi ngei kü thümpeih” shei ehen.

³⁷ Hahepak kü daülangpüthüi büpa kü, “Shembüpa, mechem hami nüng aeipü eeyei hahhen shuohpa, nevaijü nüng yung leyei nyushingkü yinghen lemhük shuohpa?

³⁸ Hatü mechem hami nüng yenpa kei eeyei mongongshi yahpa, nevaijü bümkong eeyei nüng kü ashakviha shuohpa?

³⁹ Mechem nüng tüngpü eeyei nevaijü khoklatei küpshi eeyei nüng kü thümpa?” shei ehen.

⁴⁰ Ongpai jomphong kü, “Hingmei ngei am kü enyeih, amphong maanpü ngelei jeihinaüthü kü mepa ammi düktepa, hayü ngei kü dükpeih” shei jangei ehen.

⁴¹ Hapheikü büpalei laknyong philei nyupüthü kü, “Amphong thaüvaü hetdaipüthü, ngei toueipü lüdaituh, hatü kahshih hatü büpalei phongshanthü shing tempü nedohnetenpü awlei shütuh;

⁴² mehenangkü ngei aeiyei nyushingkü amphongi ngei kü hahhen neshuoh, ngei yung leyei nyushingkü yinghen meheyao neshuoh;

⁴³ ngei yenpa hük kei nyu, shejao ammi ngei mongongshi neyah, bümkong nyushingkü amphongi ngei kü ashakviha neshuoh, tüngei hatü khoklatei nyushingkü ammi ngei kü nethüm” shei ehen.

⁴⁴ Hahepak kü jomphongiyao jangei, “Shembüpa, mechem hamphongi nüng aeiyei, yung leyei, yenpa kei, bümkong, tüngei nevaijü khoklatei nyupü eetü hami nüng kü nejungpa?” shei ehen.

⁴⁵ Hahepak kü büpai jomphong kü, “Hingmei ngei am kü enyeih, hathü khongkü maanpü hük kü ammi nedükpeyü ngei kü nedükpeih” shei ehen.

⁴⁶ Hathüyü nedohnetenpü hanghi shingei shühen, shejao daülangpüthü vanyangyem touei shühen.