MATHI 2 - DAÜLANGPÜ LAIHING (BSI)

Heongphi Kübü Nahpülangpüthüi Thümpü

¹ Herod ong vaipü hepak kü Judea kahdok Bethlehemei Jisu bühphei kü heongphi leipü nahpülangpü shennyakthü Jerusalemei,

² “Jehoda amei ong hük bühpü melei nyüke? shei pheyei pei. Hamphongi büpalei litha heong philei eepeih, hatü büpa kü khümhen peiküpeih” shei e.

³ Mechem Herod ongpai ha danpa, büpa hatü Jerusalemei nyupü peü mongshang,

⁴ hatü büpai ngongpathü hatü nanglak kü shahkungnyü nyuhpüthü nyükei thaihütü Messiah melei anghen epa shei büpai pheteke.

⁵ Jomphongi büpa kü, “Judea kahdok Bethlehemei” shei e; mehenangkü ha nang thihivamthüi hapakei nyangei nyüke:

⁶ “Nüng, Judah kahdok kü nyupü Bethlehem, Judah am longhivang khongkü nüng mekei etao maanpü nevai; mehenangkü nüng kübü, ngelei Israel nanglak mi yomhen vanglem lembü hük vamhühen.”

⁷ Hahepak kü Herodi nahpülangpü shennyakthü kü joei nyükei mepa hepak kü jiüshi litha vampü eepa, ha pheteke.

⁸ Hapheikü büpai hathü Bethlehemei shomei e, “Daituh, hatü hapa naü meishi yemtuh, hatü ammi büpa dangjü ngeiyao peiyei khümhen shangmü ngei kao shah leishih” shei e.

⁹ Ongpai epü dantü jom layaongei dai, hatü jomi heong philei eepü litha naü nyupü shing touei mangyaong thahshi jom shekü ha daiteke.

¹⁰ Mechem jomi litha eepa, jom longi mongong.

¹¹ Jomphong shem mongei shüja shingkü naü-ü chenyü Mary mü ee, hatü jomi aümei shaei büpa kü khüm, hatü jomi thintho shep laitü büpa kü hon, ayingshü hatü vong büpü meli shuoh.

¹² Hatü Kahvangi mangh mü Herod ongpa touei nyokei neleihen shahvüng shuohtükpü nangkü jom lebü lemei jomei kahdok yemei leidai.

Ijiplei Lükdaipü

¹³ Shaang jom leidaipheikü Shembüpalei phongshan hük Joseph touei mangh mü peiyei, “Paotuh, naü hatü chenyü nyi müei Ijiplei lükdaituh, hatü ngei mang-epha thahshi halei nyutuh; mehenangkü Herodi naü jühen yemnyüke” shei e.

¹⁴ Hanangkü Joseph paoei naü hi chenyü nyi mütü vangnyak kü Ijiplei yiüdai,

¹⁵ hatü Herod mangdi thahshi halei nyu. Hapayü Shembüpai thihivam homei, “Ngei ngelei ha Ijip leipü nyükpeih” shei eyei nyupü jiühühen shingvaishi ha vampeih.

Hashihthü Jüpü

¹⁶ Mechem heongphi leipü nahpülangpüthüi büpa kü luteke shei Herodi nyingpa, büpa longi mongshih, hatü büpa kü nahpülangpüthüi ejapü hepak aimü ittü Bethlehem hatü hapa shinei nyupü kübü hashihthü bong nyi hatü ha phang kübü peü ngeükhüam shuohtü jütükkem.

¹⁷ Hapayü Jeremiah thibüi epü jiüteke:

¹⁸ “Ramah leipü ngeü hük, theppü hatü youngpü longi dan, Racheli laophülei hapeüthü shing thepnyüke; jom peü didaipü nangkü pinnyü mong nyiushem nemeinyu.”

Ijip Leipü Nyokei Leipü

¹⁹ Mechem Herod didaipa, Ijiplei Joseph kü mangh mü Shembüpalei phongshan hük vamei,

²⁰ “Paotuh, hatü naü hi chenyü nyi müei Israel kahdok yemei leituh; mehenangkü naü jühen yempüthü didaiteke” shei e.

²¹ Hahepak kü Joseph paoei naü hi chenyü nyi müei Israel kahdokei leidai.

²² Shejao mechem büpai chepa Herod nangjei Arkhelaus-i Judea kü vanglem lemnyükeja shei danpa, büpa halei leihen nyem, hatü mangh mü eshuohpü nangkü büpa Galil kahdokei leidai.

²³ Halei büpai Nazareth shei epü jila hükei nyuei dai; mehenangkü hapayü thihivamthü homei, “Büpa kü Nazareth am shei nyükhen” shei epü jiühühen shingvaishi ha vamteke.