MATHI 23 - DAÜLANGPÜ LAIHING (BSI)

Jisui Pharisee hatü Shahkung Nyuhbüthü kü Lohpü

¹ Hapheikü Jisui khongnyü hatü büpalei nanglomthü kü eteke.

² Shahkung nyuhbüthü hatü Pharisee ami Mosalei uoshing kü uonyüke;

³ hanangkü jomi am kü mehe nyuh, ha düktuh, shejao jomi dükpükei tedük; mehenangkü jomi mehe nyuh, ha jomi nedüknyu.

⁴ Jomi nekoaokhen mü hanggo vihshi temtü ha mih kü kohünyüke; shejao jomi ha kohen jomei lakjaangiyao nehonghünyu.

⁵ Mih-i eehen shingvaishi jomi dou peü düknyüke; mehenangkü jomi jomei phaishuw pela longshi lingnyüke hatü ashakmai lushi ownyüke.

⁶ Jomi mohitap kü dhüm kohpü uoshing hatü Sinagoglei meipü uoshing kü uohünyüke,

⁷ hatü bhei leihshingei peüi selam shihhah-ei, hatü nanglak peüi jom kü, “Nyuhbü” shei nyükhahhünyüke.

⁸ Shejao amphong kü, “Nyuhbü” shei nenyükhen; mehenangkü amphongei nyuhbü hük nyüpeih, hatü amphong peü nyinghahpü am.

⁹ Amphongi kahdoknyülei üpa kao opa shei tenyük; mehenangkü ammei Pa hük vangsholei nyüpeih.

¹⁰ Nevaijü amphongi üpa kao, “Nyuhbü!” shei tenyük; mehenangkü ammei Nyuhbü hük nyüpeih, büpayü Messiah.

¹¹ Amphong khongkü peü mü longpeyü aa leihen.

¹² Üpai laophü nyingi longpü leihenshang maanpü leihen, üami laophü nyingi maanpü leihenshang, longpü vaihen.

Jisui Akhümmong-üm Nyonghünyeih

¹³ Am akhümmong-üm shahkung nyuhbü hatü Phariseethü, onyükei! Mehenangkü ammi shennyakthü neshühahhen mü vangsho ongching küptüknyüke, hatü am nyingiyao halei neshünyu, hatü mih shühenao nehannyu.

¹⁴ Akhümmong-üm shahkung nyuhbü hatü Phariseethü, onyükei! Mehenangkü ammi vaümnyülei shem bomei yahnyüke, hatü mih-i eehen shingvaishi luangi phopnyüke. Hanangkü am nyeinya mangpü hanghi danghen.

¹⁵ Akhümmong-üm shahkung nyuhbü hatü Phariseethü, onyükei! Amphongi shennyak hük Jehoda am leihühen shingvaishi yungching homei kahmük kemeilei kamteinyüke, hatü mechem hapakei lepei leihen, ammi am keiha büpa shingnyi nyeishi molo awlei ha leitüknyüke.

¹⁶ Mükphüngpü lem mübüthü, onyükei! “Hanei ami phopshem men kü vangjema meheyao nevai; hanei ami phopshem leipü hon nangkü vangjema, hapa vangpai büpa kü shashi nyüke” shei amphongi enyüke.

¹⁷ Amphong mükphüngpü ngapathü! Hon daülangi leihüpü phopshem hi hon longpüang?

¹⁸ “Üami moidü men kü vanghen, meheyao nevai, shejao moidülei haüpü thintho men kü vangjema hapa vangpai shashi nyüke” shei amphongi enyüke.

¹⁹ Am meshük mükphüngpaang! Thintho daühüpü moidü hi thintho longpüang?

²⁰ Hanangkü üami moidü men kü vangnya, moidü hatü haleipü lemphü men kü vangnyeih.

²¹ Üami phopshem men kü vangnya, phopshem hatü halei nyupü Kahvang men kü vangnyeih;

²² hatü üami vangsho men kü vangnya, Kahvang ong uoshing hatü halei uopüba men kü vangnyeih.

²³ Akhümmong-üm shahkung nyuhbü hatü Phariseethü, onyükei! Mehenangkü amphongi haohilai eheni napa, nemha, nemnyü kübü ankhong shuohnyüke, shejao hapa mü vihpü shahkung eheni, shahhing, phahji, hatü hinglempü hathü nedüki yaktüknyüke. Lebüthü ne-amtüki ammi hathü dükhen vaipeih.

²⁴ Amphong mükphüngpü lem mübüthü! Amphongi yiüji-ouha neshühen shangmü küptüknyüke, shejao ut lühtüknyüke.

²⁵ Akhümmong-üm shahkung nyuhbü hatü Phariseethü, onyükei! Amphongi nükshung pati shakdok vaütüknyüke, shejao mongeiyü hahnempü hatü mang doui maei nyüke.

²⁶ Am mükphüngpü Phariseethü! Shongei nükshung pati mong shong vaütüktuh; shejüang shakdokao daüdaihen.

²⁷ Akhümmong-üm shahkung nyuhbü hatü Phariseethü, onyükei! Amphongü mahngchong shola kei veiheni shakdokü nethe meishi, shejao mongeiyü mahng vang hatü mahngshie-i maei nyüke.

²⁸ Hapa keiha amphongao mih-i veiheni shakdoki daülangpü am keiha, shejao mongeiyü akhümmong-üm hatü mangi maei nyüke.

Jisui Jom Hanghihen Jung Enyüke

²⁹ Akhümmong-ümpü shahkung nyuhbü hatü Phariseethü, onyükei! Ammi thibüthülei mahngchong hatü daülangpüthülei wo kü ow temnyüke,

³⁰ hatü ammi, “Hamei bühipathülei nyih kü ham nyulangmeyü thibüthü jüpü kü hean neyahhah shepeih” shei enyüke.

³¹ Hapakei am nyingi ammü thibüthü jüpüthülei hühihathü hih shei denpü shuohnyüke.

³² Shejema ambü ampa ami pangei tuhpü mang lomei düktuh.

³³ Amphong biüthü, hatü biüei hapeüthü! Molo aw kü shukhen kübü am mekei yangaokhen?

³⁴ Hanangkü ngei am kü thibüthü, nyingpühingpüthü hatü shahkung nyuhbüthü shomphahen; ha khong kübü hanei ammi jühen, shophang kü aphen, hatü hanei Sinagoglei üphen, hatü jila hük kübü hük shei changteiyei anghen,

³⁵ shejüang kahdok shak kü daülangpüthülei iy yenpü am shak kü nyuhen; Abel kübü heihdaipü phopshem hi moidü nyi aa kü ammi jüpü Barakhiahlei cheha Zekhariahlei iy thahshi nyuhen.

³⁶ Hingmei ngei am kü enyeih, ha peü hapa denhivan kü vamhen.

Jerusalem kü Mahng Theppü

³⁷ Jerusalem, Jerusalem, am touei shompü thibüthü yaongi shükei jütükpü chingnyü! Ounyüi laophülei ouhathü pinnyülei yangkaok phangei thaipükei ngei ammei hapeüthü thaihen meshükpa kentepa, shejao ammi ha nemong!

³⁸ Veituh, ammei phopshem am touei lavüngtoiyei tuhphünyeih.

³⁹ Ngei am kü enyeih, “Shembüpalei men kü üpa peinya, büpa moihiman” shei mang-e thahshi amphongi ngei ne-eepih.