MATHI 18 - DAÜLANGPÜ LAIHING (BSI)

Peü Mü Longpü Üpaang?

¹ Hahepak kü nanglomthü Jisu touei peiyei, “Vangsho ongching kü peü mü longpü üpaang?” shei phe.

² Büpai maanpü naü hük nyükei deiyei jomphong chi kü yaonghütü e,

³ “Hingmei ngei am kü enyeih, amphong yeiyaei maanpü naüthü kei manglei thahshi amphongi vangsho ongchingei shününg neaokpih.

⁴ Hanangkü üpai ha naü kei nenteiaokei leihenshang vangsho ongching kü büpa longpü vaihen.

⁵ Üpai ngelei men kü hapa keipü naü mongongshi yahhenshang, büpai ngei yahnyüke.”

Mang Thahhen Dokpü

⁶ Ammi ngelei men kü vaipü maanpü hük kü dangkao huluh yaong haüjema, am shingvaishi üng kü yaongba longpü shentü yungching ilangmongei hüngdaipü-üng meipüba.

⁷ Hangku mang thahhüpü douthü nangkü ha kahdoknyü onyükei! Hapa keipü dou vamkahen, shejao üpa homei ha vamhühenshang onyükei!

⁸ Nüngei lak nevaijü la-i huluh shuohjema, ha deh-ei yaktüktuh; lak nyi la nyi kohtü nedohnetenpü molo awlei shülei meyü lakkholanodaitü yangnyu yemei shüpü-üng meipüba.

⁹ Hatü nüngei müki nüng huluh shuohhüjema, ha loukei yaktüktuh; mük nyi kohtü molo awlei shülei meyü mük hük mon kohtü yangnyuyem touei shüpü-üng nüng shing meipüba.

Mahdaipü Mi Jung Lappü

¹⁰ Nüngi hathü maanpü hük kü dangkao ne-ienelemi nedükhen lituh; mehenangkü ngei am kü enyeih, vangsholei jomphongei vangsho phongshanthüi vangsho leipü Opalei dhe kü düngei veinyüke.

¹¹ Mehenangkü Shennyak Ha mahdaipüthü yangnüng yiüpeih.

¹² Ammi mehe deihnya? Mi yombü hükei mi kho hük nyu, hatü ha khongkü hük mahdaijema, büpai büalipü anpüshü kahshangei tuhphongtü mahdaipü hük yemei nedainyu je?

¹³ Hingmei ngei am kü enyeih, büpai ha dangei nemah-i nyupü mi büalipü anpüshü mao nyeinya büpai mongongnyeih.

¹⁴ Hanangkü hathü maanpü khongkü hük dangkao mahtükhenü vangsho leipü ammei Pa-i nemongnyih.

Mang Thahpü Jeihinaü Hük

¹⁵ Ammei jeihinaü khongkü hanei-i nüng khüei mang thahjema, anji mon nyupü hepak kü heih-ei ha pungpü eyeishuoh. Nüngi epü kü ha jeihinaüi bangjema nüngi büpa aokteke.

¹⁶ Shejao nüngi epü kü nebangküjema, nüng mü hük nevaijü nyi mütuh, shejüang nyi nevaijü jem denbüthü nyushi eteipü shah peü jomi denpü shuohhen.

¹⁷ Büpai ha banghen nemongjema, ha attoi am kü etuh, hatü büpai attoi ami epü kao nebangjema, büpayü Kung am nevaijü lat thaipü am kei tuhphongtuh.

¹⁸ Hingmei ngei am kü enyeih, amphongi mehe kahdoknyülei sha, ha vangsholeiyao shahen, hatü amphongi mehe kahdoknyülei lai, ha vangsholeiyao laihen.

¹⁹ Shao hingmei ngei am kü enyeih, kahdoknyülei shennyak nyi mongjemtü mehe yühenshang vangsho leipü Opa-i ha am kü dükhen.

²⁰ Melei ngelei men kü nyi nevaijü jem thaiyei nyu, halei ngei jom mü nyüpeih.

Mang Tükteihen Nyuhpü

²¹ Hahepak kü Peter peiyei büpa kü “Shembüpa, jeihinaü hük ngei khüei mang thahjema, ngei meshükpa mang tükshuohhenang? Nyetpa thahshi hiang?” shei e.

²² Jisui büpa kü, “Nyetpa nevai, shejao ngei enyeih, pejempü anpünyetpa” shei e.

²³ Hanangkü vangsho ongchingü ongpa hüki laophülei chongphobüthülei bheishe hang henghen yaongpü leshi nyüke.

²⁴ Mechem büpai ha henghen pangpa, büpa kü bheishe hang haja an kopü hük büpa touei müei dei;

²⁵ hatü büpai ha neshemaokpü nangkü shembüi büpa kü chenyüha, hapeüthü hatü angpü mop kemei yutü shemhen eteke.

²⁶ Hanangkü chongphobüi büpa touei aümei shatü, “Chem nenei dankütuh, ngei peü shemhen hih” shei e.

²⁷ Shembüi büpa kü shinshangei deihpü nangkü ha chongphobülei shembüi büpa veshuoh, hatü hang neshemhah-i mang tüktük.

²⁸ Shejao hapa chongphobü daiyei büpa mü chemi chongphopü shennyak hük üpai büpa kü lop kho hük shemshuohhen hang nyu, büpa kü büpai üng kü bhittü, “Nüngi shemphahen nyupü hang shemshih” shei e.

²⁹ Hahepak kü büpa mü chemi chongphopü shennyaki aümei shatü büpa kü, “Chem nenei dankütuh, ngei peü shemhen hih” shei e.

³⁰ Shejao büpai ha nemong, hatü büpai büpa müei daiyei ha hang mangshem thahshi khoklatei küpei tuh.

³¹ Mechem büpa mü chemi chongphopüthüi mehe vam, ha eepa, longi mongshang hatü jomphongi daiyei jomei shembü kü ha ejateke.

³² Hahepak kü büpalei shembüi büpa kü nyükei, “Nüng nemeipü chongphobü! Nüngi khümpü nangkü nüngei hang kemei mang tükei tuhpeih.

³³ Ngei nüng kü phahjipükei nüngi jempü küphü chongphobü kü mang netükaokpü je?” shei e.

³⁴ Hanangkü shembüi mongshih-ei hang kemei mangshem thahshi shüveiyei anghen lanei shuoh.

³⁵ Hanangkü ammi ammei nyahinaü jeihinaü kü mang netükjema, vangsho leipü Opaiyao am peü kü hapakei dükphahen.