MATHI 19 - DAÜLANGPÜ LAIHING (BSI)

Jisui Nyühipa Yanpü Nang Nyuhpü

¹ Mechem Jisui ha douthü eyei kempa, büpai Galil tuhtü Jordan homei Judealei heih.

² Khongnyü longpü büpa phei mü, hatü halei büpai jomphong meihü.

³ Pharisee am hanei büpa touei pei, hatü büpa kü dokei jomphongi, “Jiüjiü shahhidou nangkü nyühipa yanhenü shahkungi mongpü vaila?” shei phe.

⁴ Büpai, “Chongpangpülei jom lingbüi nyüha baha shei lingtü,

⁵ ‘Ha tata kü büpai laophülei nyühipa tuhphongtü laophülei nyüha mü chemi nyuhen, hatü jiji phai hük leihen’ shei nyangei nyupü amphongi neieangpü je?

⁶ Ha nangkü jijiyü nyi nevai, shejao phai hük. Hanangkü mehe Kahvangi jemhü, ha shennyaki teyantük” shei eteke.

⁷ Jomphongi büpa kü, “Shejema, mehekei Mosai jen kü yanhen lai pinnyü kü shuohtü yanhen epa?” shei e.

⁸ Büpai jomphong kü, “Hayü am ahshi mong vaanpü nangkü Mosai ammei nyühathü mü yanhen epeih, shejao chongpangpüleiyü hapakei neshiüpih.

⁹ Ngei am kü enyeih, nyühai mih mü pungpü shahhidou mü lenei üpa bahai laophülei nyüha tuhphongtü yanei lebü nyüha mü shem yemhenshang büpai mükbongjuyung düknyüke.

¹⁰ Büpalei nanglomthüi büpa kü, ‘Baha nyüha nyi aa kü hapakei vaijema shem neyemteijao meihen khih’ ” shei e.

¹¹ Shejao büpai jomphong kü, “Ha nyuhpüvenpü peü shingvaishi nevai, shejao üam kü Kahvangi shuoh, hathü shing mon.

¹² Shennyak hük mehekei shem neyemi nyuhen, hayü lem longi nyüke: Haneiyü bühhinüng hakei-üng bühpü nyüke, hatü haneiyü laki lingei ban tüktükpü nyüke, hatü haneiyü vangsho ongching men kü hei-üng shem neyemi nyunyüke. Aokpü ami ha düktuh” shei e.

Jisui Maanpü Hashihthü Moihimanpü

¹³ Hahepak kü büpai laki shüngei phopshuohhen shingvaishi maanpü hashihthü büpa touei müei dei. Nanglomthüi hathü deipüthü kü nemei-i eteke;

¹⁴ shejao Jisui, “Maanpü hashihthü ngei touei deikei, hathü kü tekhüamshuoh; mehenangkü vangsho ongchingü hapa keipüthü shing hih” shei e.

¹⁵ Büpai hathü kü laki shüngtü hatoueipü lüdai.

Shemmei Nethepa

¹⁶ Hapheikü shennyak hük büpa touei peiyei, “Nyuhbü, vanyangyem danghen shingvaishi ngei mehe doumei dükhenang?” shei phe.

¹⁷ Büpai büpa kü, “Nüngi mehekei ngei kü mehe mei ha jung phenya? Meipeyü pahük mon nyüpeih. Nüngi vanyangyem danghüjema shahkungnyüthü düktuh” shei eteke.

¹⁸ Büpai büpa kü, “Mepa shahkung?” shei e. Jisui büpa kü, “Nüngi tejü; Nüngi mükbongjuyung tedük; Nüngi tegüh; Nüngi shahshem denpü teshuoh;

¹⁹ Nyühipa kü dhüm shuohtuh; Shao nüngei chingyowpa kü laophü kü kei bamtuh” shei e.

²⁰ Hapa nethepai, “Ngei hathü peü düktepih, shao ngei mepa-i nechangpa?” shei e.

²¹ Jisui büpa kü, “Nüngi changpüshapü leihüjema leituh, hatü nüngi angpü peü yutuh, hatü ha lop taopathü kü shuohtuh; shejüang nüng vangsholei mop nyuhen; hapheikü peikei, ngei phei mükei” shei e.

²² Mechem nethepai ha shah danpa, büpa mongmangei lüdai; mehenangkü büpa mop longi angteke.

²³ Hapheikü Jisui büpalei nanglomthü kü, “Hingmei ngei am kü enyeih, shemmeipa hük vangsho chingei shühenü wongshi nyüpeih.

²⁴ Shao ngei am kü enyeih, shemmeipa hük Kahvang ongchingei shülei meyü nyiammet sha kü ut loukei daipü-üng yopüba” shei e.

²⁵ Mechem nanglomthüi ha danpa, jomphong longi thamaei, “Shejema, üpa yangaokhen?” shei phe.

²⁶ Jisui jomphong kü veitü, “Hangku shingvaishi hayü neaokbenüng shejao Kahvang shingvaishi peü aokbenüng” shei e.

²⁷ Peteri büpa kü, “Nüng phei mühen tata kü hami lemphü tuhphongpeih. Shejema ham shingvaishi mehe chongkahen?” shei phe.

²⁸ Jisui jomphong kü, “Ngei amphong kü shahhing eshah, dou peü ja leipü mü mechem Shennyak Ha laophülei müknyinshekhangpü ong uoshing kü uohen, am üami ngei phei mütepa, hathüi ong uoshing anpünyi kü uotü Israel phang anpünyi kü shahphenhen.

²⁹ Üami ngelei men kü laophülei shem, jeihinaü, nyahinaü nevaijü nyühipa, hapeüthü nevaijü kahthü tuhphong, jomphongi kho hükpa nyeishi danghen hatü yangnyuyem danghen.

³⁰ Shejao shongpüthü longshi shing shompü, hatü shompüthü longshi shing shongpü leidaihen” shei e.