MATHI 21 - DAÜLANGPÜ LAIHING (BSI)

Jisui Aokpü Dangtü Jerusalemei Shüpü

¹ Mechem jomphongi Jerusalem yopailei Olive Kahshangei nyupü Bethphage ngoipa, Jisui nanglom nyi shom,

² hatü jiji kü, “Anji shelei eepü chingei daituh, hatü halei gadu hük mü cheha shenshi eehen; ha nyi laitü ngei touei leikei.

³ Anji kü hanei ami lemhükei ephüjema, Shembüpai hathü nanyuja shei eyeishuoh, hatü büpai hathü lomi shomphahen” shei e.

⁴ Hapayü thibüi eyei nyupü jiühühen shingvaishi ha vampeih:

⁵ “Zion nela kü etuh, Veituh, ammei ong am touei, nenteiaokpai gadu dok shangkü, gadu cheha kü uotü peikünyüke.”

⁶ Nanglom nyi daiyei Jisui epükei dük.

⁷ Jiji-i gadu hatü gadu cheha nyi müei lei, hatü dokshang kü ashak nyem, hatü ha shangkü büpa uo.

⁸ Khongnyü longi lem kü jomei ashak nyem, hatü lebüthüi phenhavunglak bhagei lem kü nyem.

⁹ Büpa shekü kampü hatü phei kü müpü khongi hapakei len: “Hosanna David Ha! Shembüpalei men kü peipüba moihiman! Peü mü shaopüba kü men longtuh.”

¹⁰ Mechem büpa Jerusalemei shüpa, hapa chingnyü kempülei, “Büpayü üpaang?” shei pheteipai pungeishatei nyuteke.

¹¹ Khongi, “Büpayü thibü Jisu, Galil leipü Nazareth am khih” shei eteke.

Jisui Phopshem Daünyüke

¹² Hapheikü Jisu phopshemei shü, hatü halei athuba yupü hatü shakpüthü changtük, hatü büpai lop jeiteipü haüdüthü hatü athuba yupüthülei uoshing khaptükkem.

¹³ Büpai jomphong kü, “Ha nyangei nyüke: ‘Ngelei shemü phoppü shem vaihen; shejao amphongi hapayü gühpathülei dung leitüknyüke’ ” shei e.

¹⁴ Phopshem mongei mükphüngpa hatü la khodaipüthü büpa touei pei, hatü büpai hathü meihü.

¹⁵ Shejao mechem ngongpathü hatü shahkung nyuhbüthüi büpai dükpü thamapü douthü, hatü phopshemei hashihthüi, “David Ha Hosanna” shei lenpü danpa, jomphong mongshih,

¹⁶ hatü büpa kü, “Hathüi mehe enya nüngi dannyüla?” shei e. Jisui jomphong kü, “Hih, hashihthü hatü aküngnaühathülei ju kübü nüngi laophü shing vih-eilühen temteke shei epü ne-ieangpü je?” shei e.

¹⁷ Büpai jomphong tuhtü chingnyü leipü laoei Bethanylei heih-ei halei paümteke.

Jisui Adhapü kü Thaüvaüpü

¹⁸ Nepnüng mechem büpa chingnyülei nyokei leipa, büpa aeiteke.

¹⁹ Büpai lemhaoei adhapü hük eeyei büpa hatouei heih, shejao phenlak mü lenei meheyao nedang. Hahepak kü büpai ha pü kü, “Nüng kü mechemao betjük tejük” shei e, hatü hapa adhapü chemjalak kü kaudai.

²⁰ Mechem nanglomthüi ha eepa, jom thamaei, “Mekei hapa adhapü ngangahük kü kaudainya yo?” shei etei.

²¹ Jisui jomphong kü, “Hingmei ngei am kü enyeih, amphong kü jü-üpü neshiüi hinglempü nyujema, hapa adhapü kü mehe dük, henüng mon nevai, shejao amphongi hapa kahshang kü, ‘Nüng daiyei yungchingei hüngdaituh’ shei eshuohjü ha hapakei dükkahen.

²² Hinglempai phopei ammi mehe yühen, ha ammi danghen” shei e.

Jisulei Wong kü Chengpü

²³ Jisu phopshemei shüei nyuh-ei nyushingkü ngongpathü hatü behethü büpa touei peiyei, “Nüngi mehe wongi hathü dou düknya, hatü nüng kü üpai hapa wong shuohpa?” shei phe.

²⁴ Jisui jomphong kü, “Ngeiyao amphong kü shah hük pheshah; amphongi ngei kü hapa shahnyok shuohjema ngeiyao amphong kü mepa wong homei hathü dou düknya ephahen hih.

²⁵ Johani baptükpeyü vangsho leipü peipü hi shennyaki deihtü ngaipa?” shei phe. Jomphong hüki hük mü shah dakteiyei, “Jeni, ‘Vangsho leipü’ shei ejema, büpai jenphong kü, ‘Shejema mehekei amphongi ha kü hingnelempa?’ shei ephahen;

²⁶ shejao jeni, ‘Shennyaki deihtü ngaipeih’ shei ejema jeni nanglak khongnyü kü nyemnyüke; mehenangkü peüi Johanü thibü hük shei deihnyüke” shei e.

²⁷ Hanangkü jomphongi Jisu kü, “Hamphongi nenyingang” shei e. Büpaiyao jomphong kü, “Mepa wongi ngei hathü dou düknya ngeiyao ne-ephapih” shei e.

Yeshang Nyi Shahlappü

²⁸ Amphongi mehe deihnya? Shennyak hük yeshang nyi nyu. Büpai hashongpa touei heih-ei, “Themei, shinnyih-ü nyalingngupai kahlei shaei kah lingtuh” shei e.

²⁹ Büpai, “Ngei neshapih” shei e, shejao pheishi büpa mong yeiya hatü kahlei sha.

³⁰ Chepai naü-eepa touei heih-ei, hapakeiüng eteke, hatü büpai, “Opa, shahen” shei e, shejao büpa nesha.

³¹ Henyi aa kü üpai chepai mongpü dükpa? Jomphongi, “Hashongpai” shei e. Jisui jomphong kü, “Hingmei ngei am kü enyeih, lat thaipüthü hatü büm yupüthü am shekü vangsho ongchingei shüdainyüke.

³² Mehenangkü Johanü am touei daülangpü lem huphahen pei; ammi büpa kü hingnelem, shejao kahdok lat thaipüthü hatü büm yupüthüi büpa kü hinglem; ammi hathü eetao am mong neyeiya hatü büpa kü hingnelem” shei e.

Kah Phuoei Lingpü Shahlap

³³ Lebü shahlap hük bangtuh. Kah shembü hük nyalingngupai sheitü nyu. Ha shinei pe show, hatü yiü ngümshing lingtü halei shangdü vetüktü nyu. Hapheikü büpai ha kah phuoei shapü am kü phuoei shuohtü tailu kahmükei lüdai.

³⁴ Mechem betjük vaümhen hepak ngoipa, büpai laophülei chongphobüthü hapa kah phuopü am touei büpalei phaihan yahhen shom.

³⁵ Shejao kah phuopü ami büpalei chongphopüthü yepei hük kü üp, hük jütük, hatü hük kü yaongi shük.

³⁶ Shao büpai lebü chongphobüthü sheleipü kao nyeishi shom, hatü hathüi jomphong kao aihük mü dük.

³⁷ Shompülei büpai cheha kü payü dhüm shuohhen shei deihshi cheha shom.

³⁸ Shejao mechem kah phuoei lingpü ami cheha eepa, jomi, “Mükjüp yahhen chehayü ha khih, kei, jeni büpa jütüktü büpalei mükjüp yahlangshah” shei etei.

³⁹ Hanangkü jomi büpa yepei kah leipü müei daiyei jütük.

⁴⁰ Shaang kah shembü shajü büpai kah phuopüthü kü mehe dükhen?

⁴¹ Jomphongi büpa kü, “Büpai hathü nemeipüthü lomoh-ei dihühen, hatü büpai hapa nyalingngupai kah betjük vaümpü hepak kü büpalei phaihan jiüshi shuohhen lebü kah phuopü am kü shuohtükhen” shei e.

⁴² Jisui jomphong kü, “Ammi Laihingei hapakei ne-ieangpü je?” “Shem vebüthüi mepa yaong nemei shei yaktük, hapa yaong shemshouk kü shongnyü yaong leipeih; hapayü Shembüpai dükpü khih, hatü hayü thamabenüng” shei e.

⁴³ Hanangkü ngei am kü enyeih, Kahvang ongchingü am leipü yahlanghen hatü ongching shingvaishi betjük jükpüthü kü shuohtükhen.

⁴⁴ Üpai hapa yaong shangkü vühen, khih mü nihdaihen, hatü üpa kü ha vühenshang büpa nihdaihen.

⁴⁵ Mechem ngongchongthü hatü Pharisee ami ha shahlap danpa, büpai hapayü jomphong nang enyu khih shei nying.

⁴⁶ Jomi büpa yephüei deih, shejao khongnyü kü nyem, mehenangkü nanglakthüi büpayü thibü hük shei ieyeilem.